La kha ïa u Cristiano Ronaldo dos Santos Aveiro, ba ju khot ieid da ka kyrteng Cristiano Ronaldo ha ka 5 tarik,Rymphang,1985 ha Funchal, Madeira, Portugal bad u don ïa ka rynïeng ryniot kaba 6 phut 1 inshi bad u dei u player ba kynsai tam eh ka Juventus bad captain Portugal. Ha ka rta kaba 22 snem u Ronaldo u la rung ka kyrteng ban ïakhun ïa ka khusnam Ballon d’Or bad FIFA World Player of the Year. La ñiew ïa u ba u dei uwei na ki rangïalehkai ba kynsai tam ha ka history ka phutbol.U Ronaldo u la khur san sien ïa ka khusnam Ballons d’Or bad sawsien ïa ka European Golden Shoe. U la jop 29 tylli ki trophy ha ka ïalehkai phutbol ha ka jingim, kynthup hynriew tylli ki trophy ha ka ïalehkai league, kiba kynthup san sien ïa ka UEFA Champions League, kawei ka UEFA European Championship, bad kawei ka UEFA Nations League. U dei ruh u rangthepkol ba bun tam eh ha ka UEFA Champions League (128kol) UEFA European Championship (9 kol). U dei ruh napdeng ki khyndiat ngut ki rangïalehkai phutbol ban mih madan palat ïa ka 1,000sien ha ka ïalehkai professional bad thep palat 700 kol ha ka ïalehkai club bad ka ri Ha u snem 2015, u Ronaldo u la ïoh ïa ka nam best player ka Portugal kaba la pynkhamti da ka Portuguese Football Federation, ha ka jingrakhe ba 100 snem jong ka. U dei ruh u player uba nyngkong eh ban khur haduh sawsien ïa ka European Golden Shoe award.Ha ka jingmih madan ïa ka Manchester United bad Real Madrid, u Ronaldo u la pynjop 3 sien ïa ka Premier League, shisien ïa ka La Liga, shisien ïa ka FA Cup, 2 sien ïa ka Football League Cup, 2 sien ïa ka Copa del Rey, 2 sien ïa ka UEFA Champions Leagues, shisien ïa ka UEFA Super Cup bad arsien ïa ka FIFA Club World Cup. U Ronaldo u la sdang ïa ka kam ïalehkai phutbol naduh dang khynnah bad ka Andorinha, kaba u la mih madan 2 snem kynthih kata shuwa ba un leit ïasoh noh bad ka C.D. Nacional. Ha u snem 1997, u la ïasoh pat bad ka Sporting CP. Ha u snem 2003 u la ïasoh bad ka Manchester United ha ka dor £12.2 million (€15 million). Ha u snem 2004, u la jop ïa ka trophy ba nyngkong eh bad ka United, kata ïa ka FA Cup. Ha u snem 2007 bad 2008, u Ronaldo u la ïoh rah ïa ka khusnam FWA Footballer of the Year, bad shah jied kum u FIFA World Player of the Year ha u snem 2008. Ha u snem 2009 u la jop ïa ka FIFA Puskás Award for Goal of the Year. U dei ruh u player uba remdor tam ha ka por ba u mih na ka Manchester United ban ïasoh bad ka Real Madrid ha u snem 2009 ha ka dor £80 million (€94 million/$132 million). Ka buyout clause ne ka dor thied ïa u nadong shadong ka la kot €1 billion. Ha u Jymmang 2012, u la kylla long u player phutbol uba nyngkong eh ha ka history ka phutbol ban pynkhih jar ha man la ki team ba ïakhun pyrshah ha ka shi samoi ka La Liga. U Ronaldo u la bat ruh ïa ka rekod kum u nongthepbol ba bun tam eh ha ka jingïakhun ïa ka shi samoi ka UEFA Champions League, kata da 17 kol ha ka samoi 2013-14. Ha u Nohprah 2014, u Ronaldo u la kylla long ruh u nongthep kol basted tam ban kot ïa ka 200 kol ha ka La Liga bad ïa kane u la pyndep ha ki 178 tylli ki jingïakhun La Liga. U dei tang ma u marwei na ki player phutbol ha ka history ban thep kol 50 kol shaneng ha ka shi samoi kata haduh san samoi kynthih. Ha u Nailur 2015, u Ronaldo u la kylla long u rangthep kol ba bun tam eh ha ka history ka UEFA Champions League kata da 82 kol bad ha u Risaw 2015 u la kylla long u rangthep kol ba bun tam eh ha ka history ka Real Madrid.
