Pynksan ki kyrtong na Pynthorumkhrah ïa la ki nongrim ha ka Common Platform ba pynlong da ka DS Lumshyiap

Shillong, Rymphang 17: Ka Dorbar Shnong Lumshyiap ha ka sngi Thohdieng ka la pynlong ïa ka rynsan ïalap elekshon na bynta baroh ki kyrtong kiba ïakhun na Pynthorumkhrah Constituency ha kaba la wanshim bynta da u kyrtong ka seng Congress u Bah Pynshngaiñlang N Syiem, u kyrtong ka NPP u Bah Rocky Hek, u kyrtong ka VPP u Bah Mayborn Lyngdoh, u Bah Samborlang Diengdoh bad u Bah Jubanlang Kharbihkhiew ki kyrtong shimet ha kaba u kyrtong ka AITC u Bah Raymond Basaiawmoit u la ai jingtip ba um shym la lah ban poi na ki daw bym lah kiar katba u MLA ba mynta uba long ruh u kyrtong ka BJP um shym la ai ktien eiei ba un ym poi satia.
Haba kren ïa ki mat bad ki nongrim kiba ki don na bynta ka Constituency bad ka jylla baroh ki kyrtong ki tyrwa ba dei tang ka synshar kaba khuid kaba lah ban pynthikna ba ka hok bad ka jingmyntoi ki paidbah ki dei ma ki man ïoh.
U Bah Pynshngaiñ u la ong ba ka jingdonkam ba ha khmat eh ka Pynthorumkhrah bad ka jylla ka dei ban sngewthuh ba ka elekshon ka dei ka jingjied ïa ki nongthaw aiñ kiba don ka jingtip ïa ka aiñ, ka jingsngewthuh ïa ka aiñ bad ka jingpeiphang ruh ïa ka aiñ.
U la ong ba kum ka jaidbynriew ka la pyni ïa ka jingtbit ha ka synshar khadar namar wat ka sorkar Phareng ruh ka hap ban burom ïa ka rukom bishar, ka rukom synshar bad ki rukom hiar pateng ha ka jaidbynriew bad hadien ba ka India ka la ïoh laitluid ruh la ïasnoh sha ka India da ki kyndon kiba khlaiñ kum ka Standstill agreement, ka Annex Agreement, bad ka Instrument of Accession.
“Ka jingstad ka jaidbynriew bad ki nongsynshar lah ban ïohi ha ka por ba ngi shah pynbor ban ïasnoh sha ka India ha kaba ki im treh ïasoh tdot khlem ïasoi shuwa ïa ki kyndon kiba shai. Dei hadien ba ka India ba kan don bor halor ki Hima Khasi tang ha ka, Currency, Comunication, Millitary bad ba ka India ka la kular ban ym ktah ïa ka riti dustur bad ki hok long trai jong ngi bad kane la lah ban phalang ïa ki kyndon ha ka khyrnit ba Hynriew ka riti synhar ka ri,” u la ong
U la ong ruh ka kolej, ki lynti synkien, ki kor CCTV ki dei kiba u MLa na bynta ka Pynthorumkhrah u dei ban peit khnnag ban wanrah jingmyntoi ïa u paidbah.
“Nga kwah ban shai ba ngi dei ka jaidbynriew kaba kyrpang namarkata ngi sngewthuh ba tang ka party kaba don tynrai nangne ba lah ban shakri na bynta u trai muluk ym da ki party kiba nabar Nga kwah ban pykynmaw ba mano ba pynbor ban pynïasoh India hato ym dei ka Congress, hato ka CAA ba la pynlong aiñ da ka BJP ym dei mo kaba ka Congress kaba la maitphang, hato ka jingbym ïoh biang ïa ki shnong ha Block I bad Block II wat ka dei hok ban wan sha Meghalaya hadien ba ngi la ïoh jylla pura hynrei ki sah beit bad ka Assam hato ym dei mo ka Congress kaba leh ïa kine bad nga kwah ban ong ba ka BJP bad ka Congress ruh ki buh jingma ïa ka jaidbynriew da kaba phi pynshong nongrim ïa ki nuksa kiba nga la kdew,” ong u Bah Mayborn Lyngdoh.
U la ong ruh ba kum u kyrtong u buh ha khmat ïa ki khynnah pule, ki nongbylla, ïa ki khynnah samla bad ïa ki nonghikai skul ha ki skul shimet.
“Kum u samla uba la trei bun ki kam nga sngewthuh bad nga don ruh ka buit kumno ban hikai ïa ki samla ba kin ïeng ha la ki kjat ym ban shu shaniah beit ïa ka kam sorkar. Ka jingiehnoh na ka kam sorkar kaba nga la trei ruh ka dei namar nga kwah ban trei na bynta ki samla bad ka jaidbynriew kaba rit paid jong ngi,” ong u Bah Jubanlang Kharbihkhiew.
“Shaei kata ka ïohkam ïoh jam, kumo la pyntrei kam ïa ki skhim, ki jaka pule bad kiba bun bah ngim ïohi ha kane ka constituency,” u la bynrap.
Katba na ka liang u Bah Rocky Hek pat u la ong “Naduh shuwa ba un long u MLA u la lah ban wanrah shibun bah ki skhim la ha kaba ïadei bad ka ambulance ne ka market complex bad kiba bun bah ki kam pynroi kiba kiwei ki kyrtong ki dang kular nga la leh lupa da kaba wanrah ïa ki skhim bapher bapher na ka Chief Minester Fund, bad lada phi pynjop lei kum u MLA ngan trei kham bunshah,” u la ong.
U la ong ruh ba ka jingmih jong u ban ïakhun ha kane ka constituency kam dei satia ba un hap ban ïakhun pyrshah u kñi jong u hynrei ïa ki policy treikam jong u namar ki long kiba jahulum bad kiba ym i don jingkyrmen na bynta u paidbah.”
Haba pynshai ïa ki paidbah kiba u don na bynta u paidbah ka Pynthorumkhrah, u Bah Samborlang Diengdoh u la ong ba ka jingmih jong u kam dei namar kum kiwei ki nongkhaïi ne ki businessman kiba wan ïakhun ban pynheh la ka pla.
“Ngam shym la wan ryngkoh kynsan kum kiwei na ka kam seng bhalang sha ka kam saiñ hima namar nga sngwethuh ba lada kwah ban shakri paidbah hap khlaiñ shuwa ki kjat lajong bad ka kpoh lajong namar lada kim pat khlaiñ phin shakri hok ïa u paidbah ne phin pyndap shuwa ïa lade namarkata kum u businessman ba don ka jingïatiplem nga mih shakhmat ban tyrwa ïa phi ban jied kum u MLA,” u la ong.
“Phi la ïohi ki kam kiba nga la leh ki la kren briew hi aiu nga leh bad kane ka kam la ha kaba ïadei bad ki samla lehkai, ne ka iew ki nongrep ne ki kam pynroi kiba nga pyrshang ban wanrah ki dei kiba nga leh da ka jingkhuid mynsiem bad ka jingkwah ban shakri hok ïa phi,” u la bynrap.