Ka PhD u Bah Sniawbhalang ba ka dei ka PhD ban thok ban shukor ïa ki paidbah: Roy Kupar

Nongpoh, Naiwieng 21: Ki nongïalam ki san tylli ki seng bhalang ha ka lama ka ‘Save Hynñiewtrep Mission’ mynta ka sngi ki la ther tyngeh ïa ka sorkar MDA bad kumjuh ruh ïa u Myntri sorkar, u Bah Sniawbhalang Dhar uba la kam ba u la ïoh PhD ha ka politik bad phewse ki la kynthoh kylla ba kata ka PhD kaba u la ioh pdiang ka lah ban dei ka PhD kaba ka sorkar MDA ha ka jingïalam u Conrad K. Sangma kum u Myntri Rangbah ka long ban thok ban shukor bad ban don kti tang ha ki kam bamsap bad khlem da phai khmat pat ïa ki mat ki jura ba ka jaid bynriew ka ïa kynduh.
Ban dawa pynurlong ïa ki 9 tylli ki mat jingdawa, kine ki nongïalam seng ha ka lama ka ‘Save Hynñewtrep Mission’ ka kynhun ba la synrop lang da ki san tylli ki seng Bhalang ha ka jylla ba kynthup naduh ka HYC, HANM, CoRP, EJNC bad ka JSM mynta ka sngi ki la hiar sa sha ka them Ri Bhoi da kaba pynlong ïa ka jingïalang paidbah ha phyllaw ka Umsning Town Durbar Auditorium Hall, Umsning ban pynshai sha ki paidbah halor ki 9 tylli ki mat jingdawa ba dang sahteng ba ki la dawa na ka sorkar jylla.
Kum ban pynkynmaw, kitei ki 9 tylli ki mat ba la dawa da ka Save Hynñiewtrep Mission ki kynthup ïa ka jingdawa ban pyntreikam ïa ka Inner Line Permit, ban pynrung noh ïa ka ktien Khasi ha ka khyrnit ba 8 jong ka riti synshar ka ri India, ban pynbeit biang ïa ka MOU ba la dep soi halor ka jingpynbeit pud hapdeng ka Meghalaya bad ka Assam ha ka wat kaba nyngkong, ban pynkynriah noh ïa baroh ki nongtrei sorkar bad ban beh noh mardor ïa ki Khar mator na them Iewmawlong, ban pynbeit thymmai bad pynbha ïa ka polisi thungkam ha ka jylla, ban tohkti da ka CBI lane ka ïing Kashari ïa baroh ki kam bamsap ha ka jylla, ban tohkit da ka CBI, bishar da ka ïing Kashari ban ïaid sted bad pynshitom ïa ki pulit ba siat ïap ïa u (L) Cheristerfield Thangkhiew, ban thungkam noh mardor da kaba khuid ïa baroh ki kam ba sah thylli ha ka jylla Meghalaya bad ban weng noh mardor ïa ka aiñ Khali Casino.
Ki nongïalam jong kitei ki san tylli ki seng bhalang ka jylla ha ka lama ka Save Hynñiewtrep Mission mynta ka sngi ki la hiar sha Ri Bhoi ban pynlong ïa ka jingïalang paidbah na ka bynta ban pan ka jingkyrshan na ki paidbah ka them Ri Bhoi ba kin ïa snoh kti lang ban dawa ïa kitei ki mat ba ki la pynpaw paidbah, kaba dei shi bynta ka jingangnud kitei ki seng ba ka sorkar MDA bad sorkar kmie ka dei ban pynurlong.
Ha kane ka sngi, ki nongïalam naduh u Roy Kupar Synrem, General Secretary ka HYC, u Bah Bandari Ryntathiang, President ka CoRP bad u Bah Pateng Myrsing, President ka HANM, Ri Bhoi ki la ai jingkren bad ther tyngeh ïa kane ka sorkar kaba leh kyllut ïa kitei ki mat jingdawa ba ki san seng ki la pynsngew sha ka sorkar bad ha kane ka sngi ïa kane ka jingïalang la pynïaid da u Samla Jason Lennox Nongrum, President ka HYC, Ri Bhoi District.
U Samla Roy Kupar halor shibun ki mat kiba u la kren, u la ther tyngeh ruh ïa u Myntri sorkar, u Bah Sniawbhalang Dhar, uba la kam ba u la ioh ïa kata ka PhD ha ka Politik bad kynnoh ruh ba katei ka PhD kaba u ioh ka dei ka PhD ban thok ban shu kor ïa ki paidbah bad ka dei ruh ka sorkar bamsap ha ka jingïalam u Myntri Rangbah ka jylla, u Conrad K. Sangma uba khlem kheiñ snep ïa ki mat ki jura jong ka jaid byrniew.
U la kren pyrshah ruh halor ka MOU ba la dep soi ha ka kam pynbeit pud ba la soi matlah khlem da bishar bniah ba ki jaka ka Meghalaya ki la leit sha ka Assam bad ruh u la kren halor ka Reservation Policy kaba la noh shiliang bad kumjuh ruh ha ka liang ka thungkam thungjam ïa ki samla kaba ym khuid ym suba ba ka Save Hynñiewtrep nangne shakhmat kan ïa khun pyrshah tad haduh ba kitei ki mad jingdawa ki dei ban urlong.
Na ka liang u Bah Pateng Myrsing, President ka HANM, Ri Bhoi, haba kren ha kane ka sngi, u la ther tyngeh ruh ïa ka sorkar MDA halor ki Khar Mator ha Them Iewmawlong ba ka sorkar haduh kine ki snig kam pat lah ban weng ïa ki bad u la byrngem ruh ba ki san seng lada ka sorkar kam lah ban weng ïa ki na Them Iewmawlong kin sa leit hi ban weng bad ban beh ïa ki na katei ka them Iewmawlong.