U Ronaldo u la mih madan nyngkong eh na ka Portugal ha u Nailar 2003, ha ka rta kaba 18 snem. Haduh mynta u mih madan palat ïa ka 100 sien bad shimbynta ruh haduh 6 sien ha ki lympung ïalehkai phutbol ba pawnam ha ka pyrthei kiba kynthup 3 sien ïa ka UEFA European Championships (2004, 2008 bad 2012) bad lai sien ha ka FIFA World Cups (2006, 2010 bad 2014). U dei u player ba nyngkong eh ha ka Portugal ban thep 50 kol bad kylla long syndon u rangthep kol ba bun tam eh ka Portugal. U la thep ïa ka kol kaba nyngkong eh ïa ka Portugal ha ka Euro 2004 bad ïarap ïa ka Portugal ban rung shaduh ka phainal. U la shimti kum u kapten ha u Naitung, 2008, bad ïalam shaduh ka semi-final ïa ka Portugal ha ka Euro 2012. Ha u Naiwieng 2014, u Ronaldo u la kylla long u player ba thep bun kol tam ha ka UEFA European Championship (kynthup ka qualifying) da 23 kol. Naduh ka jinglong khynnah: Ïa u Ronaldo la kha ha Santo António, ka jaka ba marjan eh bad ka nongbah Funchal, Madeira, bad u dei u khun khatduh ka Maria Dolores dos Santos Aveiro, ka nongshet bad u José Dinis Aveiro, u nongsumar kper ka municipal. Ïa ka kyrteng “Ronaldo”, la shim na ka kyrteng u president ka US ha ki por ba leit, u Ronald Reagan, uba dei ruh u briew ba u kpa jong u, u ieid bha. U don uwei u hymmen shynrang u Hugo, bad arngut ki hymen kynthei, ka Elma bad Liliana Cátia. Ka meiieid jong u, ka Isabel da Piedade ka dei na Cape Verde. Ka longïing u Ronaldo ki dei na ka balang Khristan Catholic. U Ronaldo mynshuwa u la ïathuh hi ba u im ha ki por ba la leit hapdeng ka jingduk bad ïathiah lang ha ka juh ka kamra baroh shipara. U Ronaldo u dei uba pawnam bha para khynnah ha skul hynrei hadien u la shah beh skul noh na ka daw ba u kawang da ka shuki ïa u nonghikai jong u. Hadien kane u Ronaldo u la ong ba kane ka jingjia ka la pynhiar dor ïa ka burom jong u. Ha ka rta kaba 14 snem u la mynjur ha ryngkat ka kmie ban pylleit jingmut noh tang ha ka ïalehkai phutbol. U la ong, “Mar shu dap 14 snem, nga sngewthuh ba nga don ka sap ïalehkai. Nga mutdur ruh halade ha kane ka por ba nga la biang ban long u semi-professional ha ka ïalehkai phutbol”. Ha ka rta kaba 8 snem, u Ronaldo u la ïasoh bad ka amateur team Andorinha, ka klob kaba u kpa jong u, u dei u nongpynbiang ïa ki tiar ïalehkai. Ha u snem 1995, u Ronaldo, ha ka rta kaba 10 snem, u la ïasoh noh bad ka Nacional, bad u la ïarap ba kan rah ïa ka phainal bad dei hadien kane ba u la ïohlad ban leit pyrshang lai sngi bad ka Sporting CP, kaba khatduh ka la soi ïa u ha ka dor kaba ym shym la pynbna paidbah.
Sporting CP: U Ronaldo u la ïasoh bad ka Sporting kum u player khynnah bad ïa kilan met lang bad kiwei pat ki rangïalehkai na ka Academia Sporting, ka football academy kane ka klob kaba don ha Alcochete. U dei tang ma u na ki player ban mih madan ïa ka Sporting’s under-16, under-17, under-18, B-team, 1st team kane ka klob, tang hapoh ka shi samoi. U la thep kol nyngkong eh ha ka league ha ka 7 tarik Risaw 2002 bad ïarap ïa ka Sporting CP ban jop da 3-0 ïa ka Moreirense bad ïoh mih madan ruh ïa ka Portugal ha ka 2002 European Under-17 Championship.
