Shillong, Risaw 1 : Ka ïing bishar High Court (HC) jong ka jylla ka la pyllait jamin ïa u Bernard N Marak uba dei u Vice President ka BJP Meghalaya Unit bad MDC ka Tura uba la shah kem halor ka jingkynnoh ba u pynlong ïa ka ïing basa jongu ka Rimpu Bagan kum ka ktem ki kam awria ( Brothel) kaba ha Tura, West Garo Hills District.
ïa kane ka hukum la pynmih da ka ïing bishar hadien ba ka kurim jongu ka L.K Gracy ka la pan jamin na ka bynta u tnga jongka ha ka Sngi Thohdieng.
“ Ka hukum ka kdew ba ïa u Bernard N Marak uba la shah kem halor ki jingkynnoh la lah ban pyllait jamin noh lada ym don shuh kiwei kiwei ki jingshah pynngat kyndon kiba dang donkam ban tohkit bniah ïa u. Ki kyndon jong ka jamin ka long ba um dei ban phet rieh ne pyrshang ban pynduh pyndam ïa ki sakhi,sabut . Um lah ban mih shabar u pud jongka ri India khlem da ïoh jingbit na u IO ne na ka ïing bishar. U dei ban ïatrei lang bad ka kynhun tohkit ha kano kano ka por ba donkam ïa u. U dei ban buh ïa ka bai jamin 50,000 ryngkat bad arngut ki shakri sorkar ki ban bah khlieh ïa u, ong ka hukum ba la pynmih da u nongbishar Justice W Diengdoh.
ïa u Bernard la kem ha ka 26 tarik Naitung na Hapur District Uttar Pradesh hadien ba u pyrshang ban phet rieh namar ki pulit ki leit khynra ïa ka ïing basa jongu bad ïoh ban pyllait im ïa san ngut ki khynnah rit bad ïoh kem 73 ngut ki rangbah briew kynthei bad shynrang. Nalor kane ki pulit ki la ïoh ban kurup ruh bun bah ka kyiad bad kiwei kiwei ki jingdih ba pynbuaid. Nalor kata ki pulit ki la ïoh ruh ban kurup ïaki condom bun bah na katei ka ïing basa jongu. Hadien kane la rejister case ha ka kyndon Immoral Trafficking (Prevention) Act 1956 ha Tura Women Police Station.
Hooid ki jingshah kynnoh ki long kiba khia bha pyrshah ïa u Bernard ka jingshisha ka long ba katei ka ïing basa ka dei kaba la long trai da ma u bad kam dei ka jaka ba don ha ka jingïaknieh.
Na ka jingphla jong ki nongsakhi bad ki sabut kiba la ïoh kurup ki don ki jingshisha halor ki jingkynnoh tangba tang kawei ka long ba ym don sakhi ba la pynlong ïa katei ka jaka kum ka brothel lane ki jingpynshisha ba la pynïaid ïa ki kam awria ha katei ka jaka. Tang kawei ka jingshisha ka long ba ki briew kiba wan sha katei ka jaka ban ïashong kai bad ïaleh sngewbha da kaba wai ïaki kamra hynrei ym lah ban pynshisha la ki ïaleh ne em ïa kita ki kam awria hynrei lada leh ruh lehse ka dei da ka jingïasngew thuh jingmut lang kum ki briew kiba la san.
Ka ïing bishar ka la pynpaw ruh ba ka jingkynnoh ba ïa kawei ka khynnah kynthei la leh beijot ha ka por ba leit khynra ïa katei ka jaka ym lah ban pynshisha namar ym don ki sabut kiba biang. Kane kam mut pat ba kiei kiba la lap ha ka jingtohkit halor ka jingdonkti u Bernard ym lah ban pynshisha da u IO hynrei ka ïing bishar ka lap ba dang donkam shuh shuh ki jingpynsshishat halor kine ki jingkynnoh.
Shuh shuh ka ïing bishar ka la pynpaw ruh ba kaei ka hukum jongka ïing bishar Session Judge ba la lah ban wanrah da u AAG bah N.D Chullai ruh ym lah ban pdiang da ka iing bishar High Court. Nalor kata u AAG u la pynpaw ba une uba shah kynnoh u dei ruh u dkhot jong kawei na ki seng sain pyrthei ba heh bad u lah ban pynjah rngai ïa ki sakhi sabut lada ai jamin ia u kaba lah ban ktah jur ïa ka jingtohkit.
Na ka liang u nongïasaid aiñ u AM Bora pat u la ïasaid ba une uba shah kynnoh u dei u briew uba khuid bad um don kti ha kino kino ki jingshah kynnoh. Da kaba pynpaw hakhmat ka ïing bishar ba ka Section 3/4/5/6 bad 7 jongka Immoral Traffic (Prevention ACt 1956 kim don jingiadei bad uba shah kynnoh kat kum ka jingphla jongu hakhmat ki pulit da kaba u la kyntait ïa baroh ki jingkynnoh ba u pynkylla brothel ïa katei ka ïing basa jongu bad ba u im da kaba pynïaid ïa ki kam awria.
Une uba shah kynnoh u dei u nongmihkhmat ba la jied da ki paidbah bad u dei u dkhot jongka District Council bad u don kiwei kiwei ki jaka kiba pynmih pisa ïa u kumta um donkam ban leh da kine ki kam kumba la kynnoh ban kamai spah.
Halor kine kiei kiei baroh ki jingïasaid ka ïing bishar ka la ai jamin ïa u ryngkat ki jingteh kyndon bad bthah ba u dei ban burom ïa kitei ki kyndon.
