Pyllait ka UDP ïa ki mat ïakhun elekshon, yn ai kot ei ïa ki khynnah na ki longïing BPL

0

Shillong, Rymphang 17 : Ka synshar khadar kaba khuid ba suba bad ka jingsynshar kaba khlem shah liang ki dei ki katto katne ki mat ha ki mat ïakhun elekshon (manifesto) ba la pyllait paidbah da ka UDP ha kane ka sngi Thohdieng.
Ïa kitei ki mat ïakhun elekshon jong ka party la pyllait paidbah da u Vice President ka party, Bah Allantry F Dkhar ryngkat ka jingdonlang ka President jong ka UDP Women’s Wing ha ophis treikam jong ka party.
Nalorkine, la kdew ruhh halor ka koit ka khiah ban pynrung kham bun ka jingmyntoi ha ka MHIS, nangta ban pynbun ïa ki jaka test jingshitom lane diagnostic centre ha ki sub-division bad district headquarter bad ruh ban pynkhlain ïa ka jingïakhun ïa u drok.
Halor ka pule puthi, la kdew ban ai ei ïa ki kot pule sha ki khynnah kiba wan na ki longiing ba duk (BPL), ban don ki skul kyrpang naka bynta kito kiba donka jinglong ba kyrpang bad ruh ban pyntikna ba ki residential school kin treikam noh.
Haba ïadei pat bad ka rep ka riang la kdew ban ai ïa ki symbai kiba lah ban pynmih kham bun, ka jingpynpoi um sha ki lyngkha rep, bad ruh ban don ïa ka bording kaba biang bad ruh ban don ïa ka dor kaba biang ïa ki mar rep lane ka minimum support price.
Haba kren pat halor ka shongsuk shongshngaiñ la ong ba donkam ïa ka state border force ban tehlakam ïa ka suk ka sain ha ki khappud jong ki jylla bad wat ha ki khappud bad kiwei ki ri. ban leh tyngeh ïa ki kam runar bad ki kam pyntriem, ban tehlakam ïa ka jingrung kyrthlep ki mynder ri bad ban bishar bniah ïa ka soskular pynbeit pud bad ka Assam.
Kitei ki mat ki kynthup lang ruh naduh ki kam ban kyntiew ïa ka kam jngohkai pyrthei, nangta ka ïoh ka kot bad ruh ban pynkupbor ïa ki samla ha ki kam ban ieng hala ki jong ki kjat.
La kdew ruh ban kyntu biang ïa ka sorkar pdentg ba kan kynthup noh ïa ka ktien KHasi bad Garo ha ka Khyrnit kaba Phra jong ka Riti Synshar ka Ri katkum ka Resolution ba la mynjur da ka Iing Dorbar Thawain ka jylla.
Nangta la bsut lang ruh ba donkam ban buddien ïa ka jingpyntreikam ïa ka Inner Line Permit bad ruh ban pyntreikam ïa ki ain kiba la don lypa kum ka MSSRA.
Haba kdew halor ka ïohkam ïohjam, u Bah Allantry u la ong ba donkam ban bishar bniah biang wat ïa ka snem rung kam sorkar, nangta ban pyndap noh ïa ki kam kiba lait thylli ha ki tnad jong ka sorkar, ban ym buh shuh ïa ki personal interview na ka bynta ki grade 3 bad grade – 4. La ong ruh ba dei ba ka jingpynlong ïa ka personal interview lada pynlong dei ban buh beit bad ka camera. La kren ruh na ka bynta ban pynrung kam pura ïa ki nongtrei bad ki nongtrei contractual.

Leave A Reply

Your email address will not be published.