Ha ka rta kaba 15 snem, u Ronaldo u la ïoh ïa ka jingpang racing heart, kaba dei ka jait jingpang kaba la jan pynduh ïalehkai phutbol ïa u. Hadien ba ki nongkitkam ka Sporting ki tip shaphang kane ka jingpang bad ka kmie u Ronaldo ka aibor ïa u ban leit phah sumar sha hospital. Hadien kane la rah noh ïa u Ronaldo sha ka jaka sumar bad la puid ïa u bad la pyllait noh tang hadien khyndiat kynta bad la sdang biang ïa ka kilan met hadien katto katne sngi. Ha u Naiwieng, 2002, u Ronaldo u la shah khot sngewbha ban wan sha ka jaka kilan met ka Arsenal ha London Colney ban ïakynduh bad u coach, u Arsène Wenger bad ki coaching staff jong u. Kumta na ka liang u Wenger, uba kwah ban soi da u rangïalehkai pdeng, u la pynbeit ïa ki nongmih khmat u Ronaldo ban pynurlong ïa kane ka jingïakynduh. Hadien kane u coach ka Liverpool ha kato ka por, u Gérard Houllier, ruh u kwah lem ban soi ïa u kynthup u president ka Barcelona ha kato ka por, u Joan Laporta. U Ronaldo ha kato ka por u angnud dik dik ban ïasoh bad ka Liverpool bad u la pynpaw ba kan dei ka jingphohsniew ban ïasoh bad kane ka klob. Hynrei hadien la wan sa u coach ka Manchester United ha kato ka por, u Sir Alex Ferguson u la shoh beij ïa u Ronaldo ha shiteng u snem 2003, ha ka por ba ka Sporting ka shah pynliem ha ka United da 3-1 ha Estádio José Alvalade ha Lisbon. Ha kane ka jingïakhun u Ronaldo u la pynshohbeij shisha ïa ki rangïalehkai ka Manchester United, bad kyntu ïau Ferguson ban soi mar mar ïa u.
Manchester United 2003-04: U Ronaldo u la kylla long ruh u player Portugal uba nyngkong eh ban ïasoh bad ka United bad u la ïasoh ha ka dor £12.24 million shuwa ka samoi ka samoi 2003-04. U Ferguson u la aiti ïa u da ka jersey 7 kaba ju phong da ki khlur ïalehkai sahnam ka United kiba kynthup ïa u George Best, Bryan Robson, Eric Cantona bad David Beckham. U Ronaldo u la mih madan nyngkong eh ïa ka United ha ka minit kaba 60 ha ka jaka u Nicky Butt ha ka jingjop kaba 4-0 ïa ka Bolton Wanderers ha ka 16 tarik Nailar bad ïoh jingïaroh na u Alex Ferguson, kum uta u player uba kham phylla tam. U la thep ïa ka kol nyngkong eh ïa ka United ha ka jingjop kaba 3-0 pyrshah ïa ka Portsmouth ha ka 1 tarik Naiwieng 2003. U Ronaldo u la thep kol ruh ha ka 2003-04 FA Cup pyrshah ïa ka Manchester bad dei ha kane ka por ba u Gary Neville (coach barim ka Valencia) u la ong ba u Ronaldo un sa dei uwei na ki player ba khrawtam ha pyrthei.
2004-06: Ha u kyllaLyngkot 2006,u Ronaldo u la ïakynad bad u Ruud van Nistelrooy kaba ïalam shaduh u pud ba une u striker barim ka United ban mih syndon na kane ka klob. Hadien kane u Ronaldo u la ïoh ïa ka Professional Footballers’ Association (PFA) Young Player of the Year award ha ryngkat u para team, u Wayne Rooney. U Ronaldo u la liem ha u Rooney ha ka jingïakhun ïa ka PFA Young Player of the Year award ha ka 23 tarik Ïaïong hynrei u la rung pat ha ka PFA Premier League Team of the Year ha ka sien nyngkong eh. 2006-07: U la khur ïa ka namlahduh kaba nyngkong eh ha ka Premier League bad khur ïa ka PFA Players’ Player of the Year bad PFA Young Player of the Year award. 2007-08: U la ïarap ïa ka Man United ban khur ïa ka namlahduh ha ka Champions League. U la wan ba-ar ha ka ïakhun ïa ka 2007 Ballon d’Or kaba la rah da u Kaka bad wan balai ha ka ïaknieh ïa ka FIFA World Player of the Year award, hadien u Kaká bad Lionel Messi.
