Haduh mynta pat ïohlad ki heh HSPDP ban kynduh ïa u MLA Sohïong ban ïoh jingshai

Ngin pyndap ïa ka jaka ba suda, ong u President EKH

0

Shillong, Risaw 01 : Ki nongïalam ka HSPDP East Khasi Hills District haduh mynta kim pat ïoh lad satia ban kynduh ïa u MLA ka Sohiong, Bah Samlin Malngiang ban ïoh jingshai la utei u MLA un dang ïakhun na ka party lane un ïakhun noh na kawei pat ka party ha u 2023.
Haba kren bad ki lad pathai khubor, u President ka HSPDP East Khasi Hills, Bah Martle N Mukhim u la ïathuh ba ka daw ba ki leit ban wad jingshai na utei u MLA kadei hadien ba ki la ïoh sngew ïa ki khubor ba un leit ban ïakhun noh na ka NPP ha ka elekshon ban wan.
“Haduh mynta ngim pat ïoh lad satia ban kynduh ïa utei u MLA watla nga la pyrshang ban kynduh. Ha kawei ka liang nga sngewtynnad ba ki ruh ki bunkam bad shitom bha ban kynduh ïa ki,” ong u Bah Martle.
Shuh shuh u la ïathuh ruh ba tad haduh kine ki sngi dang shen u dang pyrshang ban kynduh hynrei ym shym la ïohlad satia. “Ngan ïai pyrshang biang watla nga la dep ban ai ïa ka report sha ka party ba ka eh bha ba ngan kynduh ïa u MLA namar wat haba nga phone ruh u don beit ha ka jingïalang kumta shem shitom bha ban kren ïa ki kam ki jam ruh,” la bynrap biang utei u rangbah.
Halor ka jingkylli kaei pat ka sienjam ba ka party kan shim lada jia ba utei u MLA u leit ban ïakhun noh na ka NPP kumba la bna ki khubor, na ka liang u Bah Martle u la ong ba ia ki kma ka party kin ïaid beit shakhmat kaba mut ba kin wad beit da kiwei ki kyrtong ban ïakhun na katei ka constituency.
Da kaba pynpaw ïa ka jingbynnud, utei u rangbah u la ïathuh ruh ba u Bah Samlin u dei uwei na ki nongmihkhmat paidbah uba u ieid bad shaniah bha. “Ha kiba bun ki khep u don ka jingkitkhlieh ïa la ka jong ka party bad u ong ruh ba kane ka party kadei kaba ieid ïa ka ri bad ka jaidbynriew. Hynrei ngam tip pat na kaei ka daw hato u bunkam ne balei ba ngim lah shuh ban ia kynduh haduh mynta,” u la bynrap biang.
Haba jubab pat halor ka jingkylli, u President u la ong ba lada jïa ba ki MLA ki leit noh sha kawei la ka long na Mawkyrwat ne na Sohiong ka ain jong ka mariang ka la don lypa ba kin hap beit ban ïaid shakhmat ban jied noh da kiwei ki kyrtong.
Kumban shu kdew, ka HSPDP ka la pynkup bor ha u Bah Martle ban leit kynduh ne pan jingshai na u Bah Samlin ban ïoh ïa ka jubab kaba tikna ba un mih noh na ka party hynrei katkum ka jingïathuh jong utei u rangbah ba dei ruh u MDC ka Mawkynrew kim shym la ïohlad satia wat tang ban kynduh ruh.
Dang ha kine ki khyndiat taiew, u MDC jong ka party Bah Sherbor Mawlong u la leit ban pynïasoh noh sha ka NPP ryngkat ki nongkyrshan kaba la pynskhem shuh shuh ïa ka jingbna ki khubor ba sa u MLA ka HSPDP un leit ban pynïasoh bad katei ka party kaba ïalam mynta ïa ka bor synshar ha ka jylla.
Haba ïadei pat bad ka Mawkyrwat, ka HSPDP dang shen ka la jied da uwei pat u kyrtong ha ka jaka jong u Bah Renikton L Tongkhar hadien ba utei u MLA u la thmu ban leit ïakhun noh na ka party UDP.

Leave A Reply

Your email address will not be published.