Jowai, Nohprah 05: Kumba ju long shisien shisnem ka Proseshon Iukharist ka Parish Jowai mynta u snem kan long ha ka 8 tarik, Nohprah, 2024 ha madan skul Marian Hill Higher Secondary School, Jowai. Naduh ba la ïoh ïa ka Diocese Jowai, ka Parish Jowai ka dei ka Balang Kmie jong ka Diocese, namarba ka ïingmanebah jong ka Diocese kaba dang don ha ka jingpyntrei ban shna pyndep ha Jowai.
Ka jingpynkhreh na ka bynta kane ka Proseshon Iukharist ka la ïaid shait shait ban pynitynnad ïa ki sawdong sawkun jong ka madan jinglehñiam, kumjuh ha ka jingpynkhreh ha ka kam mynsiem (Triduum) kan sdang lai sngi naduh ka 5, 6, 7 tarik haka por 5:30 janmiet jong ka sngi saitjaiñ kan don ka Sacrament Jingpynskhem.
Ha ka 8.12.2024 kaba dei ka sngi u Trai ha ka por 6:30 baje mynstep kan don ka jingkñia Mass Bakhuid hapoh ka Shrine jong ka St. Theresa kaba dei ka ïingmane Parish katba ha ka por 10:00 baje mynstep ka jingkñia Mass ka ban lamkhmat da u Most Rev. Ferdinand Dkhar, D.D Bishop ka Jowai Diocese un long u nongkñia rangbah ryngkat ka jingsynran lang da ki Lyngdoh Sohblei jong ka Diocese bad nabar bad nang pynphuh pynphieng shuh ïa kane ka jingkñia Mass Iukharish da ki khynnah ki ban pdiang ïa ka Kommunion kaba nyngkong ha ka jingim jong ki.
Ha ka por 1:30 baje noh sngi sngi yn don ka jingïaid Proseshon ha ryngkat ka Sakrament Bakhuidtam ka Duwan, ka Sakrament kaba u Jisu u shongrieh ïalade ha ka dur jong u kpu uba la pynkyntang ban kyrkhu ïa ki paidbah bad yn pynkut ïa ka jingïaid Proseshon ha madan skul Marian Hills Higher Secondary School.
Ki paidriewngeit ka Parish Jowai ka khot ka wer ïa ki paidriewngeit na ka Jyllaniambah Shillong bad Jyllaniam Nongstoin ban wan shim bynta ha kane ka Proceshon.
