Nga shaniah ha ka jingstad ki paid ka Constituency ban bishar: Dr Aman

Shillong, Rymphang 25 : U kyrtong ka UDP na Shillong North Constituency, U Dr. Aman War ha ka Sngi Saitjaiñ u la ong ba bun ki jingkynthoh pyrshah ïa u, u la dep ban pynshai kumta mynta u shaniah ha ka jingstad jong ki paidbah ka constituency ba kin bishar bad shim ïa ka rai ha ka 27tarik kaba dei ka sngi thep vote.
“Ïa kito ki jingkynthoh ïanga, nga la dep pynshai lut, hynrei lada ki ïai ban shi ïai ban ïa kajuh, mynta ngam ong ei ei shuh ai ba ki paidbah nongshong shnong ka Shillong North kin bishar bad ai ïa ka rai namar ki paidbah ki long kiba stad bad kin ym shah ïalam bakla ha kita ki riew shim kabu ban shu ïai kynnoh ïa kajuh shi kajuh,” u la ong.
Nalorkata, u la ong ruh ba ki paidbah kin hap ban ïakhun ïa ka jingpait jingpra bad ïa ka jingsngewïapher bad ba kum ka seng riewlum kaba la ïoh ïa ka jingshaniah ha kylleng ka constituency u ngeit skhem ba yn poi beit sha ka thong. “ Nga ngeit skhem kumba ki paidbah ki shaniah ha ka party kin shaniah ruh ïa nga bad kin ai ka jingkyrshan kaba pura khnang ba ngin ïoh iatrei lang na ka bynta ban pynphuh pynphieng bad pynphyrnai shuh shuh ïa ka constituency. Kynmaw ba ka jingjop kam dei ka jong nga hynrei ka dei ka jong ki paidbah ka constituency” ong u Dr Aman.
Shuh shuh u la ong ruh ba kum ka party ki la trei shitom baroh shi katta kumta ki kwah ban ïohi ba kin ïoh ban kheit ïa u soh ynda la dei ka sngi.
Lah ban kdew hangne ba nalor u kyrtong ka UDP, ka Shillong North ka la don bun bha ki kyrtong kynthup naduh ka Voice of the People Party (VPP), National Peoples’ Party (NPP), Bharatiya Janata Party (BJP), ka KAM, kyrtong shimet, Congress bad ruh na ka Trinamool Congress.