Nongstoiñ, Risaw, 26: U Bah Hopestandard Myrthong u ba dei u dkhot ba la rangbah bha jong ka seng BJP ha Nongstoiñ, u ong ba ka jylla Meghalaya ka don la pud u sam. U la ong, “Ki la mih bun palat kiba batai shaphang ka Meghalaya ba ka dei ka jylla ka bym don la u pud u sam, ka Meghalaya kam dei ban duh wat tang shi inshi ka jaka, ba ka Meghalaya bad Assam kin ïa ai ïa shim (give and take policy). Hynrei ban ong ba ka Meghalaya ka dei ka jylla khlem pud khlem sam, ka long kaei kaei ka bym lah ban pdiang”.
“Kane ka jingkren ka dei ka bym sngew lah ngeit, namar wat ki mahajon masi kiba leit thied masi sha Assam, ki mahajon masi ki thied tang ïa ki masi kiba la shon marka ha ka met jong ka masi. Kumta kat ïa ka jylla ba la ïoh kyrteng ka Meghalaya lei lei la leh katkum ka lynti jong ka aiñ, kata katkum ka ‘The Assam Re-organisation Meghalaya Act 1969’ ba ka Meghalaya ka kynthup ïa ar tylli ki District kata ka United Khasi and Jaiñtia Hills District bad ka Garo Hills District bad ka North Eastern Areas/Recognition Act 1971, ka ïa dei bad ki jaka ba ïa dei bad ki jaka sor. Kumta ka Guwahati High court ki la ïarap ban batai shaphang u pud u sam katkum ka ‘The Assam re-organization (Meghalaya) Act 1969’, hangne ka la law noh ïa ka jingngeit biej ba ka Meghalaya ka dei ka bym don la u pud u sam.
U la ong ruh, “Ka Meghalaya kam dei ban duh wat tang shi inshi ka khyndew ka shyiap bad kane ka bynta, ka dei ïa ngi ban tip shai u ei u ta u laiñ katkum ka Assam re-organization (Meghalaya) Act 1969. Namar nga ngeit ba don u laiñ ba la pynshongdor katkum ki co-ordinate bad ki Revenue Office jong ka Meghalaya bad Assam, ki don bad haka jingmutdur ba ki committee pynbeit pud jong ka Assam, ki la dei ban bat ïa u GPS bad katkum ki co-ordinate, yn sa lap ïa u laiñ ba thikna jong ka Meghalaya bad Assam”.
“Hangta keiñ ngin sa tip ïa ki paidbah ba kiba shong shnong ha ki thaiñ border, la ki hap hapoh Meghalaya ne Assam bad yn sa ïa pyrkhat sani bha ha ka wat ba ar ïa ki paidbah ki mon sha Meghalaya ne sha Assam, ki la shong shnong hapoh Meghalaya balei kim lah ban kohnguh ïa ki aiñ ki kanun jong ka Meghalaya bad hangne yn sa ïalap ïa kata ka shi inshi”.
“Ki don ruh kiba pyrta ba khnang ban lait na ki jingïa kajia dei ban ïa ai ïa shim jaka mar kylliang (give and take policy), kane kam ieng namar wat tang ïa u Boundary line jong ka Assam re-organization (Meghalaya) Act 1969 ngim pat tip ei ei. Hangno keiñ ngin ïa bujli jaka bad kane ka jingmut kan pynkut mar shuh shuh hato phin ai noh ïa ka West Khasi Hills sha Assam ne ïa ka Guwahati sha Meghalaya?”
“Ka jylla jong ngi ka long shisha kaba rit hynrei ka long kaba itynnad, namar haba shim nuksa ka shnong Mawlynnong ka dei ka shnong kaba rit. Hynrei ka la rah ïa ka nam ka burom hakhmat ka pyrthei ha ka jingkhuid bad itynnad, khamtam ki nongshong shnong ki im hok, ki da ñiewkor ïa baroh kiba wan jngoh ïa ka bad nangbud sa ki shnong harud ka wah Umngot”.
“Katno tam lei lei ki shnong hapoh ka Meghalaya jong ki Khasi Pnar bad Garo kin shim noh ïa ka sien jam, da ka bud nuksa ïa kitei ki shnong khnang ba ki paidbah nongshong shnong kin ieng rangbah ha ka jingkhuid jong ki shnong ki thaw ryngkat ki jingkhuid ha ka mynsiem, khnang ba ngin lah ban kamai ïa ka hok da kaba pynneh ïa ka Mei Mariang kumba ka long kaba donkam. Namarkata, ka donkam ïa ki riew rangbah, ki Sengbhalang bad ka sorkar, ban wat bniah ba ngin tip ïa u line jong u pud u sam, khnang ba ynda ngi kren ka pyrthei hi kan sakhi ba kine ki dei shisha ki riew shemphang”.
“Ban ïakren ha ka jingïadei bad u pud u sam hapdeng ka Meghalaya bad Assam nga kwah ban ïathuh paidbah ba ki don ki riew rangbah kum u Fridonlin Marweiñ, kiba don ïa ki dulir kiba biang. Nga kyntu ruh ïa ki sengbhalang, ki riew rangbah khamtam ïa ki Committee pynbeit pud ba kan long ka jingmyntoi shibun ban ïoh ban ïa pule bniah ïa ki dulir, khnang ba ki jingïaksaid jong ngi kin nym long lehnohei”, ong u jong u Bah Hope-standard Myrthong.
