..ka por ka la poi ba ka jingïoh kyrdan na ka jingpule ha ki college ka la dei tang na ka bynta ki katto katne ki khynnah, ym shuh na ka bynta baroh.
Ka dei ka jingkwah jong baroh ki kmie ki kpa ba ki khun jong ki kin pule haduh ka kyrdan Degree lane Graduate ha ki college. Ki da khmih lynti ruh ba ki khun kin pass bha bad kin ïoh kam ïoh jam katkum ka kyrdan pule kaba ki pyndep. Ki kmie ki kpa naduh ki ba trei kam sorkar, haduh ki nongrep, ki nongbylla sngi , ki nongtrei kam lajong bad kiwei de ki trei shitom kumno ban pyndap ïa ka ing ka sem bad ban kyrshan ïa ki khun ban phah pule ha ki college ha kylleng ka jylla bad shabar ruh.
Ha ki snem ba mynshwa ïa ka Shillong la ju tip kum ka ‘Educational Hub jong ka Northeast India’ lane kata ka ‘Jaka Pdeng jong ka Pule Puthi ha ka thaiñ shatei lam mihngi jong ka India.’ Kane kam dei eh tang na ka daw ba ki don bun ki skul bad college ha Shillong hynrei ka dei ka jingpaka ka rukom hikai bad jingshah hikai (quality education) kaba ki khynnah ki ïoh na kine ki jaka pule. Kumba long ki skul, ka jingmih ki college ba pynïaid da ki riewshimet ne kynhun ka la wanrah shibun ka jingkyrshan ïa ka pule puthi ha ka jylla. Ngim lah ban len ba lymda dei na kine, kan shitom shikatdei eh ïa ki khynnah ba kwah ban pule ba kin shaniah tang ha ki college sorkar. Kane ka paw pat ba ka sorkar hi ka khlem lah ban kyntiew ïa ka jingpule ba shalor (higher education) namar haduh mynta, na ki 74 tylli ki college ba don ha ka jylla, tang 6 tylli ki dei ki college sorkar.
Katei ka nam ‘Educational Hub’ ka la neh bun snem hynrei kaba sngewsih mynta ka long ba kane ka kyrdan ka la jan duh noh namar ki daw kiba bun kiba tan arsut ïa ka Higher Education ha ka jylla. Ha ka jingwad bniah shaphang ka kyrdan ki college ha ka ri India lyngba ka National Institutional Ranking Framework (NIRF) ba mynta u snem, ngi la ïohi ba ym shym la don kawei ruh na ki college kiba don ha Meghalaya ki ban kot sha ka kyrdan ba sha khmat. La ïohi ba na ki 300 tylli ki college ba tbit tam ha India, ka Pachhcunga University College ha Mizroam ka la ïoh bat ïa ka kyrdan ba 35, ka Patkai College Nagaland hapdeng 101-150, katba na Meghalaya kaba wan sha khmat ka dei tang ka St. Anthony’s College kaba la ïoh ka kyrdan hapdeng 201 bad 300. Katba haba ngi peit ïa ka jingai kyrdan katkum ka National Assessment and Accreditation Council (NAAC), dei tang ka Shillong College bad ka Synod College kiba la ïoh ïa ka kyrdan A+ katba kiba bun kiwei ki la ïoh tang A, B+ bad B. Kiei ki daw ki ba pynlong ïa ki college ha ka jylla ba kim lah satia ban kot sha ki kyrdan ba kham shaneng?
