Shillong, Lber 15: Ka Comptroller & Auditor General (CAG) ka la sei madan ïa palat 250 tylli ki jingjia die tuh ïa ki nombar tim ha kine ki hynriew snem ba la leit noh bad ai jingmut ïa ka Sorkar ban leh tyngeh ïa ki ophisar ki bym lum kuna na ki bookmaker/Organizer, kiba pynkheiñ ïa ki kyndon jong ka Aiñ.
Kane ka long katkum ka kaiphod jong ka CAG halor ka jingïohlum pisa jong ka Jylla na ka bynta u snem ba kut ha ka 31 tarik Lber 2023, kaba la wanrah ha ka Dorbar Mang Tyngka ba dang shu kut jong ka ïingdorbar Thaw Aiñ.
“Hapdeng u snem 2017-18 haduh 2021-22, haduh 250 tylli ki jingjia die tuh ïa ki nombar tim la shem ha ka jingtohkit ha u pud u sam jong ki phra tylli ki ST office,” ïathuh ka kaiphod.
“Ka Audit kam shym la shem satia ïa kano kano ka jingthoh ban pynpaw ba ka Tnad ka la shim ïa ka sienjam ban shaiñ kuna na ki bookmaker ne ki nongdie nombar ba khlem ïoh jingbit, kiba la dep ban ithuh. Ka jingbym shaiñ kuna ka la wanlam ïa ka jingduh ïa ka kuna kaba kot haduh T. 12.50 lak,” ka la pyntip.
Ka Tnad ka la pynpaw ba ïa ki dukan thoh tim ba beaiñ la ai jingmut ba kin register noh ïalade hapoh ka MRGAS & STT Act, 2018.
Ka CAG ka ong ba kane ka jubab kam ïahab satia naba ka kyndon 13 (1) jong ka MRGAS&STT Act, 2018, ka la kren shai ban shaiñ kuna beit ïa ka jingdie numbar tim khlem da ïoh jingbit.