2008-09: U la mih madan khatduh eh ïa ka Man United shuwa ba un leit ïasoh bad ka Real Madrid. Ha ka jingshisha ka United kam pat satia ban die noh ïa u Ronaldo sha ka Real. Ha ka 12 tarik Kylla Lygkot u la kylla long u player ba nyngkong eh ka Premier League player ban ïoh ïa ka FIFA World Player of the Year, bad uba ar na Portugal hadien u Luís Figo. Ha ka 11 tarik Jylliew ka Manchester United ka la pdiang ïa ka dor £80 million na ka Real Madrid. U Ronaldo u la ïoh ïa ka jingkyrkhu na u Ferguson shuwa ba un leit ïasoh noh bad ka Real Madrid bad na ka liang u Ronaldo ruh u la ai khublei kyrpang ïa u Ferguson uba la pynkiew shisha ïa u ha ka jingim ïalehkai phutbol.
Spain (2009-10): Ha ka 26 tarik Jylliew, 2009, ka Real Madrid ka la pynbna ba u Ronaldo un don lang noh bad ka klob naduh ka 1 tarik Naitung 2009 bad u la thaw ïa ka world record kum u player remdor tam kata da £80 million (€94 million). Ka kontrak u Ronaldo ka long €11 million shisnem bad ka buy-out clause ka shongdor haduh €1 billion. La pdiang burom ïa u da ki 80,000 bad 85,000 ngut ki nongkyrshan ka Real ha Santiago Bernabéu Stadium, bad tam ïa ka jingpdiang burom ka Napoli ïa u Diego Maradona (75,000) ha u snem 1984. U Ronaldo u mih madan nyngkong eh ïa ka Madrid ha ka 21 tarik Naitung pyrshah ïa ka Shamrock Rovers. U la jop arsien ïa ka Champion League bad ka Real Madrid ha ka jingiakhun pyrshah baroh arsien ïa ka Atletico Madrid. U la ïarap ïa la ka ri ka Portugal ban rah ïa ka Euro 2016 da kaba pynliem ïa ka France ha ka phainal.
Samoi 2012–13: U Ronaldo u la long u captain ka Real Madrid ha ka sien nyngkong ha ka jingjop kaba 4-3 ia ka Real Sociedad ha ka 6 tarik Kyllalyngkot. U dei ruh u rangïalehkai ba nyngkong hadien 60 snem bym dei na ri Spain ban long captain ïa ka Real Madrid ha ka ïalehkai El Clásico ha ka 30 tarik Kyllalyngkot kaba dei ruh ka sngi ba u ïalehkai club ha ka sien kaba 500. U thep ïa ka kol ba 200 ïa ka Real Madrid ha ka 8 tarik Jymmang ha ka jingjop kaba 6–2 ïa ka Málaga na ki 197 sien mih madan. U pynkut ia u snem 2013 da 69 kol na ki 58 sien mih madan bad ïohpdiang ïa ka FIFA Ballon d’Or, kaba syriem ïa ka Ballon d’Or bad FIFA World Player of the Year award kaba dei ha ka sien nyngkong ha ka jingim. U ïarap ïa ka Real Madrid ban rah ïa ka Champions League da kaba pynliem ha ka final ïa ka Atlético Madrid. U dei u rangthepkol ba bun tam ka Champions League ha kane ka samoi da 17 kol bad khur ïa ka UEFA Best Player ha Europe. Hadien kane u Ronaldo la pynjop Copa del Rey ïa ka Real Madrid da kaba pynliem ïa ka Barcelona da 2–1 ha ka final. U thep 31kol na ki 30 tylli ki jingïalehkai league bad ïohrah syndon ïa ka Pichichi bad European Golden Shoe, ha ryngkat u striker ka Liverpool ha kane ka por, u Luis Suárez. Hadien ba ïarap ïa ka Real Madrid ban rah ïa ka FIFA Club World Cup ha Morocco, bad khur ia ka FIFA Ballon d’Or ha kasien balai.
