Shillong, Rymphang, 25: Ki Pulit jong ka nongbah ha ka sngi Saitjaiñ ki la weng lut ïa ki poster ba la wah bad teh ha baroh kawei ka surok ha nongbah Shillong tang shu shu kut ki kynta ïalap elekshon, kata, shwa ka 48 tarik ban poi ka sngi thep vote ha ka 27 tarik u Rymphang.
Ka jingweng lut ïa kine ki poster ba la teh ha kylleng ki jaka ka long ban ailad ïa ki paidbah ba kin khan kin bishar hi da lade hadien ba ki la ïohsngew bad sakhi lut ïa ki jingpynshai jong ki kyrtong ïakhun elekshon jon gki seng saiñ pyrthei ha kane ka jylla.
Ki District Magistrate jong ki District ha ka jylla ki la pynjari da ka jingpynbna paidbah hadien ba la pyntreikam ïa ka Model Code of Conduct (MCC) bad kiwei pat ki jingbthah jong ka Election Commission ha baroh kawei ka jylla ba ki kynta jong ka jingjarjar (Silence Period) kin long na ka bynta 48 kynta hashwa ban kut ka jingïathep vote kaba mut ba kane ka kynta jong ka jingjarjar kan sdang naduh ka 4 baje janmiet jong ka 25 tarik, Rymphang, 2023 ha kaba la khang ïa baroh ki jingïalang paidbah bad ki jingpyndonkam ïa ki kor pynsawa, ban sam ïa ki kot lyngkdop bad kiwei kiwei, ban wah ïa ki lama bad ki jingthoh bad kiwei kiwei hapoh 200 mitar jong ki Polling Booth bad ka jingbuh shipor ïa ki ophis treikam jong ki seng saiñpyrthei hapoh ka jingjngai kaba 200 mitar na Polling Booth.
La khang ruh ban rah ïa ki suloi bad kiwei pat ki tiar pynmynsaw bad ban kiar na kaba pynmih kino kino ki jingjia kum ban pyntieng ne pynbor ïa ki nongthep vote bad ïa ki paidbah kumjuh.
La khang ruh na kaba ïalum briew palat ïa san ngut shaneng ha kawei ka jaka.
