Orpait ka jingkieng kaba dang shu dep shna namar ka jingtorti u Contractor

Dawa pynbha ïa ka surok ban leit sha Pynursla CHC

0

Pynursla, Naiwieng 21: Katba ka jingpyntrei ïa ka surok na surok Mawlyndun sha Mawlynnong lyngba ka shnong Kyntonsa-ir ka dang ïaid shait shait hynrei ka jingtrei torti u contractor ka la paw pyrthei hadien ba kawei ka jingkieng kaba dang shu dep shna dang mynta hi u snem ba la pyntrei da ka Dhar Company ka la orpait noh bad ka bynta ka surok ba pynïasoh lyngba kane ka jingkieng ka la them shapoh.
Ha ka sngi Nyngkong na ka liang ka HNYF Pynursla Circle ka la hiar ban jurip hi da lade ban lap ïa ka jingshisha baroh bad ynda ka seng ka poi ha katei ka jaka ka shem ba kaei kaba na ka liang ki paidbah ki la ai jingtip sha ki nongïalam ka dei kaba shisha bad ba ka don ka jingorpait ka jingkieng.
Haba kren bad ki lad pathai khubor, u Secretary ka seng Bah R. Khonglam u la kynnoh ka jingthem kane ka jingkieng bad ka jingorpait jong ka ka daw hi ka dei namar ka jingtrei torti da u contractor ha kaba ha ki bynta ka surok ba pynïasoh bad ka jingkieng ha ka jaka ban pyndap da ki maw rygkat ka khyndew hynrei u la ong na kaei kaba paw lah ban sngewthuh ba dei namar ki pyndap tang da ka khyndew suda kaba them pat ynda la ïaid ki kali bad ka jingrung um ha ka por slap.
U la ong ba ki bor ba dei khmih ïa katei ka surok naduh ki enginneer bad ki overseer ki dei ban bthah ba u contrtactor un tei biang noh ïa katei ka jingkieng da kaba skhem bad ba bha khnang ba kan ym buh jingeh pat ïa ki paidbah ynda ki ïaid lyngba kane ka surok.
U la ong ruh ba ki bor ba dei peit ki dei ban leh eiei noh ly kumta na ka liang ka seng kan shim pat da kiwei ki synjam kiba tyngeh ban pynpei shkor ïa ka sorkar.
Shuh shuh ha kane ka sngi ki nongïalam ka HNYF ki la leit ban jurip ïa ka surok kaban leit na surokbah sha Pynursla CHC hadien ba ka la ïoh ujor ba katei ka surok ka jot rathai wat la la ka dei kawei na ki surok kaba kongsan ban pynpoi ïa kiba pang ba shitom sha katei ka jaka sumar.
Haba ïadei bad kane na ka liang ka HNYF ka la buh jingkyrpad ïa ki bor ba dei peit ba kin shim khia ban maramot ïa kane ka surok khnang ba ki kali kit nongpang kin ym hap ïaid ha ki thliew ki syar ba heh kaba pynjynjar pat ïa ki nongpang.
Shuh shuh na ka liang ka seng ka buh ka jingkyrpad ba ka sorkar bad ki kompeni kiba pyntrei ïa ka surokbah na Shillong sha Dawki kin maramot ha ki jaka kiba ki la jot than namar ka jingshu ieh shrah ka pynsohsat ïa ki paidbah ba leit ba wan lyngba kane ka surok.
“Ngi sngewthuh ba ka jingtrei ban pynheh ïa kane ka surok ka dang ïaid, hynrei ban ong ba kito ki jaka kiba la jot rathai yn shu ieh beit ka long kaei kaei kaba ym lah pdiang namar lada ka jingpynheh kan bampor san snem ruh hato long mo ban shu ieh ïa kito ki jaka ba donkam maramot khang ba kan pynsuk ïa ki nongleit nongwan,” u la ong.

Leave A Reply

Your email address will not be published.