Ka jingsynjor ka shongkha shongman bad u drok ki dei ki nongshun ïa ka jingkiew shaphrang

Mawkyrwat, Risaw 06: Ka Lamlynti Village Organization Thaiñthynroh, Lyngïong Lyngdohship kum shibynta ban pynsngewthuh ïa ki nongshong shnong halor ki jingpynjot u drok ïa ka imlang sahlang, ka jingsynjor ka shongkha shongman, kumjuh halor ka mat ka koit ka khiah bad ka jingmyntoi ki Self Help Groups hapoh ka lama ki Village Organization ka la pynlong ïa ka jingai jinghikai ne awareness prokram ha ka 5 tarik u Risaw, 2022 ha ophis AEC Thaiñthynroh, Lyngïong Lyngdohship.
Ha kane ka prokram u bah Staising Kharbteng uwei na ki samla rangbah jong ka thaiñ ba duba uba long ruh kum u Sub Inspector of Schools ha Mawkyrwat bad bah A. Masynting, 2nd O/C jong ka Mawngap Police Station ki la long ki Resource Person.
U bah Staising Kharbteng ha ka jingkren jong u, u la ong ba ka jingkhlaiñ ka shongkha shongman ka long ka jingkyrkhu ïa ki khun ki kti bad ïa ka imlang sahlang. Lada ka shongkha shongman ka synjor ka pynrit mynsiem bad pynduh jingkyrmen ïa ka lawei ba phyrnai ki khun. U la ban jur ba ki khun samla ki jong ngi ki dei ban don ka thong ha ka jingim ka jong ki, khnang ba kin lait na ka shongkha khlem pat dei por. Ka jingïoh ïa ki khun samla kiba kynsai kiba la dep pyntbit ïa lade ha ki jingpule bad jingtreikam bapher bapher kin long da shisha ki nongshong shnong ki ban lah ban noh synñiang ïa ka jingkiew shaphrang ka Ri ha bun ki liang ne kita ki productive human resources.
U bah A. Masynting, 2nd O/C jong ka Mawngap Police Station u la batai kumno ka jingdih drok ka sdang na u duma bad ïa ki jingpynjot u drok ïa ka lawei ba phyrnai ki khun samla kiba ngop ha une u jingdih uba long u nongshun ïa ka lawei ba phyrnai jong ki, da kaba pynpaw ba u drok u pynjot, pyntroiñ ym tang ïa kito kiba ngop marwei shimet ha u, hynrei u pynsyier, pynjynjar ïa ka ïing ka sem jong ki, ïa baroh kiba ha ïing bad ka imlang sahlang bad pynmih ïa ki jingsniew kiba har rukom kum ka tuh ka thiem, ka jingshongsyier ka suk ka saiñ kylleng sawdong.
Ka kong Revereen Dkhar na ka NRLM Mawphlang Block ka la ai ka jingpynshai halor ka bynta jong ki Village Organization kaba kdup ïa ki Self Help Groups hapoh jong ka ban noh synñiang ban kyntiew ïa ka kamai kajih ki longkmie.
Ka kong Bidol Marbaniang, Staff Nurse ka Thaiñthynroh Health and Wellness Centre ka la kren halor ka phang jong ka koit ka khiah, khamtam ka jingshah ktah ka koit ka khiah ki khun samla kiba dang khynnah ka rta haba ki poi shongkha noh khlem pat dei por bad ïa ka koit ka khiah ki khun ban kha.
La ïoh ruh ïa ka jingkren na u bah Banraplang Kharbteng, Rangbah Shnong ka shnong Thaiñthynroh, ka kong Unity Kharbteng kaba kren pdiang sngewbha, ka kong Bandaris Sawkmie, Secretary ka Lamlynti Village Organization kaba kren ai khublei bad la pynïaid ïa ka jingïalang da u bah Banjop Kharryngki, Secretary ka Shnong Thaiñthynroh.
La pynshitrhem ïa katei ka jingai jinghikai da ki skit halor ki jingeh kiba mih na ka shongkha khynnah bad ki jingsniew na u drok.