Shillong, Rymphang, 25: Khnang ban wanrah ïa ka elekshon kaba khuid ba suba ha Meghalaya, ka Election Commission of India ka la hukum ban khang shwa ïa ka khappud Indo-Bangladesh tad haduh ka 2 tarik u Lber, la pyntip u Chief Electoral Officer ka Jylla u Bah F.R Kharkongor ha ka sngi Thohdieng.
Ka ECI ka la hukum ruh ba khang ïa ka jingïamih ïarung bad ka khappud Assam tad haduh ka 2 tarik, Lber, u la ong.
Ka jingjied ïa ki 60 ngut ki Nongmihkhmat ba thymmai sha ka Iingdorbar Thawaiñ ka jylla kan sa long ha ka 27 tarik Rymphang, bad ka jingñiew ïa ki vote kan long ha ka 2 tarik, Lber.
“Baroh ki distrik kiba don ïa ki khappud bad ka Bangladesh la bthah ba kin khang bad ban pyrkhing ïa ka rung ka mih jong ki briew,” ong u Bah Kharkongor.
Ka jingpynlong ïa ki iew khappud (border haats) la pynkynriah tad haduh ban da kut ka elekshon.
“Lada shu ailad ïa ki briew hapdeng kine ki ar tylli ki ri ban ïarung ïa mih katba mon, ka lah ban don ka jingktah ïa ka shongsuk shongsaiñ kaba lah ban buh jingma ïa ka jingim jong ki paidbah bad kaba lah ban pynthung ïa ka shongsuk shongsaiñ,” ong shuh shuh u CEO.
