Ka Sorkar Meghalaya bad Assam ki dei ban tih bniah ïa ka jingkynnoh leh bymhok ka USTM: Dr. Mukul

Shillong, Lber, 15: U Nongïalam ka Liang Pyrshah u Dr Mukul Sangma u la ong ba ka Sorkar Meghalaya bad ka Sorkar Assam ki dei ban da tih bniah bha bin pa bin halor ki jingshah kynnoh leh bym hok ka skulbah University of Science and Technology Meghalaya (USTM).
Dang ha kine ki khyndiat bnai, ka USTM kaba don ha u pud u sam jong ka them Ribhoi, Meghalaya ka la shah kynnoh leh bymhoh ha kiba bun bynta khamtam ha u Myntri Rangbah ka Jylla Assam u Himanta Biswa Sarma uba la byrngem ruh ba ki syrnot ba ki samla pule ki la ïoh na ka USTM kim long satia kiba bit ban thep kam ha ki tnat treikam ka Sorkar ha ka jylla Assam.
U Chancellor ka USTM u Mahbubul Hoque u la shah kem ha ki Pulit ka jylla Assam ha ka 21 tarik Rymphang, 2025 ryngkat bad san ngut ki nonghikai hadien ba la mudui ejahar da u Circle Inspector ka Patharkandi Revenue Circle ba la kynnoh ba la pyn pas ïa ki samla pule da kaba shu siew pisa. Ki san ngut kiba la shah kem ki long ïa u Hiramani Saikia (Principal, Central Public School), u Vijay Dutta, u Rezak Ali, u Imdadur Rahman bad u Numan Ahmed kiba dei ki nonghikai.
Ka Guwahati High Court ka la ai jamin tang hadien katto katne sngi hynrei ki Pulit ka Assam ki la kem biang ïa u Mahbubul Hoque halor kawei pat ka Case ba la register ha Sonitpur District
Dang shen ki Pulit ka Ribhoi District ki la kyntait ban synran lang ïa ki Pulit Assam kiba la thmu ban pynlong ka jingkhynra ha ka skulbah USTM namar ka jingbym don ïa ka Search Warrant na ka Iingbishar.
U Dr Mukul u la ong ka Sorkar Meghalaya kam lah ban shu long ka nongpeit kai halor kine ki jingshah kynnoh namarba ka don bynta ruh ha kaba bei jingïarap ïa ka skulbah kaba kham bun hi samla pule ki dei na kane ka jylla Meghalaya bad na kiwei kiwei ki jylla jong ka thaiñ Shatei Lammihngi.
U Nongïalam ka Liang Pyrshah u la ong ba ïa ka USTM la seng hadien ba ka Ingdorbar Thawaiñ jong ka Jylla Meghalaya ka la mynjur ïa ki aiñ ban ailad ïa ki nongkynshew pisa ban seng ïa ka skulbah ban pynïaid da ki riewshimet.
“Ka jingthmu ban seng ïa ki skulbah ban pynïaid da ki riewshimet ha kylleng ki Jylla ka ri India kumjuh ruh ha Meghalaya ka dei ban plie lad ïa ki samla ban ïai bteng ïa ki jingpule ha ki kyrdan bapher bapher khnang ba kin dup lah ban ïakhun na ka bynta ban ïohkam ïohjam, la ka dei ha ki tnat Sorkar ne ki kompeni ba la pynïaid da ki riewshimet,” u la ong.
“Namarkata, ka donkam ïa baroh ar tylli ki Sorkar ban Jylla ban tih bniah halor kine ki jingshah kynnoh ka USTM khnang ba ki paidbah kin tip ïa ki jingshisha bad khnang ba ki kmie ki kpa ki ïoh biang ïa ka jingshaniah na ka skulbah hashuwa ban phah pule ïa la ki khun,” la bynrap u Dr. Mukul.
Haba kylli ïa ki daw ba ka USTM ka la shah kynnoh leh bymhok, u Dr. Mukul u la ong “lada shu peit ïa kaba la jia, lah ban ong ba ka mat jong ka USTM ka dei ka jingpynlong politik namarkata, donkam ban tohkit khnang ban tip, kaei kaba dei, kaei kaba lait.”