U MLA barim bad MDC kim ju phai khmat sha ki baduk ba rangli ha Mawsynram, ong ki nongïalam

Shillong, Kyllalyngkot 28 : Ki nongkitkam bad nongkyrshan ka Congress, NPP bad BJP na ki shnong bapher bapher ka thaiñ Umsawrang kiba hap ha ka Mawsynram Constituency ki la kynnoh ba u briew uba ki la pynjop ha ka elekshon MLA 2018 kata u Bah Himalaya Shangpliang, uba pynkhreh mynta ban ïakhun ïa ka elekshon MLA 2023 na ka BJP kumjuh u Bah Alvin Sawkmie ïa uba ki la pynjop kum u MDC ha u snem 2019 bad u ban ïa aireng ha ka elekshon ban wan na ka NPP, ba ki dei ki ba im bad leh ‘hi-fi’ lane leh meng bad kim phai khmat sha ki nongshong shnong kiba duk kiba rangli khamtam ha ka por ka jingwan lynshop ka khlam COVID-19.
Kine ki jingkynnoh ki la mih na kitei ki nongkyrshan ha ka jingïalang pynskhem ïa ki nongkitkam ka United Democratic Party (UDP) Youth Wing bad Women’s Wing Umsawrang Zone kaba la long myn ha ka 26 tarik u Kyllalyngkot, 2023 ha ka shnong Umsawrang bad kane ka Zone ka kynthup ïa 9 tylli ki shnong kata ka Umsawrang, Laitumsaw, Nongdisiar, Pyndem Umsawrang, Phodsteiñ Nongneng , Phodsteiñ Nongrum, Kandapara, Pynden Dakni bad Umlynter.
Kine ki shnong ki dei ruh ki shnong ki dei kiba la shong khleh lang nalor ki Khasi da ki jaidbynriew bapher bapher ba kynthup ïa ki Garo, Assamese, Koch, Rabha, Bangalee, Mundai, Hajong bad kiwei pat. ïa kine ki nongkitkam kiba dei ruh ki nongïalam na ki Primary Unit jong kitei ki shnong la pynskhem da u Bah Olan Sing Suiñ uba dei u kyrtong ka UDP ha ka elekshon nongthawaiñ sha ka ïing Dorbar ka Jylla ka ban long ha ka 27 tarik u Rymphang, 2023 na katei ka Constituency.
Kine ki nongkyrshan ki la ong ba ka jingleh bym suidñiew ki nongmihkhmat kiba ki la pynjop ka la pynlong ïa ki ban phai khmat noh sha ka UDP da kaba bynrap ba kano kano ka Party kam wan eh ha khmat hynrei ka shong u briew bad mynta ki ïohi ia u Bah Suin kum u briew u ban nym pynjngai na ki paidbah haba ki donkam ynda u la jop bad um long kum kiwei ban shu thmu thied pat ïa ki kum ha kane ka por elekshon katba san snem pat jah jarjar.
Napdeng ki nongkyrshan kiba ha khmat kiba la phet noh na ka BJP bad NPP ki kynthup ïa u Bah Suly Lyngdoh, uwei na ki riewrangbah ka thaiñ Mawsynram kumjuh kiba dei na ka thain Mawpen bad Sawsymper, u Bimol, u Sol Sangma, u Dipok, u Mon Sangma, u Jasen Sangma, u Tinot Sangma bad kiwei pat kiba la ai jingkren ha katei ka jingïalang ba la pynïaid da u Bah Kyrkieh Marbaniang.
Haba kren ha ka jingïalang, u Bah Suiñ u la ïathuh ba ha ka elekshon ha u snem 2018 um shym la ïoh ka jingkyrshan kaba pura na kylleng ki shnong namar ka jinglyngkot ka por hynrei mynta ka kynti u ïoh bha ka jingkyrshan na ki thaiñ lum ka Mawsynram bad kiwei pat ki jaka bad u khmih lynti ba ki nongshong shnong ha khappud kiba dei na ki jaidbynriew bapher bapher ba kin ïa tylli ha ka UDP.
“Kham ha shwa ki la don ki jingpynkulmar jingmut ha kaba ïadei bad ka ticket na ka Party hynrei nga la ïeng ha ka nongrim khlem kynriah”, u la ong da kaba bynrap ba ka UDP kam dei ka Party Khasi kumba la kynnoh da kiba pyrshah hynrei ka dei na ka bynta jong baroh. U la ong ba na ka liang jong u um don ka jingkular ne pisa ban pynbieit ïa ki paidbah hynrei ynda u la jop un shim ka jingïatreilang na ka bynta ka jingmyntoi salonsar ha ka thaiñ.
U la ong ba u buh tang ka jingkular ba un nym peit shiliang khmat la kiba duk ne kiba riewspah la ki dei ki jaidbynriew bapher bapher. “Ban khein sniew ïa ki Party kam long hynrei hap ban shim ba dei kum ki bus bad hap ïoh ki nongñiah kiba biang”, u la ong da kaba bynrap ba mynta ka kynti hap ban ïa tylli bad kyntu ïa ki paidbah ban nym shah pynngop ha ka bor pisa kaba shu wan pynbieit ha ka por elekshon.