Dei ban pynkynriah lut ïa baroh ki dukan thoh tim najan ki jaka pule bad jaka mane, ai jingmut ka CAG

Shillong, Lber 15: Ka Comptroller & Auditor General (CAG) ka la ai jingmut ïa ka Sorkar Jylla ba kan pynkynriah lut ïa baroh ki dukan thoh tim ba hapoh 100 meter najan ki jaka pule bad ki jaka mane blei.
“Ka Tnad ka dei ban pynthikna ha ka ban pynkynriah ïa baroh ki dukan thoh tim kiba don hapoh 100 meter na ki jaka pule bad jaka mane blei,” ong ka CAG ha ka kaiphod halor ka jingïoh lum pisa ka Jylla na ka bynta u snem ba kut ha ka 31 tarik Lber, 2023, kaba la wanrah ha ka Dorbar Mang tyngka ba dang shu kut jong ka ïingdorbar Thaw Aiñ.
Hapoh ka kyndon 6 (1) jong ka Meghalaya Regulation of the Game of Arrow Shooting and the Sale of Teer Tickets (MRGAS&STT) Act, 2018 kumba la pynkylla thymmai ha ka snem 2019, ki dukan thoh tim ki dei ban don ha ki jaka ym duna ïa ka 100 meter najan ki jaka mane blei ne ki jaka pule.
Ha ka jingleit pynshisha marmet, ka Audit ka la leit jurip ïa 42 tylli ki dukan thoh tim ha ki 6 tylli ki jaka, bad shem ba 31 tylli ki la treikam ha ki jaka kiba la mana, pyntip ka kaiphod.