Dei ka UDP ba phah knieh noh ïa ka tnad Kam Pohïing bad Bording na u James K Sangma: Bah Allantry

0

Shillong, Rymphang 17 : U Vice President ka UDP, Bah Allantry F Dkhar u la kam ba dei ka United Democratic Party kaba la dawa ba dei ban knieh noh ïa ka tnad Kampohiing bad ruh ïa ka tnad Bording na u James K Sangma.
“Kam mut tang ba ngi treilang ha ka sorkar ngin pynsawa lang ïa kajuh ka sur, ngi ruh ngi don la ki mat bad ki nongrim treikam khamtam lei lei haba ngi pynkhreh na bynta kane ka elekshon ban wan la ka jong ka jong,” u la ong haba kren bad ki lad pathai khubor hadien ba la dep ban pyllait paidbah ïa ki mat ïakhun elekshon.
Shuh shuh u la ïathuh ba ha ka por ba mih ki jingkynnoh kiba jur pyrshah ïa u James Sangma kum u Myntri ka tnad Kampohiing haba ïadei bad ka jingkhaïi tuh ïa u dewïong dei ka UDP kaba pynsngew ïa kane ka mat sha u Myntri Rangbah ka jylla, Conrad K Sangma bad kumta la pynkylliang ïa ki tnad treikam.
U la ong ruh ba hadien ba la wan sa ka jingkynnoh ba don ka jyrsieh ha MeECL ha katei ka por ruh ki la khih biang sa shisien halor ka nongrim ba kim kwah ba kum kane kan jia ha katei ka tnad. “Kumta dei u Myntri Rangbah uba la weng noh ïa u myntri ka tnad bording bad ruh ïa u CMD,” la bynrap biang u Bah Allantry.
Nalorkata, u ong ruh ba ym dei tang ba ki don ha ka kynhun synrop ba kin ïada iwei ïa iwei namar kaei kaba ka sorkar ka leh, khatduh hi kadei ha u Myntri Rangbah uba dei u nongïalam ka kynhun myntri bad ïa ka sorkar katba ma ki pat ki don tang lai ngut ki Myntri sorkar.

Leave A Reply

Your email address will not be published.