Ka Saiñpyrthei ha Meghalaya ka dei kaba hiar pateng ym kumba kynthoh u Modi: Dr. Ampareen

Shillong, Rymphang 25: Ka nongaiktien jong ka National People’s Party (NPP) ka Dr Mazel Ampareen Lyngdoh ka la ong ba ka Jylla Meghalaya ka long kaba donbok ba ka la pynmih hi ïa ki briew ban don bynta ha ka saiñpyrthei kiba hiar pateng na la ki kmie ki kpa jongki bad ka jingkynnoh bad kynthoh u Myntri Rangbahduh ka ri, u Narendra Modi kam don nongrim hano hangno ruh.
Kane ka jingkren jong ka Kong Ampareen ka long halor ka jingkynthoh jong u Myntri Rangbahduh ha ka por ba u wan ïalap election ha Khyndai Lad, Shillong. “Ka Meghalaya ka long kaba donbok ba ka lah ban pynmih ïa ki rangbah bad ki longkmie ban long ki nongïalam ha ka saiñ hima sima, bad ka jingmih ki nongïalam na kajuh ka longïing kadei kaba ym lah ban len bad ka long kaba shisha ha kane ka jylla jongngi,” la ong ka nongïalam ka NPP halor ka jingkren u Modi ïa ki nongialam na kajuh ka longïing.
Katkum ka jingong jong ka MLA bad Myntri barim, ka long ka rukom ba ki longïing, la kadei ha ka kam sainpyrthei, kam khaïi ne kiwei ki kam ba ki trei ka ju don ka jinghiar pateng, kaba ong kum u kpa kumta ki khun, bad kane kam dei kaba phylla. “Ban pynsngewthuh bakla ïa kane ka rukom long ka long kaei kaei ka bym sngewïahap,” ka la ong shuh shuh.Lah ban kdew ba u Modi ha ka jingkren ïalap election ka jongu ha Shillong, u la ong ba ka sainpyrthei tang na kawei ka longïing ka la pynsniewdur ïa ka Jylla ha kine ki khyndiat snem ba la dep.