Nongpoh, Jymmang, 04: Ka tamasa Sohshan ne ka Strawberry Festival 2025 ba 2 sngi lynter bala pynlong da ka Megha layan Age Limited haka jingsnohkti lang ka tnad jngohkai bad ka tnad ka rep ka riang jong ka jylla ka la sdang ha ka sngi Thohdieng ha ka shnong Sohliya ha Ri-Bhoi District.
Ïa katei ka tamasa Strawberry Festival la wan ban plie paidbah da u Abhilash Baranwal Deputy Commissioner ka Ri Bhoi District kum u kongsan, u Pranjal J Dutta District Horticulture Officer ka Ri Bhoi District kum u symbud kongsan, haka jingdonlang u Bah O.S Lyngkhoi Rangbah Shnong ka Sohliya u ba dei ruh u Rangbah ba sdang nyngkong ïa ka rep Strawberry ha Ri Bhoi District naduh u snem 1998.
Ka jingthmu jong katei ka tamasa ka long ban kyntiew bad pynpaw pyrthei ïa ka jingpynmih ïa u sohshan haka jylla, kum ka jinglehkmen halor ka jingjop ïa ka rukom rep ïa utei u jait soh ba paw haka pyrthei kaba la ai jingmyntoi shibun ïa ki longiing kiba thung bad rep ïa utei u jait soh.
Kum ban shu kdew katei ka tamasa ka dei kaba 2 sngi lynter bala pynlong ha kylleng ki jaka jong ka Jylla ba kynthup ha Sohliya ha Ri-Bhoi, ha Syntung East Khasi Hills District, bad ha Darechikgre ha West Garo Hills.
Haba kren ha katei ka sngi na ka liang u Abhilash Baranwal, kum u kongsan u la ong ba ka long ka jingsarong kaba khraw ïa ka Ri-Bhoi District ba tang da ka jingtrei shitom jong uwei u briew u ba la sdang ïa ka kam rep Strawberry la lah ban pynkylla ïa baroh kawei ka district, kaba long ka nuksa kaba khraw hapdeng ka mei mariang kaba biang tam.
U la ong ruh ai ba ka shnong Sohliya kan long ka nuksa bad ka shnong kaba ai mynsiem ïa ka rep strawberry haka district bad na ka liang ka bor sorkar kan shimkhia ban pynurlong ïa ki lad jingïarap ba kum ka shnong ka donkam na ka bynta ban dang kyntiew bad pynheh shuh shuh ïa ka kam rep strawberry haka jylla.
