Nongstoiñ, Rymphang 4: Ka West Khasi Hills ka dei ka District kaba heh duh na baroh ki district ha ka jylla, ka dei ruh ka district kaba ki kam pynroi ki duna haduh katta katta la ka long ha ki surok, ka umbam umdih bad ka bording.
Napdeng ki lai tylli ki Constituency, ki shnong ka Rambrai Jyrngam bad ka Mawshynrut ki dei ki Constituency kiba dang bun ki shnong ki bym pat don surok kum ki shnong kiba don ha ka thaiñ Mawkhiat kata naduh Mawshad, Umshem, Rynñiaw, Domkyrkoh, Umïong, Darephang, Nongspung, Umbah, Nongmawleiñ, Mawkhap, Mawsngi, Umyiap, Miangbyrkong, Mawdiangsnam bad kiwei kiwei. Hynrei kine ki shnong, ki la ïoh pat ïa ka bording elektrik na ka skhim RGVVY, kaba dei ka skhim jong ka sorkar pdeng.
Ki shnong kiba hap ha ka Mawshynrut Constiuency ki bym pat don surok ki dei naduh Nongshyrkon, Nonglyer, Phodjalei, Nongkrong, Unshynrut Mawkhar, Nongsleh, bad kiwei kiwei. Ha kaba ïadei bad ka jingbym pat don surok, ki paitbah ka Nongshyrkon, Umshynrut, Nongkrong bad kiwei kiwei, ki la ong ba la slem bah ki la kwah ban ïoh surok, hynrei haduh mynta ki dang hap ban ïaid kjat da ki bun bun kynta ban poi ha surok kali.
Nalor kata ki la ong ruh ba lada dei ha ka por tlang te kam da jynjar than, namar ki Mahindra pickup ki lait wut wut. Hynrei ha ka por lyiur te wat ki kynthei ruh ki hap ban hiar bad khynñiat lang kham ïa ka kali, hynrei bun kaba sah kut ban ïa kaba ïaid beit. Ki nongshong shnong ka Phodjalei, ki la ong ba mynta ka la don ka jingkieng lyngba ka wah Rwiang kaba la dep pyntrei.
Hynrei namar ba ym pat plie kim pat shah ban ïaid kali, kumta na ka bynta ban kit ïa ki mar ki mata, ki hap ban don kawei ka Mahindra pickup kaba ap sha shilliang ban pynpoi ïa ki mar ki mata shapoh shnong, katba kawei pat ka dei kaba mih na Nongstoiñ ban pynpoi ïa ki mar ki mata ha katei ka jaka.
Ha kajuh ka por ki la ong ba naduh ba u kontraktor u la dep ban pyntrei ïa katei ka jingkieng, ki la don ka jingkyrmen kaba khraw ba ha u snem ban wan ki kali ki la lah ban ïaid, namar ym slem shuh ba yn sa plie noh ïa katei ka jingkieng.
