Ka jingsiew bai lutksan ïa kiba iap ha phatok ka dei ban pynpei shkor ïa ka sorkar : HC

Shillong, Nailar 21 : Ka ïing Bishar High Court jongka jylla mynta ka Lah Sngi U Blei ka la pynksan ba ka jingsiew bai lut ksan ïa kito kiba iap ha phatok ym na ka jingpang ka dei ban long kum ka jingai jingsneng ne jingpynshitom ïa ka sorkar khnang ba ki bor ba dei peit kin pei shkor bad husiar ba kum kine ki jingjia ne jingiap kin ym jia shuh hadien habud.
“ Ka long ruh kaba biang eh lada pynshong dor ïa ka jingsiew bai lutksan da kaba pynshong nongrim ïa ka rta jong u ne ka briew ha ka por ba iap.Ka long ruh ka jingthmu ba ka dor jongka jingsiew bai lutksan ïa kiba iap mynsaw ne kino kino ki jingiap bym dei na ka jingpang hapoh phatok kan long kum ka jingpynshitom bad ka ban pynpei shkor ïa ka sorkar lada jia biang kum kine ki jingjia ba iap ha phatok ne byndi” ong ka ïing bishar ha ka hukum hadien ba la bishar ïa ka mukotduma PIL.
Ka sorkar kan hap ban ai jingkheiñ ruh katno ki don ki jingjia iap ha phatok, ha byndi ki pulit ne hangno hangno bad ban pynpaw ruh haduh katno kan hap ban siew bai lutksan.
Ka sorkar ka la pynmih ka jingpynbna mynshwa ba kan siew 7.5 lak ka bai lutksan sha kito kiba iap khlem pang ha phatok. Ka don pat ruh ka rai jongka ing bishar ha u snem 2018 ba ka bai lutksan na ka bynta kiba iap ha phatok na ka daw ka jingshah pynshitom ka long haduh 15 lak tyngka ia kaba ka sorkar ka la pdiang bad siew ïa kane ka bai lutksan.
Ka ïing bishar ka la pynpaw ba kat kum ka jingpyntip kaba mynshwa ki don 50 ngut ki briew kiba iap ha phatok ne byndi naduh u snem 2012 hynrei wat la katta ruh ka ïing bishar ka khot ïa kito kiba haïing jong kiba iap ha phatok ne byndi ba kin wan mih hahmat ka ïing bishar ha ka jingshong bishar ka ban long ha ka 28 tarik mynta u bnai.
La bthah ruh ïa u Rigistrar General ka ïing bishar ba un ai ka jingpynbna ha ki kot khubor halor kane ka jingpyntip na ka ïing bishar khnang ba kito kiba haïing kiba la duh noh ïa kiba ieit ba thoiñ jongki hapoh byndi ne phatok naduh u snem 2012 kin ïoh ban wan mih ha katei ka sngi shong bishar. ïa kane ka jingpynbna ruh la bthah ba dei ban siew da ka sorkar jylla.