Da ki hajar poi ki paid ka Elaka Labang Nangphyllut haka Rally ba khot pynlong ka HBDRF ha Jowai

Jowai, Jymmang 04: Da ki hajar tam ki nongshong shnong jong ka thaiñ Elaka Labang Nangphyllut bad Pangam-raliang kaba tip mynta kum ka Block-1, kila wan ïashim bynta haka jingïaid Rally bala khot pynlong da ka Hynñiewtrep Border Dispute Redressal Forum (HBDRF) mynta ka sngi saitjaiñ 3 tarik u Jymmang, 2025 kaba sdang na Lad Kiang Nangbah Government College, Jowai bad ïaid ter ter na u surok mainroad Iawmusiang shaduh sha District Library Auditorium Mynthong, Jowai bad pynlong artad ïaka jingïalang hapoh jong kane ka Hall.
Kitei ki paidbah jong katei ka thaiñ Elaka Labang Nangphyllut bad na kiwei de ki shnong kumjuh na sor kiba kynthup naduh ki longkmie, ki longkpa bad ki khun samla kila wan ïashim bynta lang haka jingïaid Rally da kaba pyrta ha surok ïa ki ar tylli ki mat jingdawa kata ban pynpaw sha ka sorkar halor ki jingeh jong ki paid Khasi Pnar haki shnong khappud bad ban re-transfer biang ïaka Block-1 &11 na Assam sha Meghalaya kumba la pruid dak daka sorkar Assam hi naduh ka snem 1957-58.
Kiba bun na ki nongkren ha kane ka jingïalang kila pynsngew ïa ka jingthrang jong ki paid bashong ba sah ha Block-I&II ban rung noh shapoh ka jylla Meghalaya ïa kaba kila angnud la bun bun snem mynta, namar ïa kitei ki jaka haduh mynta ki dang hap haka jingïakren pynbeit hapdeng ki ar jylla (Assam bad Meghalaya).
Shuh shuh kila pynsngew ïa ki jingeh kiba ki ïa kynduh namar ka jingbym ïoh ïa ka hok jong ki naduh ki lynti ki syngkieng, ki umbam um dih bad kiwei de ki kam pynroi hapoh ka Block-I, nalor kata sha ka jingshah pyndik ba man ka por ha ki briew jong ka Assam. Kumta kiba kyntu jur ïa ka sorkar Meghalaya ba kan shim khia ïa kane ka kam ïap kam im jong ki briew kiba shong ha katei ka thaiñ Block-I&II.
Ïa ka jingïalang la pynïaid da u bah Chandame Sungoh, Chairman ka HBDRF, la ïoh ruh ka jingkren na u Acting Dolloi Elaka Nonphyllut, nangta ma M.M. Thaiang, u Dr Henry Lamin, ma Erwin K. Syiem Sutnga, ma Thomas Passah nalor kiwei de ki riew shempang kiba la ai jingkren ha kane ka sngi.
Kiwei de ki nongïalam shnong jong ka thaiñ khappud kiba kynthup na Mukroh, Khanduli, Psiar, Mukoiram bad kiwei de kila wan sha kane ka jingïalang ha ryngkat ki dkhot seng bhalang kum ka HNYF, JSM, JYF, KJYSU, STIEH bad kiwei de.
Hadien kane ka jingïalang ha District Library Auditorium kila shim ïa ka rai.