Nongstoiñ, Ïaïong 30:U phan u dei u mar rep uba baroh ki nong shong shnong ki pyndon kam ban shet jyntah ym tang ha ki ïng ki sem hynrei ha ki dukan bam ha ïew hat bad kiwei kiwei.
Ha ki por mynshuwa la ju bna nam ba u phan na ri Khasi u dei uba bang tam bad ka kam rep phan ka dei kawei na ki kam rep ba ki paitbah nong shnong shnong ki ïabeh bad ki da trei shitom haduh katta katta. Kat kum ka jingïathuh khana jong ki riew tymmen la ong ba ïa u phan ha ri Khasi la wan rah symbai da u sahep David Scott bad haba u la wan rah ïa u phan u la hikai ïa ki paitbah Khasi kumno ban thung ïa u phan ha ki pynthor kba.
Ki riew tymmen ki ïathuh ruh ba ha ki por mynshuwa hadien ba ki la de plum ïa u kba na ki pynthor ki ki sdang sa ban rep phan bad haba ki la khlong ïa u phan ki pynpoi sha ki nongkhaï ha Shilong ha kaba ki la ïathuh ruh ba ha ka por jong ki lada ka ïw ka biang ïa u phan u ba ba duh ki nongkhaï ha Shillong ki ju thied ha ka dor ar tyngka sanphew pisa shi kilo bad ka bai kali na Nongstoiñ sha Shillong ka long ar tyngka shi byrni heh.
Nalor kata ki la ïathuh ruh ba ki don ki long ïng kiba khlaiñ bha ban rep ki lah ban ïoh san spah haduh hynriew spah byrni.La ong ruh ba ha ki por mynshuwa ki nongrep kim pat ju pyndon kam ïa ki dawai sboh kum u urea, DAP, bad kiwei kiwei hynrei ka sboh ba ski pyndon kam ka dei tang ka eit masi.La ong ruh ba wat kito ki long ïing ki bym don masi ruh ki ïoh pahuh bha ka eit masi namar naduh dang step phyrngap ki la mih na ïing ryngkat ki khoh ban leit tam eit masi na ki jaka sharai masi ha lum bad naduh u bnai Nohprah haduh u bnai Kyllalyngkot ki dei ki bnai ba ki bun kam bha namar mynstep ki leit tam eit masi na lum mynsgi pat ha lyngkha.
Haba phai pat ha ine ki sngi ba mynta naduh ba ki surok bad ki lynti synkien ki la biang ki briew ki la sdang ban kiew ha ka ïoh ka kot, ka spah ka phew bad ki la kham shem phang bha ha ka khaï ka pateng ba kiwei pat kiba nabar ka jylla baroh ki jait mar bam naduh u khaw, u phan, dohkha, bad wat ki jhur ki jehp ruh la jyllei da kiba wan na shabar.
Ym lah ban len ïa ka jingshisha ba lada ïaid ha kylleng ki bynta jong ka West Khasi hills bad wat ha kiwei kiwei pat ki district hapoh ka jylla ka rep ka riang ka la nag hiar kat nang mih ki sngi. Ban peit ïa ka rep phan lei lei ki don satng ha ki katto katne ki bynta ba ki pynthor ki dang jyrngam da u phan kata ruh ha ki shnong kiba kham kyndong hynrei ha ki shnong kiba la kham long sor lei lei wat tang ka jaka ban rep ruh ym don shuh.
Ha man la ki jaka la dap lut da ki ïng ki sem, wat la ki dei ki jaka ba sharing katno katno ruh dap da ki jingtei suda.Haba pynkynmaw ïa ki long shuwa bad ka mynnor jong ki ha kane ka pateng ba mynta ka long tang kum ka jingphohsniew ramia aïu re hynrei ka don kam ban pynkynma wkhnag ba ki khun ki kti ha kine ki sngi kin sngewthuh haduh katno ki long shuwa ki trei shitom na ka bynta ka jingmyntoi jong ka pateng ban wan.
