Nongpoh, Jymmang, 04: Ka skulbah University of Science and Technology (USTM) ka la shim biang sa ïa kawei ka sienjam ban tyrwai bai bam (Scholarship) sha ki 500 ngut ki samla pule na ki jylla shatei lam mihngi ka ri India, kaba dei kawei na ka thong ban kyrshan ïa ki samla pule khamtam kito kiba wan na ki longïing baduk ba kin lah ban poi sha ki kyrdan ba kham shaneng ha ka pule ka puthi. Kane ka bai bam ka dei na ka bynta u snem 2025-2026.
Ban pynkupbor kyrpang ïa ki samla pule, ka USTM ka la pynbna ïa kane ka bai bam sha ki 500 ngut ki samla pule ka dei ha ka Press Conference kaba la long hynnin ka sngi ha Guwahati, ha kaba la pynbna ïa kane ka bai bam ki samla pule da ka Dr. Rani Pathak Das, kaba dei ka Public Relation Officer ka USTM ryngkat ka jingdon lang ka Dr. Rashmi Baruah, Associate Professor; Prof. Gayatree Goswamee, Dean, PQSE; u Debasish Saha, Director Operations & IQAC(i/c); bad u Nurmahmud Ali, Director, Admissions & Training and Placement Division.
Haba kren sha ki lad pathai khubor ka Dr. Rani Pathak Das, ka la ong ba ka skulbah USTM ka la shim ïa kane ka sienjam kaba long ka jingsarong ba ka la lah ban ai ïa ka jingpule ei ïa kiba bun ki samla pule baduk naduh ba la sdang seng ïa kane ka skulbah. Haduh kine ki sngi la don kumba 10,000 ngut ki samla pule kiba la thep kyrteng ha kane ka skulbah lyngba ka ERD Foundation ban ïoh pule ei kiba kynthup 57% kiba dei ki samla pule kynthei, 80% ki samla pule kiba wan na ki shnong nongkyndong bad kumba 20% ki samla pule ki ïoh ban pule ei bad ha ka dor kaba duna.
Shuh shuh, ka la ong ruh ba kane ka jingai bam bam ïa ki samla pule ka dei ka jingangnud kane ka skulbah ban kyntiew ïa ka pule ka puthi ki samla pule na ki jylla shatei lam mihngi ka ri India bad kaba ïarap kyrpang ka long ka jingmyntoi ïa kiba bun ki samla pule kiba duna ka ïoh ka kot bad kiba ym lah ban ïaid shaphang ha ki jingpule na ka daw ka jingban ka jingduk ka jingkyrduh, ka la bynrap.
