Tuid ki paidbah ha ka jingïalang UDP ha ïew Pongkung, pan jingkyrshan u Bah Olan Suiñ

Pongkung, Rymphang, 20: Ka United Democratic Party (UDP) jong ka Mawsynram Constituency ha ka taïew ba la dep ka la ïoh ban pynlong ka jingïalang paidbah hapoh Ïew Pongkung, East Khasi Hills District ha kaba kane ka long kum shibynta ban pan ka jingkyrshan ïa u bah Ollan Sing Suiñ u kyrtong na ka UDP Mawsynram Constituency ha kane ka MLA Election 2023.
Kiba la ïadonlang bad kiba la ai jingkren ha kane ka sngi ki long naduh u bah S. Lyngdoh, u bah Tamdor Risaw, u bah B.S. Marbaniang, u bah B. Syiemlieh, President na ka BJP mynshwa, u T. Sangma, bah Daniel Wahlang, bah Man Sangma, bah D. Dkhar haba kine baroh ki la pyni bad pynshai ïa ki nongrim ba ki don kumno ban pynkhlaiñ ïa ka party bad kumjuh ruh kumno ban nang trei shitom nangne shakhmat ban wanrah ïa u soh jong ka jingjop bad ki la pan ruh ka jingkyrshan na ki paidbah ba kin ai ka kti kamon ka kti kadiang ban pynjop don burom ïa u bah Ollan Sing Suiñ.
U bah Ollan Sing Suiñ u kyrtong jong ka UDP Mawsynram Constituency, haba kren ha ka jingïalang paidbah ha katei ka sngi ha shnong Pongkung, East Khasi Hillls District u la ong ba shisien ba la long nongïalam ki dei ban long ki nongïalam paidbah ryngkat ki jinglong kiba bha ba kum ki paidbah ki lah ban shaniah. “Kum u nongïalam, kam shem dei tang ha u marwei hynrei na ki paidbah ruh bad ka jingjop jong nga kam dei ka jinglah jong nga marwei hynrei ka dei ka lyngba jong ki nongïalam bad ki paidbah”, ong u bah Ollan namar kumba kiwei ki sngew ba ka jingjop ka dei ha ka bor jong ki marwei, hynrei na ka liang jong u bah Ollan um kwah ban buh ïa kum kata namar ka jingjop hi ka dei lyngba jong ki paidbah bad ki nongkynshan kiba kyrshan na kamon bad na kadiang ha ki jingtreikam.
Shuh shuh u la pynpaw ka jingsngewkmen namar u khlem poi pyrkhat ba ki paidbah ki wan tuid ha kane ka jingïalang namar um shym la khot paidbah hynrei dei namar ki paidbah hi ki don ka jingieit bad jingshaniah. “Nga la duh thiah duh dem nga sngewkieng khlieh ha kine ki sngi hynrei nga sngewkmen pat ba nga ïohi ïa ki paidbah kiba long ki nongkyrshan bad dei ma ki ka dawai ban pynjem ïa ki jingpang”, pynpaw u bah Ollan ha ka jingkren ha ka jingïalang ha ïew Pongkung. U bah Ollan u la ong ruh ba ïa mynta um kwah ban kular ei ei shwa ka elekshon hynrei ban trei shwa ïa ki kam, namar dang lah ïa u briew ban burom ba katno u la pyrshang ïa kam hynrei ym ïa u briew uba katno u la jop.
Kumta u la kyrpad ba ha kane ka kynti ba mynta ai lad ïa u ba un jop ha kane ka MLA Election 2023 ba un lah ban wanrah ïa ka roi ka par katba u lah ei um da kaba kular lypa mynta kumba kular kiwei namar, “Ngam dei u briew uba don kyrhai ka riew spah hynrei ka spah ha ka mynsiem ban shakri ïa ki paidbah kyrhai u don”, ong u ba Ollan.
Ha kane ka sngi la wan sakhi lang da ki paidbah na kylleng ki jaka jong ka Mawsynram Constituency ba kynthup naduh ki longkpa longkmie, ki samla shynrang bad kynthei kiba la long ka jingaimynsiem ïa u kyrtong ka UDP.