Lada ngi ïa nujor bad ki snem ba la leit ngi lap ba ki khynnah ki kham trei shitom ha ka por ba dang pynïaid ïa ka Annual System ha ki college. Kane ka dei naduh ka rukom hikai ba janai ba ki ïoh ha ki klas, ka jinglah ban pyndep ïa ki Assignment bad ki Test ha ka rukom kaba dei bad ka rukom set jingkylli ha ka Examination kaba tynjuh ïa ka jinglah jong ki khynnah. Hynrei naduh 2015 ba la pynïaid da ka Semester System ha kaba ki khynnah ki pule hi 3 snem ïa ka Degree (kaba mut 6 semesters) kaba ngi la ïohi ïa ka jingktah ïa ki khynnah, namar ïa kajuh ka course ba hikai ha ka Annual kaba shim por la kumno kumno 7-8 bnai, ha ka semester hap pyndep jubor tang hapoh 3 bnai. Ki nonghikai ruh ki la shu hikai kat kaba ki lah bad bunsien la shu khoh reh tang ban pyndep ïa ka course ba la ai ha ka syllabus. Ha kane ka system ki khynnah kim shah bat klas shuh hynrei ki lah ban kiew naduh ka semester 1 haduh 6 wat lada ki fail hapdeng ruh, kaba pynlong ïa ki khynnah ba kin buhteng bad lehmon da kaba khein sting haduh katta katta. Katba ha ka Annual pat tang fail ha kawei ka klas kin hap sdang biang na ba sdang bad kane ka pynlong ïa ki khynnah ba kin durut bad minot tyngeh ban pass. Dei na kane ruh ka daw ba ha ki snem shwa ka Covid-19 pandemic, ka jingdon jong ki khynnah kiba Repeat ïa ki Subject ha ki examination bapher bapher ka la kiew haduh katta katta. Na ka daw jong ka online examination ki khynnah ki bym dei hok ban pass ki la pass bha ha u snem 2020 bad 2021.
Nalorkata ka jingailad ïa ki khynnah ban don ïa ka internal assessment kaba mut 25 ki ïoh na ka Assignment bad Test ha college katba 75 ki thoh pat ha ka Final ka la pynsuk shibun eh ïa ki khynnah haduh ba ki la shim sting shikatdei eh. Nalorkata ha ka final ki hap ban thoh sa tang ïa ki Descriptive Answers ym shuh kum ha ka Annual System ha kaba 30 marks kin hap pynkhreh ban ïoh na ki Objective Questions. Dei hangne ba ngi lap ba ki khynnah ki la duna bha ka jingpule kot bad kim shym lah shuh ban pyndonkam ïa ka bor pyrkhat hynrei la shu pynkhreh tang ban pass. Lait na ki katto katne ki khynnah kiba leh bha, kiba bun hi ki la shu ïa pass malu mala bad hapdeng i jingtip iba rit. Kiba bun lei kim lah shuh wat tang ban thoh tikna ïa ka notes lajong ne wat ha kamra examination, hynrei ki la ‘shu pruid tang ban mih bai khulom’ kumba ki ju ong. Kaba duna ha ka Annual sytem ka long ka Accountability ne ka jingbishar ïa ka jingkitkhlieh halor ki nonghikai kiba leh sting pat ïa ka kam namar nalor ba ka por ka kylluid ba kin pyndep ïa ka course bun pat ki bym shim khia bad ieh lyngkrang ïa ki classes jong ki. Nalor ba ka Semester system ka la pynsniew dur, ka wan pat sa ka policy thymmai jong ka sorkar NDA kaba ki khot ka New Education Policy 2020 (NEP) kaba la nang pyntoin shuh shuh ïa ka pule puthi ha ki college.
