Ha kine ki sngi la iohi ba ka kam politik ka kylla long kawei na ki kam khaii kaba heh tam ha kaba ki heh spah kim lah ban lait na ka jingpynshoi ban ai ai reng ne ban bei pisa na ka bynta kiwei pat ki kyrtong. La iohi ba bun ki heh spah ki la kylla long ki MLA/MDC bad ki la ia theh tyngka laki laka na ka bynta ban ioh ia ka mon jongki paidbah ban jied ia ki ne ia ki kyrtong jong ki. Kane baroh hato kam dei ka jingthrang bor, ym lah lait hi jan baroh ngi ia thrang ia ka bor hynrei hato ym don mo u pud ia kiei kiei baroh. Ha kane ka Elekshon 2013 ki paidbah kin sa iohi shibun ki tamasa jong ki riew thrangbor kiba ban ia aireng. Kam long kaba bakla ban jop ne shah jied ban long ki nongmihkhmat paidbah, hynrei kaba sngewsih ka long ba ki don napdeng jong kiba kum kitei kiba ym salia wat ban pyndonkam bakla ia kata ka bor kaba ki paidbah ki ai ia ki, khamtam lei haba don kiba shu niew ba ka bor kaba ki ioh ka dei kaei kaei kaba ki la shu thied rem da ka dor jong ka pisa. Kane ka Politik hakhmat ki nongkhaii shano kein kan ialam ia ka jylla bad ia ka ri hi baroh kawei?
Ka Politik hakhmat jong kiba bun ki riew paidbah ka dei tang kawei na ki kam kaba kim da niew than eh ba ka long kaba donkam, hynrei ym lah pat ban len ba ka dei kaba donkam tam namar ba ka dei kaba peit ia ka kam synshar khadar. Ka politk ka ioh jaka ha ka synshar khadar dei lyngba ki ain kiba la thaw lyngba jong ka. Ki ong ba ka politik ka dei ka bor kaba lah ban pynlong ia kiwei pat ban leh ia kaei kaba ki i donkam ba dei ban leh. Ha ki snem kiba la leit noh la iohi ba bun ki briew kiba la iadon bynta ha kane ka kam politik ki dei hi ki riew paidbah kiba bun na ki, ki shu kylla long ki nongmihkhmat paidbah ne ki Politician tang hadien ba ki lah ban jop ia ka Elekshon. Kham niar eh ban don kito kiba la pynkyrpang ia lade na ka bynta ka kam politik naduh ka por ba ki dang pule. La iohi ruh ba ki don ki nongmihkhmat paidbah kiba wan ka kiwei pat ki bynta jong ka jingshakri paidbah kum ki Doktors bad ki Engineers, ki Contrators, ki nongkhaii heh spah bad kiwei kiwei de bad kane ka dei na kawei ka daw kaba kongsan jong ka jingthrang bor jingthrang burom.
Kham niar ban ioh sngew na ki shyntur jong ki kmie ki kpa ba kin ong ba ki phah skul ia ki khun jong ki ba kin long Politician, hynrei kiba bun hi ki ong ba kin long heh longhain, kum ki Doktor, ki Engineer, ki IAS, IPS ,MCS, MPS, ki Bank Officers bad kumta ter ter. Ka long kaba shisha ba kum ki Officer bad ki heh sorkar ba kito ki samla ki la ioh kyrdan hadien ka jingminot jong ki ha ka jingpule ka la biang ia ki ba kin hun ia ki kam kiba ki shakri paidbah, hynrei ym lah lait ba ki don kiwei pat kiba kham ikwah da ka kam politik kaba don ia ka bor ban khyrwait shabi ia ki heh sorkar ne ki Officers. Na kiba bun ki kam shakri paidbah ba la kdew haneng kiba la ia rung bha sha ka kam politik ki dei ki doktor sumar briew namar ba ki don lypa ia ka kam shakri kaba iadei marmet bad ki paidbah bad ki kham don ka jinglah ban shah ha kaba iadei bad ki kam paidbah.
Ha kawei ka liang ka jingdon jong ki briew kiba la dep ban pule ha ki lain hapher bapher ha ka politik ka iarap hi ban tip kham bniah ia ka tynrai jong ka jingshaki. Kum ki doktor kiba jop ha ka elekshon bad shah jied Myntri ki shemphang kham bha ha kaba iadei bad ka koit ka khiah. Kane ka long ruh kumjuh ia kiwei pat. Ha ka jingshisha kat kum ka thymmei pyrkhat ka long kaba leh nohei shibun ba hadien ba la pule shitom ban long doktor ban ai ka jingshakri ia ka jingim briew tang hapdeng khyndiat por ki la brai noh ban rung politik bad hap ban iadon bynta noh ha ki kam thaw ain.Niuma lah ban ong ba lah ban shakri paidbah khambha lyngba ka kam politik ban ia ka kam sumar briew. Hynrei ym lah ban len ia ka jingshisha ba kaba trei na ka bynta ka mynsiem briew ka kham donkam shibun ban ia kaba don ha ka kam thaw ain. Bun ki kylli “kumno ba bun ki phah noh sha ka kam politik” hato ka long mo kaba biang ban jubab ba dei beit ka jingkwah brai ban ioh ia ka bor, ka spah bad ka burom!.
Ka long shisha kaba eh ban pynbeit pat ne phah pat ia kitei ki briew sha ka kam kaba ki la jied ban shakri na ka bynta ki paidbah. Hynrei lada ki pyrkhat bad puson ha lade lehse kan lah ban wanrah ia ka jingkylla bad yn lah ruh ban pynioh ia ka jingshakri kaba bha tam na ka bynta ki paidbah. Ka jingiehnoh jong ki shiteng ban shakri ia ki paidbah ka long ka jingduhnong ia ki paidbah hi. Ki paidbah khamtam lei ha ki thain nongkyndong ki la kylla long tang kum ki dohkha kiba beij shana bad haba bret shana ki la ngat beit ha ka jingriam jong ka bor jong ka pisa ha ka por elekshon. Ka jingeh ka long ba ka Politik ka long kaba laitlan palat bad kam don kano kano ka kyndon ban teh ia kiba iadon bynta ha ka, kiba duh nong dei hi ki paidbah.