Juventus: 2018–19: Ha ka 10 tarik Naitung 2018, u Ronaldo u la ïasoh ha ka kontrak saw snem bad ka radbah ka Italy, ka Juventus ha ka dor €100 million. U Ronaldo u la ïasoh bad ka Juventus kum u rangïalehkai 30 snem ka rta uba hehdor tam bad uba heh jingsiew tam ha Italy. U Ronaldo u la phla ba ka jingmih noh na ka Real Madrid ka dei namar u shah ñiewbeiñ ha la u president, u Florentino Pérez. Ha ka 16 tarik Nailur, u Ronaldo ula thep ïa ka kol nyngkong ïa ka Juventus ha ka jingjop ïa ka Sassuolo. Ha ka 19 tarik Nailur, ha ka jingmih madan sien nyngkong ïa ka Juventus ha ka Champions League u la ïoh red card ha ka minit 29 namar ka leh palat pud ha madan. Ha u Nohprah u thep ïa ka kol ba 10 ha ka Serie A ha ka jingjop ïa ka Fiorentina bad kylla long u rangïalehkai ba nyngkong ka Juventus hadien u John Charles ha u snem 1957 ban thep 10 kol na ki 14 sien mih madan ha ka Serie A.U la khur ïa ka trophy ba nyngkong ka Juventus ha u Kyllalyngkot 2019, da kaba rah ïa ka 2018 Supercoppa Italiana bad thep ïa ka kol pynjop ha ka final pyrshah ïa ka A.C. Milan. U la pynrung shaduh ka quarterfinal ïa ka Juventus shuwa ban shahrem noh ha ka Ajax.Ha ka 20 tarik Ïaïong, u Ronaldo u la ïalam ïa ka Juventus ba kan rah ïa ka trpohy ka Serie A ha ka sien kaba phra bad kylla long u rangïalehkai ba nyngkong ban jop league ha England, Spain bad Italy. U la pynkut ïa ka Serie A kaba nyngkong da kaba thep 21 kol kynthup 8 tylliki assist bad rah ïa ka Serie A Award for Most Valuable Player.
2019–20: Ha ka 1 tarik Risaw u la kiew bun tylli ki mawmer ha ka jingim ïalehkai phutbol ha ka jingjop ka Juventus da 3–0 ïa ka Bayer Leverkusen ha ka group stage Champions League. Ka dei ka kol kaba 14 kynthih ha ka Champions League bad ia ryngkat bad ka record u Raúl bad Lional Messi bad u pynkheiñ ruh ïa ka record u Iker Casillas ha ka jingjop bun tam ha ka Champions League.. Ha ka 18 tarik Nohprah, u Ronaldo u la paw nam biang hadien bau kynthih ban sangah ïa ka bol da ka khlieh shapoh kol ha ka jingjrong kaba 8.39 phut (2.56m) bad tam ïa u diengkol ha ka jingjop ka Juventus da 2-1 ïa ka Sampdoria ha ka Serie A.U la thep ïa ka hat-trick ba nyngkong ha ka Serie A ha ka 6 tarik Kyllalyngkot 2020, ha ka jingjop kaba 4-0 ïa ka Cagliari. Kane ka dei ruh ka hat-trick ba 56 jong u ha ka jingim bad wan ba-ar hadien u Alexis Sánchez ban thep hat-trick ha ka Premier League, La Liga bad Serie A.Ha ka 22 tarik Rymphang, u Ronaldo u la thepkol 11 sien kynthih ha ka Serie A bad don lang ha ka thup u Gabriel Batistuta bad Fabio Quagliarella, bad ka dei ka sien mih madan ba 1,000 ha ka ïalehkai senior professional ha ka jingjop ba 2-1 ïa ka SPAL. Ha ka 23 Naitung, hadien ba la pynjop Euro 2016 ïa ka Portugal, ka sorkar ri jong u, ka la ai nam syndon da kaba tip noh nangne shakhmat ïa ka Madeira Airport ha nongbah Funchal kum ka Cristiano Ronaldo Airport. Shabar ka phutbol, u la ïateh kontrak bad bun ki kompani bapher bapher kum ki kompani pynmih jingdih, jaiñ, kali, financial service, electronic, bad