Ka kam lajong da phi trei 13 -14 kynta ruh ka jingïohnong dei jongphi hi

Shillong, Lber 13 : Ka Deputy Commissioner ka East Khasi Hills, Kong RM Kurbah ka la ai ka jingïaroh ïa kito ki samla kiba la mih shakhmat ban ieng ha la ki jong ki kjat ban sengkam lajong lyngba ka jingkyrshan ki tnad sorkar.
Haba kren kum ka Kongsan ha ka jingïalang plie pyrda ïa ka tamasa pyni nam ïa ki tiar ki tar ba la shna, la thain bad suh da ki samla da ka jingkyrshan jong ka ophis u General Manager ka District Commerce & Industries Centre East Khasi Hills ka DC ka la ong ka sienjam ba ki shim kadei ïa ki ban ïoh ïa ka jingïaroh.
“Kano kano ka kam kaba phi ieid da phi trei 13 14 kynta ruh kadei ka kam jongphi bad ka jingïohnong ruh kadei ka jongphi,” ka la ong.
Shuh shuh ka la bynrap da kaba ong ba ha ka jingtreikam donkam ruh ka jingshaniah mar kylliang. Ka DC ka ong ruh ba kane ka jingshaniah ka donkam bha na ka bynta jong kito ki samla kiba la lah ban seng kam bad kito kiba trei khnang ka kam kan ym thut bad kan ïaid beit bad kiew arted
“Lada neh ki nongtrei ka kam kan kiew bad kumta ka donkam bha ka jingshaniah haka jingtreikam naba kane ka wanrah ka jingsngewthuh jingmut. Hynrei lada pynkylla nongtrei man ka por ka ong ba kane kan ktah bha ban pyndep ha ka por ba la buh namar tang katno katno la hap ban hikai thymmai biang na kaba sdang,” ka la ong.
Shwa kane, ka Deputy Commissioner, ka la ong ruh ba ka jingkwah jong ka ban pynshlur ïa kitei ki samla kadei namar ki khlem ap ïa ka kam sorkar hynrei ki mih da ka rai rangbah ban ieng ha la ki jong ki kjat.
Ka DC ka ong ruh ba lada peit katkum ka jingbun briew ha Meghalaya, ka jingdon ki nongshong shnong kiba hapoh 45 snem ka long hapoh 75 persen kaba dei ka rta kaba dang shait dang khlain ban trei ban ktah.
“Kane kadei ka rta kaba lah ban pynmih soh bad ki jingmyntoi, ka rta ba dang khluit ka snam bad ka rta kaba dang lah ban trei shitom bad ka dang dei ruh ka por kaba ki dang lah ban shah ïa ka slap ïa ka lyer. Kumta ngi pynshlur ïa ki khynnah bad ki rangbah haduh kiba 45 snem ba ki dang dei ban trei shitom ban wad ki lad ki lynti bad ieng ha la ki jong ki kjat ym dei eh ban pyrkhat ba yn ïoh ïakano kano da kaba suk,” ka la ong.
Ka DC ka ong ruh ba kano kano ka kam kam long kumba kheit soh. “Wat ïa u soh ruh hap don kiba thung bad ap da ki phew snem ban ïoh bam kane ruh ka long kumjuh haba ïadei bad ka kamai kajih bad ka ïohkam ïohjam.”
Nangta da kaba ïaroh ïa ka sienjam ba shim da ka DCIC, ka la ong ba kum kine ki rynsan pyni nam ka long ruh kum ka lad ban pyni ïa ka sap ba ki samla ki don khamtam eh ban pynkynduh ïa ki nongdie bad ki nongthied.
Ka la ai ruh ka jingïaroh ïa ki samla kiba hadien ba ki la dep ban pyntbit ïa ki jingshah hikai ki la mih shakhmat ban ieng ha la ki jong ki kjat da kaba seng kam lajong.
“Ki samla ki dei ruh ban buh hakhmat ba kano kano ka kam ba phi leh kan dei kaba phi leh da ka jingieid naba ka jingtrei da ka jingieid kan wallam ïa ka jingïohnong bad ka jinghun ka mynsiem.”