Katkum ka NEP la pyntreikam ïa ka Four Years Undergraduate Program (FYUP) ha kaba ki khynnah college ki la lah ban pule haduh 4 snem lynter (kaba mut 8 semesters) bad ki lah ruh ban rung ban mih katba mon hapdeng kine ki snem. Kin ïoh ruh ki kyrdan kumne -Shi snem kin ïoh Certificate, ar snem kin ïoh Diploma, lai snem pat kin ïoh Degree bad saw snem kin ïoh ïa ka Degree with Research. Kan ym don shuh ka Arts ne Science ne Commerce stream bad ki khynnah ki lah ban shim major subject ryngkat bad kiwei ki subject na kino kino ki course kiba don ha kata ka college ba ki pule. Ki lah ruh ban leit pule ar jait ki course na ki artylli ki university ha ka juh ka por bad ki lah ban bujli college ne subject ha kano kano ka por. Ka jingphiah ïa ki marks ruh ka la nang kham pynsuk shuh shuh ïa ki khynnah bad ka rukom bishar ïa ki jubab (evaluation) ruh ka la pher bak ly bak na ki course kiba rim
Kane ka jingai laitlan ïa ki khynnah khlem da don u pud ka la pynlong ïa ki khynnah ba kin tip malu mala ïa ki subject bad kim lah ban ngam jylliew wat tang khyndiat ruh namar ka syllabus ruh kaba ïar katba ka por ban hikai pat ka long kaba lyngkot. Ha ka FYUP la wanrah shibun ki subject bad ki papers kiba thymmai hynrei ka jingdon ki nonghikai ka neh kumjuh bad kane ka la ban khia haduh katta katta ïa ki namar ki nonghikai college ym dei ba ki shu hikai beit tang ha kamra klas hynrei ki don bun ki kam ba la bynshet ha ki lyngba ki committee bapher bapher. Nalor kiwei de ki subject kiba thymmai, la khmih lynti ruh ba ki nonghikai kin hap hikai 15 tylli ki papers kiba thymmai ym shuh kumba ju don mynshwa 8 tylli bad hap ban pyndep ïa ka syllabus ka ba tam ar shah ïa kaba mynshwa tang hapoh ka 3 bnai hi. Ki don ruh ki subject ba ym don nonghikai ba lah ban hikai, hynrei la hap shu hikai jubor namar ba hap kohnguh bad pyndep ïa ka jingbthah na University. Kumta la lap ba ki nonghikai kim banse ban shu hikai malu mala tang ban pyndep jubor ïa ka course bad ha kaba khatduh ki khynnah kim nang ne tip eiei. Ban ïa kren lei ïa kata ka jingthoh Dissertation ha ka snem kaba Saw, ka la long thamula shisha namar bun hi ki nonghikai ki bym pat dep Ph. D., kin nym lah ban hikai ne guide ïa ki khynnah ha kane ka bynta.
Ngim dei ban klet ba ka sorkar MDA ka dei kaba nyngkong ban pdiang sarong ïa ka NEP tang ban pynsngewbha ïa u Modi bad ka sorkar BJP. Nangta, ïa kane ka NEP la shu pyntreikam kyrkieh da ka NEHU khlem da pynkhreh ha ka rukom kaba dei tikna kat haduh ba ka la pynlong ïa ka MCTA ban pynjur da ka jingïakhih ban nym ïatreilang bad ka skulbah ha baroh kawei ka jylla. Hadien ba la pyntreikam ïa kane ka policy, ngi lap mynta ka la ban khia ïa ki khynnah, ki nonghikai bad kumjuh ruh ïa ki nongpynïaid college bad ka jingpule hapoh ka NEP ka la long kum ba shu pyndep rukom. Namarkata ki skulbah ha ki jylla sha thaiñ sharum jong ka Ri India ki la pynsangeh noh ïa ka bad pyntreikam pat da ka policy lajong kaba ki shna ha ka jylla jong ki.
Ka la don ka jingpynsngew ba ka jingbym biang ki syllabus jong ka NEHU ka ktah ïa ki khynnah pule college bad kim lah shuh ban ïa khun bad kiwei pat kiba shabar ka jylla. La kynnoh ba ka jingduna palat ki Papers ha ki subject bapher bapher ka buh jingeh ïa ki khynnah bad kim lah shuh ban ïakhun wat ïa ki Civil Service Examination. Hoid ngim lah ban len ba ki Papers ba ai lyngba ka curriculum jong ka NEHU ha ka Course barim ki duna palat tangba ka jingdon ki Papers ka ïahap haba ngi ïa nujor pat bad ka jingdon ki nonghikai ha ki college. Ha kane ka FYUP pat ka jingïar ka curriculum bad ka syllabus kam ïahap shuh bad ka jingdon nonghikai, hynrei ngi ïohi ba ka jingthung nonghikai ha ki college kam ïaid satia katkum ka jingdawa jong ka kam ne ka por.
