Julor ka ka jingker sainar shiah ha Ichamati-Majai, prong ki mynder na Bangladesh

0

Shillong, Risaw, 01: Ka jingker sainar shiah kaba pynïakhlad ïa u pud u sam jong ka ri India bad ka ri Bangladesh ha ki bynta jong ka shnong Ichamati bad ka shnong Majai, East Khasi Hills District ka la julor khlem da don mano mano ruh ban shim khia ïa kane ka jingker ka ban ïada na ka jingprong tuh jong ki mynder na ka ri Bangladesh.
Katkum ka jinglap jong ki dkhot ka Khasi Students Union, South Khasi Hills District Unit, la ong ba ka jingjulor kaba la kheiñ antad kumba 20 mitar jong kane ka jingker sainar ha khappud ka dei kaba la pynjulor da ka um na ka daw ka jingjur shaba palat jong u slap ha u snem 2018-2019 bad kaba la wanrah ïa ka jingshlei um ha kane ka jaka.
U General Secretary jong ka Seng u Bah Edmund Khongsya ha ka jingïakren bad u nongthoh khubor u la ïathuh ba ka jingjulor jong kane ka jingker sainar shiah ka la pynshlur ïa ki mynder na ka ri Bangladesh ban wan kiew sha rilum Khasi bad u la ïathuh ruh ba na ka por sha ka por ki dkhot jong ka seng ki ju ïoh bat ïa ki mynder kiba ju prong tuh shapoh u pud u sam jong ka ri India lyngba kane ka khappud.
U la ong dang ha u bnai Jylliew, mynta u snem ki dkhot ka Seng ki la ïoh bat ïa ki mynder kiba prong tuh na ka ri Bangladesh shapoh u pud u sam ka ri India.
“Ngi kyrpad ïa ka Sorkar ba kan shimkhia halor kane khnang ba kan long ka jingïada na ka jingwan prong tuh ki briew na ka ri Bangladesh bad lehse ki lah ban jia na ka por sha ka por. Dang ha ki bnai baladep, bun ki briew na ka ri Bangladesh ki la wan kiew sha rilum Khasi. Namarkata, nga kyrpad ïa ka Sorkar ba kan shimkhia noh mardor ban shna pynbha ïa kane jingker sainar kaba don ha khappud,” u la ong.
Ha kaba ïadei bad kane, u Bah Edmund u la ïathuh ba ka seng kan sa leit ujor sha ki bor Sorkar ba kin shimkhia ban shna pynbha ïa kane ka jingker sainar ba la pynjulor da ki bor jong ka mariang.

Leave A Reply

Your email address will not be published.