computer video games. U la paw kyrteng ruh ha ka EA Sports’ FIFA video game FIFA 18, Pro Evolution Soccer, 2008, 2012, bad 2013.U kamai €720 million (£615 million) hapdeng u 2010 haduh 2019, bad kylla long u rangïalehkai sport uba ar na kiba riewspah tam ha pyrthei hadien u khlur ïakura boxing ka Amerika, u Floyd Mayweather, Jr. uba kamai kham bun ïa u. Ha ka Forbes u Ronaldo u la wan nyngkong arsien kum u rangïalehkai phubtbol ba hehsiew tam ha pyrthei, kynthup naduh ka tulop, bonus, bad jingsiew na ki kompani kaba kot $73 million ha ka samoi 2013–14 bad $79 million ha ka 2014–15 bad $93 million ha 2016–17.. Ka ESPN ka la ithuh ïa u Ronaldo kum u nongïalehkai sport uba pawkhmat tam ha pyrthei ha snem 2016, 2017, 2018, bad 2019. U Ronaldo u dei ruh u nongïalehkai sport uba pawnam tam ha ki social media, ha kaba u don 158 million ki nongbud ha ka Facebook, Twitter, bad Instagram haduh u Jylliew 2015. Haduh u Naitung 2019, u dei uba pawnam tam ha Facebook ha ka pyrthei da kaba don haduh 122 million ki nongbud. U dei u nongïalehkai uba hakhmat tam bad uba ar hadien ka Shakira ban don 100 million ki nongbud. U Ronaldo u la pyllait artylli ki mobile apps: ha u Nohprah 2011, bad pyllait paidbah ïa ka iPhone game kaba tip kum ka Heads Up with Cristiano, ba la shna da ka RockLive,bad ha u Nohprah 2013, u la pyllait paidbah ïa ka Viva Ronaldo, kaba dei ka social networking website bad mobile app. Ha ka 23 tarik Naitung 2016, hadien ba u ïarap ïa la ka ri, ka Portugal ban rah ïa ka Euro 2016, ia ka Madeira Airport ha Funchal la ainam noh ha ka kyrteng jongu sha ka Cristiano Ronaldo International Airport bad la tei ruh ïa u mot sahnam jong u. Ha u Rymphang 2020, ka United Arab Emirates ka la ai khusnam ïa u Ronaldo da ka golden visa hapoh ka jingïalam da ka Dubai Sports Council.
Ha ka longïing longsem: U Ronaldo u don saw ngut ki khun, kiba kynthup ïa u Cristiano Ronaldo Jr., Eva Maria, Mateo Ronaldo bad Alana Martina kaba u ïoh na ka samla mynta ka Georgina Rodríguez.U khun nyngkong u dei u Cristiano Jr., uba la kha ha ka 17 tarik Jylliew 2010 ha United States bad ïa ka kmie ym shym la pyntip paidbah haduh mynta. U Ronaldo u la ïa ieid teng haduh san snem bad ka model na Russia, ka Irina Shayk. Ula ïoh ïa ki khun synrap kynthei shynrang, Eva bad Mateo ha ka 8 tarik Jylliew 2017 ha United States lyngba ka surrogacy. Katba ïa ka khun kynthei ka Alana Martina u ioh na ka samla jong u, ka Georgina Rodríguez ka model na Spain ha ka 12 tarik Naiwieng 2017.
U kpa u Ronaldo, u José, u la khlad nohi ha ka rta 52 snem ha u Nailur 2005 katba ka kmie ka dei ka Dolores. U Ronaldo u dei ruh u nongtrei monsngewbha uba pawkhmat ha pyrthei bad u dei ruh u briew uba don ïa ka mynsiem sngewsynei para briew. U la noh synñiang pisa ïa ka Indonesia ha u snem 2014 hadien ba shah khyrwit ha ka tsunami kumjuh ïa ka Nepalhadien ba ka shah khyrwit ha u jumai bah 2015, u dei ruh u Global Artist Ambassador ka ‘Save the Children’, u lut hi ban phah sumar ïa uwei u heprit bapang bampong ha u 2012.
