Ka Sorkar MDA ka bymler ban pynïaid skul lada dei ha ka eksamin kan ïoh nod: Birbor

0

Shillong, Risaw 01: Hadien 24 sngi ba ki nonghikai kontrak kiba la shah beh kam noh ki la pynlong ïa ka jingïakhih jong ki ban dawa na ka sorkar ba ka dei ban thung kam biang ïa ki katba na ka liang ka sorkar ka ieng skhem beit halor ka nongrim ba kan ym lah shuh ban thungkam biang ïa ki bad ba kan ym khot ïakren shuh ruh bad kine ki nonghikai.
Haba u Mawphor u ïakren bad u President ka Meghalaya Government Lower Primary School Contractual Teachers’ Association u Babu Birbor Riangtem u la ong ba nabaroh ki sorkar kiba la synshar ha ka jylla dei kane ka sorkar ka bym ler tam na baroh ki sorkar khamtam eh ha kaba ïadei ban pynïaid ïa ki skul.
U la ong “Phi ju ïohi mo ha ki snem ba kham mynshuwa ba ki nonghikai kin hap mih surok beit ban dawa siew tulop ne kyntiew tulop, peit ym tang ki nonghikai kontrak kiba ïakhih hynrei naduh ki nonghikai SSA bad Adhoc ruh ki hap leit sah miet ha surok ban ïoh ïa ka tulop ba dei hok jong ki bad nga kwah ban ong ba kane kam ju kham jia koit ha ki snem kiba mynhuwa” bad bynrap “mynshuwa ki nonghikai ki leit sei tulop beit na bank katba mynta pat hap leit sahmiet shuwa ha surok seceretariat”.
Haba kylli la kum u nonghikai un ai mark katno na 0-10 ïa ka sorkar u Babu Birbor u la ong, “Lada dei ha ka eksamin kane ka sorkar kan ïoh u 0 uba heh bad ba sngaid bha namar ka jingtam duh na baroh ki sorkar ha ka jingbym ler”.
U la ong ruh ka sorkar MDA hapoh ka jingïalam u Conrad ka ju kam ba ka pule puthi ka dei ka mat kaba ki buh ha khmat tam “i dada ban peit bad sngew samut ban sngap namar kaei kaba ki leh pat ka long markhongpong ïa ka jingkren jong ki” u la ong.
Haba kren halor u Mynti Rangbah ka jylla u Babu Birbor u la ong, “Ha ka por ba dang do u kpa jong u Conrad ha ka sla pyrthei bad mynba u dang don ha ka shuki ngim ju ïohi ban un eh dohnud kum u khun jong u bad kaei kaba u Conrad u leh ka pynbudnam lang pynban ruh wat ïa ka nam ba bha kaba u kpa jong u u la ïoh”.
Shuh shuh u la ong, “Ngi la ïakhih katto bad ngi tip ba u Myntri Rangbah bad u Myntri ka tnat Pule Puthi u tip bha ïa kaei ka jingdawa jong ngi hynrei kumba ong ka ktien, Ym don uba kham kyllut ban ïa ubym kwah sngap, ym don matlah uban kham palat bad ïa ubym kwah peit bad kane ruh ka dei sbak ïa ki”
U la ong ruh “Peit seh tang ha ka jingkren jong u Conrad u ong ka sorkar kan wad lad na bynta ki nonghikai kontrak katba u Lahkmen u ong ba ka jingkhang ka la khang sbak bad kane ka pynphalang ba kam ju don ruh wat tang ka jingïamir jingmut hapdeng para nongïalam ba sa kulmar lut kiei kiei kiba ïaid beit shuwa ban wan kane ka sorkar”
Haba ïadei bad ka ilekshon kaban wan u babu Birbor u la ong ba ki paidbah ka jylla kim dei shuh ban bakla namar lada bakla biang ban jied ïa ki nongsynshar ngin jam na kaba sniew sha kaba kham sniew shuh shuh.
“Ngim donkam ban leit ïalap ilekshon kumba phi ong ban thad madan ïa kane ka sorkar namar nga tip skhem ba ki paidbah hi ki la tip kaei kaba ka sorkar ka la leh” u la jubab la un leit ïalap ilekshon ne em pyrshah ïa kane ka sorkar.

Leave A Reply

Your email address will not be published.