120 tylli ki stalls kiba wan ban pyninam ha ka ‘Buyer Seller meet’ kaba lai sngi ha Jowai

Jowai, Nohprah, 05: Ka ophis jong u Deputy Commissioner, West Jaiñtia Hill ha ryngkat ka jingtreilang bad ki tnad sorkar bapher bapher jong ka District kila pynlong ïa ka ïew pyninam bah eh ïa ki mar ki mata jong ki nongrep ne ka ‘Buyer Seller meet’ kaba lai sngi lynter, ïa kaba la sdang mynta ka sngi 5 tarik u Nohprah bad yn pynkut haka 7 tarik u Nohprah, 2024 ha madan Jrisaleiñ, Jowai.
Ha kane ka sngi sdang u MLA ka thaiñ uba dei ruh u Chairman ka MUDA ma Wailadmiki Shylla ula long kum u kongsan, haba ai jingkren ula khot ïa ki nongrep na ki kynhun treimon sngewbha ban long kiba shemphang kumno ban pynkiew ïa ka ïah ka kot jong ki haka kam rep kam riang, ula ong ruh lyngba kane ka Buyer Seller meet kan ïarap ïa ki khun samla ba kin shim ïa ki lad ki lynti kumno ban seng ïa ki kam la jong.
Ha ka juh ka por u kyntu ïa ki samla ba kin shim kabu ïa ki lad jingïarap jong ka sorkar lyngba ki skim bapher bapher, khnang ba kin lah ban seng ïa ka kam la jong, da kaba pynkymmaw ba ka sorkar kala plie ki lad ki lynti ha ki laiñ bapher bapher ïa ki khun samla ban seng ïa ki kam.
Na ka liang u Deputy Commissioner bah B.S Sohliya, IAS, haka jingkren ula ong kane ka buyer-seller meet ka don ka jingthmu ban ïarap ïa ki nongrep ha kylleng ka District bad ruh ba kin ïoh jingtip khambun ban ïa phylliew jingmut hapdeng para ma ki. Ula kyntu ba donkam ban ïadei bad ka mariang kata ban pyndonkam da ki kynja pla muna haka jaka ki pla plastis.
U bah F. B Basan, Additional Deputy Commissioner and Project Director, DRDA, Jowai ula pynsngew ha kine ki lai sngi kan sa long shisha ka kabu ïa ki nongrep bad ki Self-Help Groups (SHGs) ba kin ïoh lah ban pyni nam ïa ki mar ki mata bad ban die ïa ki. Shuh shuh ula ong lyngba kane ka rynsan kan ïarap ruh ïa ki khun samla ban pynpaw pyrthei ïa ki sap ki phong jong ki lyngba ki jingrwai, ki jingshad tynrai bad ka fashion show, khnang ban pynpaw pyrthei ïa ka jingriewspah ka jylla haka riti ka dustur.
Ha kane ka sngi la wanrah shibun ki mar ki mata ba bun jait da ki nongrep ka District naduh ki jhur, ki soh, ki jingthaiñ, ki jingshna kti, ki jaiñ, ki umngap, ki jingbam tynrai bad kiwie kiwei de, ha kaba la don haduh 120 tylli ki stalls pyninam.
La sam ruh ïa ki Certificates bad ki tiar donkam sha ki nongshah hikai kiba la pyndep ïa ka training hapoh ka MSSDS (Meghalaya State Skill Development Society).