Ka sorkar kam sngewthuh ïa ka rai ka SC ban shah tih dewïong biang ha ka jylla: Dr Mukul

Shillong, Nailar 21: U Nongïalam ka Liang Pyrshah u Dr Mukul Sangma ha ka sngi Saitjaiñ u la ong ba ka sorkar jylla bad u Myntri Rangbah um peiphang satia ïa ka rai kaba ka supreme Court ka pynmih halor ka rai ban weng ïa ka hukum tih dewïong ha ka jylla. U la ong ruh ba dei ka sorkar kaba ai lad ban tih dewïong be-aiñ.
U Dr Mukul u la ong ba ka sorkar kam ju ai shim kino kino ki lad ki lynti ban pynshitom ïa kito kiba pynkheiñ ïa ka aiñ khang tih dewïong bad kane ka jingleh ka sorkar ka ong kum ka jingpynshlur shuh shuh pynban ba kin bteng ïa ka kam be-aiñ.
Haba ïadei bad ka jingïap bad mynsaw ki nongtih dewïong na ka jingshah ban ki ha ka par ha West Khasi Hills, u la ong ba kane hi ka sakhi ba ki kam tih dewïong be-aiñ ka shyrkhei ha ka jylla katba ka sorkar man ka por ka len beit ba ka don kaba kum kata.
U Dr Mukul u la pynkynmaw ïa kaei kaba ka sorkar MUA ba la ïalam da ka Congress ka la leh mynba u dang long u Myntri Rangbah jong ka jylla, u Dr Mukul u la ong ba na ka liang ka sorkar jylla ha kato ka por ka wanrah ïa ka Meghalaya Mining Development and Regulation(MMDR) Policy, 2012, “Kito ki juh ki briew kiba kynthoh ba ngim shym la pyntreikam ïa ka MMDR mynba ngi synnshar da ka jingthmu ban ïalam bakla ïa u paidbha bad ki dei ki juh hi pat ki briew kiba don ha ka bor synshar mynta kiba ym shym la leh eiei” u la ong.
U Dr Mukul u la ong ruh ba na ka liang ka sorkar ha kito ki snem ba dang shuh shah khang tih dewïong ka la file ki affidavit bun bun tylli sha ka NGT bad ka Supreme Court ban ban kdew ba ka khyndew bad ka jinglong trai ïa ka ha ka jylla ka pher bak-ly-bak na kiwei pat ki jylla ha ka ri.
“Dei na ka daw ka jingtrei shitom ka sorkar ban pynkynmaw ka sorkar jylla ba ka Supreme Court ka la pynmih ka rai bishar jong ka ban pynskhem ïa kaei kaba na ka liang ka sorkar ka pyni sha ka Supreme Court ba ki mar poh khyndew ha ka jylla ki dei ki jong ki trai jaka bad ki trai jaka ki don hok ban tih ne khlong ïa ki”, u la ong.
“Ka sorkar lei mynta kam sngewthuh wat ïa kane ruh namar lada phi peit na ki Proceeding u Myntri Rangbah u la ong ba ka ba ka sorkar ka ong ba kan ai ki Mining Lease ha ka jingshisha ka sorkar kam lah ban ai lease namar ka hok ka shong beit ha ki trai jaka ban ai mining lease ban tih dewïong” u la ong
Shuh shuh u la ong ba ka hukum kaba ka Supreme Court ka pynmih ha u 2019 ba ka a weng noh ïa ka jingkhang tih dewïong da ka NGT ha ka jylla ‘balei pat ka sorkar kam lah haduh mynta ban ai lad ban tih dewïong kaba shong aiñ’.
“Ka sorkar mynta ka dei ka daw ba ki nongbtylla ha ki par ki duh kamai bad ba ka jylla ruh ban ïoh khajna na u dewïong namar lada ka sorkar ka thaw lad ka don ka lynti ban shah ban tih dewïong” u la bynrap.