Ka ‘manifesto’ jong ka BJP ka paw shai ïa ka jinglong seng nongwei ka jong ki, ong ka Dr Ampareen

‘Ha kane ka Jylla ngi la burom lypa ïa ki khun kynthei, to ngin ïa ai lem ïa ki khun shynrang ruh’

0

Shillong, Rymphang 17: Ka nongaiktien jong ka National People’s Party (NPP), ka Dr. Mazel Ampareen Lyngdoh ka la ong ba ka Bharatiya Janata Party (BJP) kam shym la leh ‘home work’ ha kane ka Jylla, bad ka ‘manifesto’ kaba ki la pyllait na ka bynta ka election ha ka Jylla ka pynpaw shai ïa ka jinglong seng nongwei ka jong ki.
“Balei kan don kata ka political party ka ban leh bym hok ïa ki samla bad rangbah ha ka ri ba ki khun shynrang ki sngewmong, la ong ka kong Ampareen haba kynthoh ïa ka kular election jong ka BJP.
Ka la ong ba ka bha ban ai pule khlem donkam siew ïa ki khun kynthei naduh KG haduh PG, hynrei ka la buh jingkylli kumno ka BJP kan pynïaid pat ïa kine ki scheme.
“Ngi ïohi ba bun na ki scheme jong kine ki briew kidei kiba hap ban pynïasoh lut sha ka Aadhaar. Ha ka Jylla jong ngi kaba bun ki nongshong shnong kim pat don ka Aadhaar, wat ma nga ruh ngam don Aadhaar,” ka la ong da kab buh jingkylli ruh, “Hato phin ai mo ïa ka dud bad ka ngap ban shlei ha kane ka Jylla jong ngi khlem buh kyndon.”
Halor ka kular pynthied scooty ïa ki kynthei ba pass bha, ka Kong Ampareen ka la ong, “Ngi sngewtynnat tangba ha kane ka Jylla kum kane ka kular ka lah long shaba palat namar ha kane ka Jylla ngi la burom lypa ïa ki khun kynthei, to ngin ïa ai lem ïa ki khun shynrang ruh.”
Ha kaba ïadei bad ka jingkular ban ai T.1000 shibnai ïa ki samla pule ba khlem kam, ka nongïalam ka NPP ka la ong ba kumno kin pynpoi ïa kata ka pisa sha ki samla haba tang ïa ka ‘umbrella scheme’ban pynrung kyrteng ruh ka long kaba la eh bad jynjar.
“Ban ai bai bam ïa ki riewtymmen ruh ka Jylla ka la dep leh naduh ba synshar ka Congress, bad ka Sorkar MDA ka la dep ban pynkiew ïa ka bai bam jong ki riew tymmen na ka T.6000 shisnem sha ka T.9000,” ka la ong da kaba buh jingkylli ruh, “Hato ka Sorkar kmie kan sa kyntait biang ne em ïa kiba ïoh scheme na ka Sorkar Jylla.”
Ha kaba ïadei bad ka kular ban aiei ïa u khaw bad kiwei ki tiar bam lyngba ka PDS, ka la ong ba ka card aiu kin pynmih, haba tang kiba don hok ban ïoh ïa ka card rashon ruh kim pat ïoh.
“Phi ong ban ai T.24,000 ïa ki longkmie baduk kiba la ïap lok, balei phim ai lem ïa ki longkpa namar ki don bun ki longkpa kiba ri hi ïa ki khun namar ba la khlad noh ka kmie,” ka la ong shuh shuh.
Ka nongïalam ka NPP ka la ong ruh ba ka kular jong ka BJP ban ai T.50,000 ïa kiba khun kynthei, kane kadei kaba la noh shiliang lypa, bad kidei ban pynshai, hato kadei ka pisa kaba lah ban pyndonkam ka kmie ban pynheh pynsan ne kadei kaba shuh buh beit ha ki bank.
“Lada phi hap ban ïatreilang bad kiwei ha ka Sorkar phin dang ai ne ym ai shuh, ne kane kadei tang lada phi jop 31 ngut ki MLA,” la buh jingkylli ka Kong Ampareen.
Ha kaba ïadei bad ka jingkular pynseng kam ïa 3.5 lak ngut, ka nongïalam ka NPP ka la buh jingkylli kumno kin jied ïa kita haba ka Jylla ka la jan kot 35 lak ngut ki nongshong shong. “Kumno phin jied tang 1 per cent,” la buh jingkylli biang ka nongïalam jong ka NPP.

Leave A Reply

Your email address will not be published.