Ka Ophis u Syiem Nongstoiñ ka la kylla ktem ka NPP, khywit ka TMC

Bun ki kren kam pynroi khlem pyrkhat ïa ki aiñ ba donkam: VPP

0

Nongstoiñ, Rymphang 20: U bah Macmillan Kharbani kyrtong ka Trinamool Congress haba ai jingkren sha ki paitbah ha ka rynsan ïalap election ha Nongstoiñ, u la ong ba ki mat treikam ba kongsan jong u lada un poi sha ka thong, ki long ban pynkylla noh ïa kawei na ki kyndon kiba la buh da ka sorkar, ba ka District Selection Committee kaba ju khot interview ïa ki samla wad kam sorkar, ka dei ban pynpaw ruh ïa ki marks ba ki samla kiba ïaleh ïa ka eksamin wad kam sorkar, kin tip kumba leh ha ki eksamin class X XII bad baroh ki eksamin ha ki jaka pule, namar baroh shikatta ha ka resol ba ki DSC ki pynmih na ka bynta ki samla wad kam sorkar ym ju pynmih satia ïa ki marks.
Kawei pat ka mat kaba la ktah ïa ki paitbah jong ka Nongstoiñ constituency ka dei ba ka Ophis jong u Syiem ka hima Nongstoiñ ka la kylla long pynban ka ophis jong ka NPP, kat haduh ba haba jied ïa ki nongsynshar shnong lada kim dei ki briew jong ka NPP hap ban jied biang ar sien lai sien
U bah Bobby Kharshandi kyrtong ka Voice of People Party kaba la seng da u bah Ardent Miller Basaïawmoit, haba ai jingkren ha ka rynsan ïalap election mynta ka sngi ha Nongstoiñ, u la pynkynmaw ba baroh ki kyrtong haba ki ai jingkren sha ki paitbah, ki kren beit tang shaphang ka roi ka par namar kim tip kiei ki aiñ kiba lah ban ïada ïa ka hok longtrai jong ka jylla.
Ha kaba ïadei bad ki aiñ ban ïada ïa hok longtrai jong ka jylla, u la pynkynmaw ba ka Article 371 ka dei ka aiñ kaba donkam tam ba ki nongmihkhmat ba ki paitbah ki la jied ba kin leit sha ka Ïingdorbar Thaw aiñ jong ka jylla, kin dawa na ka sorkar India ba ka dei ban pynrung ïa ka ha ka jylla Meghalaya.
U la pynkynmaw ruh ba ka Instrument of Accession kaba la ïasoi ha u snem 1948 ka dei ka lynti ba ka sorkar India ka dei ban leh ei ei. U la ong ruh ba ki khatphra ngut ki kyrtong jong ka VPP ryngkat u President rangbah jong ka party, ki la buh ïa kane kum kawei na ki mat treikam bad lada kin jop kin dawa na ka sorkar India, ba kan pyntreikam ha ka jylla ïa ka Article 371 lyngba ka Special Provision kumba long ha Nagaland, khnang ba ki aiñ jong ka sorkar pdeng kin ym lah shuh ban tuklar.
U Bah Diostarness Jyndiang na ka BJP u la ong ba lada ki paidbah kin jied ba un long nongmihkhmat, un wanrah ki kam pynroi dairek na ka Delhi. Ki kam pynroi ki ban kyntiew nadong shadong na ka bynta ki paidbah, la ka long ha ka kamai kajih, jingnang jingstad bad kiwei kiwei ki ban kyntiew kyrdan syondon wat ïa ka pyrkhat pyrdaiñ jong ki paidbah nongshong shnong.
U bah S.Wanñiang u dei u kyrtong shmet u ba la kiew rynsan khatduh ban ïalap election ha katei ka sngi. Utei u kyrtong u dei u kyrtong u ba phylla tam napdeng jong ki kyrtong baroh, namar um shym la wan rah paitbah nongkyrshan ne um shym la thung ruh wat ïa ki nongkitkam bad ki shnat trei kam ba ki khot ki Primary Unit, hynrei haba u kiew ha katei ka rynsan u wan lang tang bad ka kmie jong u.
Kaba phylla ka long ba wat la marwei u ïeng bad na ka bynta ban khot paitbah, u la thaw da kawei ka jingrwai kaba la pynkyndeh mynsiem bha bad shuwa ba un kren, u la tem ïa katei ka jingrwai kat haduh ba ki paitbah na ki kyndong kynshrot bad wat na ki dukan ba ki shong ki la ïamih bad ïashad ha surok kaba la pynshong shit hi puk. Nalor nangta u la ong ruh ba baroh shi sngi ki la kren ki high level bad u ma u pat kum u low level, u kyntu sha ki paidbah ban ym peit party namar kam shong eh ha ka party hynrei ha u briew kumno ban treikam. U la ong ruh ba kumba ong u Maieit Hoping ba lada ym don ba thep na ka bynta jong u ruh, hynrei ki angel na bneng kin hiar ban kyrshan na ka bynta jong u.

Leave A Reply

Your email address will not be published.