Shillong, Rymphang 25 : U National President jong ka NPP u Conrad K Sangma ha ka Sngi Thohdieng, u la ong ba ka party ka jong u kan nym.pdiang ïa ki MLA bad MDC kiba kren pynthohbria ïa ka party bad kiba ïaleh pyrshah ïa ka jingkwah jong ki bor badei peit jong ka party.
U la ong ïa kane ha ka sngi ba pynlong ïa ka rally ha Borogobal, Raksamgre ban ïalap na ka bynta u Limison D. Sangma uba dei u kyrtong na Raksamgre constituency.
U Conrad Sangma u la ong ba kiwei ki party ki pynlong jinglehkai ïa ka B. Mahal issue bad ka jingkren jong ki kam long kaba dei bad ka sorkar ka khlem die ïa ka jaka jong ka B-Mahal.
“Ngim don jingmut ban pynduh pyndam hynrei ngin ïatrei ryngkat na ka bynta ki paidbah ki shong ba sah ha B-Mahal,” u la ong.
Da kaba pyntip ruh halor ka issue kaba ïadei bad ka district council bad ki myntri, u la ong, “Ha kata ka por ba u MLA barim jong phi, u Benedict Marak, u khlem sngap ïa ka district court bad ïa ki myntri. U la leh katba u sngewmon bad u la kurup ïa ki katto katne ki jaka jong ka B-Mahal da kaba pynmih da ki aiñ. Bad ynda nga la ïoh jingtip, ngam lah ban pdiang ïa ka”.
U la ong ba ki paidbah na kane ka jaka ki la ai ka jingshaniah sha u ba un long u MLA bad MDC na ka bynta 5 snem, bad u la phah ïa ki MDC ban pynlong ïa u kum u CEM, bad don ruh ki khep ba u leh katba u kwah.
“Shuwa ba ngin wan ha ka bor, katto katne ngut ki briew ki la ïohpdiang ïa ki shithi byrngem, bad ha kine ki 5 snem kam shym don eiei ha Garo Hills bad ha ka jylla ruh baroh kawei ka la shongsuk bad ka long kaba jai jai”, ong u Conrad.
