Ka jingshai hadien ka jingdum: Ka Mission Solar u architect na Bengaluru sha ki longkmie ba die madan ha Shillong

Shillong, Jylliew 28 : Na ka bynta ki longkmie kiba die jhur, syntiew bad ki kynja jingbam ha ki ïew jong ka nongbah Shillong tang shu kem dum ka bneng ka la buh jingeh bha ïa ki ban bteng ïa ka kam ïadei ïa thied. Kane ka jingeh ka mih namar ka jingduna ka jingshai, kaba pynhiar ïa ka jingwan ki nongthied bad pynjur pat ïa ka jingma ha ka jingshngaiñ nalor ka pynlyngkot ïa ka por kamai jong ki kaba ktah jur ïa ka jingïoh kamai kaba rit lypa jong ki.
Kumta halor kane, na ka liang ka #BePolite, ka sienpyrshang kaba la sdang ha u 2017 da u architect na Bengaluru, u Ar. Aakarsh Shamanur, ka la trei shitom la jan shiphew snem ban pynbeit ïa kane ka jingeh jong ki kumba 10 million ngut ki nongdie madan ha India. Mynta u snem, kane ka jingpyrshang ka la poi ruh sha Shillong lyngba ka jingïatreilang bad ka Sauramandala Foundation (SMF), da kaba sam ei ïa ki kor jingshai kiba treikam da ka bor sngi ryngkat ki shatri kiba skhem sha ki longkmie nongdie madan kiba donkam tam, ong ka kyrwoh ba la phah na ka Sauramandala Foundation.
U Aakarsh u la shna ïa kine ki tiar ai jingshai kiba don ruh ka bynta ban charge mobile phone, bad la sam ei ïa ki sha ki longkmie nongdie madan khnang ba kin lah ban die jingdie kham slem nalor ba ka wanrah ka jingshngain bad khring kham bun shuh shuh ki nongthied jingthied. Da kane ka sienjam ki ïoh ruh ban die kham bun bad ïoh nong ruh kham bun khlem da donkam ban pynlut lane pynmih kino kino ki lyer jaboh.
“Kawei ka bor jingshai ka lah ban pynkylla lut ïa ka jingim jong kawei ka longkmie kaba trei marwei ha ka dukan hadien ba la sep ka sngi,” ong u Aakarsh.
Naduh ba la seng ïa ka, ka #BePolite ka la ai jingïarap ïa palat 500 ngut ki longkmie ha kylleng ka India. Kane ka la sdang ha Karnataka ha ka por Diwali, da kaba ai jingïarap ïa palat 350 ngut ki nongdie madan. Hadien kata ka la nang pynheh ïa ka jingïarap sha ki bynta jong ka rud duriaw Marina bad Besant Nagar ha Chennai lyngba ka jingïatreilang bad Wasted add Suitcase, ha kaba palat 90 ngut ki longkmie ki la ïoh jingïarap. Ka la poi ruh sha ki ïew heh jong Kolkata, ha kaba la ai jingïarap sa ïa palat 30 ngut ki longkmie.
Ka prokram ha Meghalaya, kaba la thmu ban sdang ha ka por lehkmen Diwali bad Christmas, ka la sdang shen mynta u snem lyngba ka jingïatreilang bad ka SMF, ka Centre for Accelerated Development kaba trei ban wad ki lad jingïarap na ka bynta ki shnong bad ki kynhun kiba ju mad ïa ki jingeh.
Ha ka bynta ba nyngkong jong kane ka prokram, ka #BePolite ka la poi sha palat 30 ngut ki longkmie nongdie madan ha ki ïew bad ki shnong sawdong ka Shillong. U Aakarsh dalade hi u la leit ban sam ïa kine ki kor solar light ryngkat ki shatri.
Ka pisa na ka bynta kane ka projek ka la wan na ki jingïarap kynthup na ka jingïalehkai pickleball kaba la long ha Bengaluru, ha kaba ki nongïalehkai ki la noh synñiang ban thied ïa ki kor solar. Kawei pat ka bynta ka la wan lyngba ka jingïarap CSR jong Trident Automobiles. Ki shatri kiba la sam ki long ruh ka jingïada na u slap bad ka suinbneng kaba ju kylla sted ha Meghalaya.
La jied ïa ki nongïoh jingïarap lyngba ka sur jong ki paidbah , katba ka SMF ka la peit ïa ka jingpynbeit bad jingïaid beit jong ka jingsam, ban pynthikna ba ka jingïarap kam kut tang ha ka nongbah hynrei ka poi ruh sha ki bynta bapher bapher jong ka Shillong. Kane ka pyni ïa ka rukom treikam jong ka #BePolite kaba shaniah ha ka jingïarap paidbah bad ka jingïatreilang bad ka imlang sahlang.
Kane ka prokram ka pynkut ïa ka snem kaba phra jong ka #BePolite, kaba pyni ba ka rukom treikam kaba pynïasoh ïa ka bor ding na ka sngi (renewable energy), ka jingïarap paidbah , bad ka jingsam jingïarap lyngba ka imlang sahlang, ka lah ban poi na ki duriaw jong Chennai, sha ki ïew jong Kolkata bad haduh ki lum jong ka Shillong. Ka pyni ruh ba wat ki jingïarap kiba rit ruh ki lah ban pynbha shisha ïa ka jingshngaiñ, ka burom bad ka jingïoh kamai jong ki longkmie nongdie madan.
Mynta ka #BePolite ka thmu ban pynheh ïa kane ka jingïarap ha Meghalaya shuwa ban kut une u snem. Ha ka bynta kaba ar, kaba la thmu ban pynlong ha ka por Christmas bad Snem Thymmai, ka thong ka long ban poi sha sa kumba 100 ngut ki longkmie nongdie madan shabar ka Shillong.
Na ka bynta mynta, ki longkmie nongdie madan ha ki ïew jong ka Shillong ki rah lem bad ki kawei ka jingshai na ka solar kaba rit hynrei kaba don ka jingmut kaba khraw — ka jingtip ba ki don ki briew na kylleng ka India kiba ngeit ba ki dei hok ban ïoh jingïarap, jingïada bad jingkyrshan.