Nongstoiñ, Lber, 08: Ka shnong Mawïawet ka dei ka shnong kaba don ha West Khasi Hills bad kaba hap ha ka Nongstoiñ C&RD Block. Ka dei ka shnong kaba itynnad bha kaba jngai kumba 12 kilomitar shaphang mihngi na ka sor Nongstoiñ bad ha sawdong jong katei ka shnong la ker da kiwei pat ki shnong katkum ki phang kata, shapang mihngi na katei ka shnong ka don ka shnong Shohphria bad Mawlangkhar shaphang shatei ka don ka shnong Ksehkohlong bad Nongspung shaphang sepngi ka don a shnong Domkohsam, Nongdiwah, Nongrangoi Nongdom bad Lumpyngad, shaphang shathie ka don ka shnong Mawkynbat, Mawsngapwir bad Lawrapha.
Hapoh u pud u sam jong katei ka shnong ki don ar tylli ki jaka kiba la jer kyrteng katkum ki jingjia bad ki kyrteng jong kitei ki jaka kim pat kylla satia haduh mynta mynne. Ha kaba ïadei bad ka kyrteng bad ka jingmut kaba la khot kyrteng ka Mawïawet, u Ma Khronsingh Wahlang uwei na ki riew tymmen jong katei ka shnong ha kaba u la pynshai halor ka kyrteng bad ka jingmut jong katei ka shnong.
Katkum ka jingïathuh jong u Ma Khronsingh la ong ba ha katei ka jaka, la shong shnong nyngkong eh da kawei ka briew kaba kyrteng ka Wet jait Kharbani bad kham hadien la wan ban shong shnong da kiwei pat bad ka kyrteng Mawïawet, ka dei kaba la jer na ka kyrteng jong katei ka mei tymmen kaba la wan shong shnong nyngkong eh.
U la pynshai ruh ba ka ktien ïaw ka dei ka jingkhot ieit ïa ki longkmie kiba la tymmen bha bad ka jingai kyrteng Mawïawet, ka dei namar ba katei ka mei tymmen hyndai ka la phah thung da u mawbynna ïa ka jaka jong ka. Ha kaba ïadei bad ki ar tylli ki jaka kiba ki paitbah nongshong shnong ki dang khot haduh mynta mynne kum kawei ka khlaw kaba don shaphang sepngi na katei ka shnong, kaba ki khot ka khlaw wah sohrait.
U Ma Khronsingh u la ïathuh ba katkum ka khana jong ki riew tymmen la ong ba ha kawei ka por la don uwei u briew uba dang wan trei na lyngkha bad haba u la poi ha katei ka jaka kaba long khlaw, ki nongshoh noh ki la apthap ïa u bad haba u la poi hajan ki la kynrup bad ha kata ka por ka jingïakhun kaba jur ka la mih hapdeng jong ki nongshohnoh bad utei u nongrep. La ong ruh ba ha ka jingïakhun utei u nongrep u la jop bad u la pynïap ïa uwei na ki nongshoh noh.
Shuh shuh la ong ba utei u nongrep u la kthong sa ïa kiwei pat hynrei um ïoh namar ba ki la phet ïap da ka jingtieng. Kumta ha ka jingdom bad bitar lep u la sei da ka wait shaku ba u thep ban khoh kwai bad u la leit sha utei u nongshohnoh uba la ïap bad u la ot ïa u tiar jinglong shynrang bad u la leit wah ha ka tnad dieng ha katei ka khlaw bad haduh mynta mynne la khot ka khlaw wah soh rait.
Kawei pat ka jaka kaba haduh mynta mynne ki dang khot kyrteng ka law rapi u Ma Wahlang u la ong ba katkum ka jingïathuh jong ki riew tymmen la ong ba katei ka jaka kam dei ka law rapo hynrei ka dei ka ïaw rapi. U la ong ruh ba la ai nam ïa katei ka jaka namar ba mynshuwa eh la don kawei ka tymmen kaba kyrteng ka Rapi Kharbani.
Ha kawei ka sngi katei ka tymmen ka la leit tong doh thli na katei ka jaka kaba don ka ktieh shrah kaba long kum bir bad hapdeng jong katei ka shrah, ka don ka thliew long kaba jylliew bha bad na jrong la sop da ki phlang kiba la ju khot ki tdob. Shuh shuh la ong ba ha katei a bir ki doh thli, ki byrthih bad ki sher syngkai ki bun haduh katta katta .
Katei ka tymen ka la ngam ban ton bad ka la kam kham sha pdeng bad hamar ba ka poi ha pdeng ka la ngam kynsan jlang shapoh. La ong ruh ba ka la pyrshang ban kynthih hynrei kam lah namar kit dob ki la rben palat bad kam lah ban kad kumta ka la ïap jyllop noh hangta hapoh um.
La ong ruh ba haduh ka por janmiet katei ka tymmen kam shym la wan phai ïng bad hadien ba ki la kylli pyrthew la don kiba ïathuh ba ki ïohi ba ka leit tong doh thli na katei ka jaka.
Kumta ki la pynlong ka jingleit wad bad ki la leit pom da ki siej kiba jrong bha bad hadien ka jingwad kaba la neh bun sngi la lap ba ka Rapi ka la ïap jyllop ha katei ka jaka bad haduh mynta mynne la khot kyrteng ïa katei ka jaka ka law rapi.
Ka jingjylliew jong katei ka ktieh shrah ha katei ka jaka ka dang shu dam noh tang tang kumba katto katne snem, da kaba ki nongshong shnong kiba don pynthor kba ha shilynter katei ka jaka ki pyntuid khyndewman la u snem, ryngkat ka jing pyntyllun da ki maw bah eh bad ba rit hynrei ki dak ki shin ki dang sah haduh mynta.
