148.50 lakh mang ban buh ïa ki STEM Labs ha 27 tylli ki skul sorkar ha Ri-Bhoi
Soi MoA ka bor district bad ka NTPC Bongaigaon
Nongpoh, Ïaiong 30: Ka bor district jong ka Ri-Bhoi District bad ka National Thermal Power Corporation Limited, Bongaigaon mynta ka sngi kila ïasoi da ka Memorandum of Agreement (MoA) ha kamra treikam u Deputy Commissioner ka Ri-Bhoi District naka bynta ban pyntreikam ïaka projek ban buh ïaki STEM Labs ha 27 tylli ki skul sorkar bapher bapher ha Ri-Bhoi District.
Ïa katei ka project la mang pisa haduh T.148.50 lakh lyngba ka skhim CSR, da ka jingthmu ban kyntiew ïa ka jingnang jingstad jong ki samla pule ha ka bynta jong ka Science, Technology, Engineering bad Mathematics (STEM) khamtam haki kyrdan Secondary bad Higher Secondary.
Ha katei ka sngi la soi ruh ïaka MoA da u Abhilash Baranwal Deputy Commissioner ka Ri-Bhoi lem bad ki nongmihkhmat ka NTPC, Bongaigaon ba kynthup ïa u Amit Kumar Asthana Head of HR, NTPC Bongaigaon, Assam, Madhurjya Singha lahkar DGM HR, Smriti Das Executive CSR.
Haba kren sha ki lad pathai khubor naka liang u Abhilash Baranwal Deputy Commissioner ka Ri-Bhoi District u la ong ba ka Ri-Bhoi District kaba dei ruh ka Aspirational District haka jylla, bun naki kompani kim ju kyntaid ban ïarap khamtam lyngba ki skhim CSR bad naka liang ka bor district kala ai khublei kyrpang ïaka NTPC, Bongaigaon kaba la pdiang ïaka jingkyrpad ka bor district ban buh kumba 55 tylli ki STEM lab haki skul bapher bapher ha Ri-Bhoi hynrei haka wat ba nyngkong kala pdiang ban leh shuwa kumba 27 tylli ki skul bad kaba sah nangta kan dei haka wat ba ar.
Ïa kitei ki skul la jied lyngba ka jingdon ki jingtei ba biang, katkum ka jingbun ki khynnah pule bad kala don ruh ka jingbthah da ka NTPC ba kine ki skul ki dei ban long ki skul sorkar ne ki skul kiba bei pisa da ka sorkar kaba la thmu ban pyndep hapoh 6 bnai ban pynshlur ïaki khynnah ba kin jied ban pyntbit ïalade haka sobjek Science bad Mathematics naka bynta ka lawei jong ki, namar bun ki khynnah khamtam na Ri-Bhoi ki duna ha kine ki sobjek bad lyngba kane kan ïarap shibun ïaki khynnah ban ioh ka jinghikai ban kyntiew ïaka bor pyrkhat jong ki.