Ka mukotduma ka dei tang ka jingshah pharep bad ka dei kaba la slem, ong u Bah Teibor

0

Shillong, K’Lyngkot 28: U kyrtong jong ka National People’s Party (NPP) uba dei ruh u MDC na Mawlai Constituency, u Bah Teiborlang Pathaw u la ong ba ka mukotduma pyrshah ïa u ka dei tang ka jingshah pharep bad kane ka jingshah mudui ka dei kaba la slem naduh u snem 2017 bad ka jingïakhun mukotduma ka dang ïaid haduh mynta hapoh ka iingbishar. Hadien ka jingbthah jong ka Election Commission of India (ECI) ba ki seng saiñpyrthei ki dei ban pyntip paidbah ha ki rynsan lad pathai lada ki pynïeng ïa ki kyrtong kiba don ïa ki jingshah kynnoh donkti kam beaiñ ne kiba don ïa ki mukotduma pyrshah ïa ki ha ki Kashari, na ka liang jong ka NPP ka la pynbna ba lai ngut ki kyrtong ki don ïa ki mukotduma hapoh ka Kashari, ba kynthup ïa ka Dr M Ampareen Lyngdoh, u Thomas Sangma bad u Bah Teiborlang Pathaw.
Haba kylli halor kane ka mukotduma, u kyrtong ka NPP u la ong, “hadien ba ka Election Commission ka la pynmih ïa ki kynndon, na ka liang ka party ruh ka la ïathuh bad pyntip kumba kadei ban leh”.
U la ïathuh ba naduh u snem 2018 ruh u la pyntip sha ki bor pynïaid election halor ka jingdon katei ka mukotduma lyngba ka ‘afidavit” hynrei namarba ki kyndon ka ECI mynta ka kynti ki phah ban pynbna paidbah ha ki lad pathai khubor, ka party ruh ka la leh ïa kata,” ong u bah Pathaw.
U la ong ba kane ka dei ka jingshah kynnoh naduh u snem 2017 bad mynta ka dang sahkut hapoh Kashari.
“Namarba nga khlem leh ïa kano kano kaba sniew te nga ruh nga ïakhun beit ïa kane ka mukotduma,” la ong u Bah Teibor da kaba bynrap ruh ba u ïeh ha ka jingstad jong ka ïingbishar ba kan rai halor kane ka jingshah pharep.

Leave A Reply

Your email address will not be published.