Ha ka pyrthei hiran bad kyrduh kam kum mynta, ki jingsiew ba bun hapoh college ki la nang kiew katba nang mih ki snem bad lada ki facilities kim biang, ka long ka jingkhnoit bein bad jingshim kabu kaba palat liam jong ki katto katne ki college. Ki Fees ba bunjait naduh ka Admission, Tuition, Examination, Maintenance, Practical, bad kiwei kiwei ki la kiew dor shibun eh bad ki longing kiba duna ka ïoh ka kot kim don lad satia ban phah college ïa ki khun. Nalorkata, ki bun ki college kiba la shu pynleit jingmut tang ban pynbiang ïa ki jingdonkam ban ïoh Grade na ka NAAC hynrei kim pyrwa than ïa kata ka quality education kumba ki thmu. Don pat ki college kiba shu thynnian ka jingpynrung class ïa ki khynnah khlem lah shuh pat ban ai ka jinghikai kaba tikna ne kaba pura.
Don ruh napdeng kine ki college ha kiba ki nongseng ne ki nongpynïaid kim don jingsngewthuh bad jingshemphang kaba shai kumno ban pynïaid ïa ka college namarkata kim don ka jingkitkhlieh kumno ban kyntiew ne pynbha ïa ka bad don pat kiba shu kwah ban pynlong kam ïohnong ne khaii. Ka jingdon ki Principal kiba long kum ki niangkohnguh ha ka NEHU ne pynsngewbha ïa ka sorkar jylla bad ki bym don ka sur ban kren ne ban pynpaw ïa ki jingeh wat lada ki ïohi shai ïa ka jingshah ktah ki khynnah pule ka wanrah shuh shuh ïa ka jingnoh arsut ka pule puthi.
Kawei na ki daw ba kongsan eh kaba pyntroin ïa ki college ka long ka jingibein bad jingban bein jong ka NEHU ïa ki college kiba pynïasoh bad ka. Ïa kane la sakhi haba long ki committee kiba dei ban rai ïa ka ïap ka im jong ki khynnah kum ka Academic Council ha kaba bunsien ïa ki mat ba ïadei bad ki khynnah college la shu kren tang ban dep. Wat ha ka por ba shna ïa ki syllabus ruh bunsien hi ka rai ka wan na ki nonghikai NEHU ki bym shym hikai ïa ki khynnah college bad kane ruh ka buh jingeh haduh kata kata khamtam lada kine ki nonghikai kim sgngewthuh hynrei ki khmih lynti ba ki nonghikai college kin trei kum ki shakri jong ki. Ngim dei ban klet ba ka jingpynjlan jong ka NEHU ïa ki result bapher bapher ka dei ban don ka daw ha lyndet bad ym tang katta, ngi ju lap ruh bunsien ïa ka jingthurmur ha ka rukom pynmih result kaba long ka jingilehraiñ bad buh jingeh ïa ki khynnah.
Hoid ki don katto katne ki jingbha ha ka NEP tangba ka jingpyntreikam jubor ïa kane ka policy khlem da sngewthuh ïa ki jingeh kiba bunjait kiba ngin sa ïohi ha kine ki snem ban wan. Ka Sorkar jylla ka ju mlien ban rai kyrkieh bad hadien katto katne ka thet kti noh, katba ka NEHU pat ka ïaid beit ha la ka jong ka mon bad ym don ba sngap ïa ka jingeh jong ki khynnah pule ne nonghikai ne nongpynïaid college. Na kine ki policy kiba la wanrah khamtam ka NEP la ithuh lypa ba ka por ka la poi ba ka jingïoh kyrdan na ka jingpule ha ki college ka la dei tang na ka bynta ki katto katne ki khynnah, ym shuh na ka bynta baroh. Bad ka por kam slem shuh ba lada ngi ïai bud bad pyntreikam ïa kine ki policy, wat ki kyrdan ba ïoh ruh kin nym don dor shuh hynrei kin pynkha roi pynban tang ïa ki samla khlem kam khlem jam. Lano ngin lah ban wanrah biang ïa ka nam bad ka burom jong ka jylla ha kaba ki khynnah kin ïoh ka jingpule kaba biang ba tikna? ka dei ka jingkylli ba bun ki buh mynta. Ban ïatai lut hangne ym lah bad tang katne kam pat biang, ngin dang ïa bteng shuh shuh ha ki sngi ban wan.
