Shillong, Rymphang 17: Ki heh jong ka Seng TMC mynta ka sngi ki la wan ïuh kjat ha nongbah Shillong ha kaba ki la pynlong ïa ka jingïalang paidbah ha Khyndailad. U National General Secretary ka TMC, u Abhishek Banerjee, u la don lang ha kane ka jingïalang ryngkat u President jong ka TMC Meghalaya u Bah Charles Pyngrope bad kiwei kiwei de ki kyrtong ka TMC na Shillong.
Ha ka jingïalang kaba la pynkhapngiah mam ïaka surok Khyndailad, u Banerjee, u la ong ba ka TMC kam dei ka Seng kaba wanrah ka jingïapher jaidbynriew, hynrei kadei ka Seng kaba burom ïa baroh ki jait niam bad ki jaidbynriew.
U Banerjee u la ong ruh ba TMC ka mut “Trust Mukul and Charles” bad ki paidbah ki la thap kti shaid.
U Bah Charles Pyngrope haba kren ha kane ka jingïalang, u la ong ba ka TMC ha Meghalaya hadien ba ka la ïohi ïa ka jingeh jong ki paidbah bad ka jingduk jingkydruh, ka la pynmih da ka skhim ba la tip kum ka WE Card na ka bynta ki longkmie bad ka MYE Card na ka bynta ki Samla. “Ngi sngewkmen ban ïathuh ba naduh ba la pynmih ïa kine ki skhim, da ki lak ngut ki longkmie bad ki samla ki la rejistar ïalade bad lada ka TMC ka wan ha ka bor hapoh shispah sngi ngin pyntreikam noh ïa kine”, la ong u Bah Charles Pyngrope.
Baroh arngut u Bah Charles bad u Abhishek ki la ther tyngeh ïa ki kam bamsap ha kane ka jylla khamtam eh ha ka jingkhaïi tuh ïa u dewïong kaba la ktah jur ïa ka jylla bad khamtam eh ïa ka jingïoh lum khajna.
U Bah Charles u la ong ruh ba ka TMC ka la wan ha ka por kaba biang eh, namar ka jylla ka don hapdeng ka khep kaba la ima haduh katta ha kaba ka la mih ka jingud ka jingnam na ki paidbah kylleng kylleng halor ka jinghiar ka synshar ka khadar, ka jingshah lehbeiñ ki paidbah bad bun kiwei kiwei pat ki jingshah pynlehraiñ.
“Ngi kum ka TMC, ngi wan ha kaba kum kane ka por ban tyrwa na ka bynta kawei pat ka bor ban ïalam ïa ka jingsynshar ha ka jylla”, la ong u Bah Charles.
