Rahnam ka Shillong Conference ïa ki Nongrep Longkmie hakhmat ka pyrthei ha ka liang ka rep tynrai

Shillong, Jylliew 28 : Ka jylla Meghalaya ka la rah ïa ka nam ka burom jongka ym tang ha ka jingai jait sha ka kmie hynrei wat ha ka rep ka riang ruh namar ka rukom rep tynrai khlem sboh dawai kaba la leh da ki Nongrep Longkmie ka jylla ka la rah ïa ka nam ka burom ha ka International Conference on Women Fermers and Sustainable Organic Asia bad ka KfW Development Bank kaba arsngi hangne ha Nongbah Shillong. Kane ka Jingïalang bah kaba heh ba la wan poi ki Nongrep na kylleng ki ri kiba don kumba 400 ngut ei ei ka la kut noh ha ka sngi Thohdieng ha Convention Centre.
Ïa kane ka jingïalang ba heh la pynlong da ka MEGNOLIA kaba hapoh ka tnad jongka rep ka riang bad ka IFOAM Organic Asia. Ki Nongmihkhmat kiba la poi sha kane ka jingïalang ki long na ki 10 tylli ki ri bad ka long kum shi bynta ban rakhe ïa ka UN International Year of the Women Farmer.
Haba kren ha ka jingïalang pynhap pyrda ïa kane ka jingïalang ka Secretary jongka tnad ka rep ka riang ka Kong Isawanda Laloo ka la ong ba ka Meghalaya kan dang pynklain ban bei tyngka ban pynpaw sha ka pyrthei ïa ki mar rep mar riang na kane ka jylla. “ Ngin bei tyngka na ka bynta ki Nongrep bad ka lawei jongki” ong ka kong Laloo. Ka la ai burom ruh ïa u Myntri Rangbah ka jylla u Conrad Sangma uba don ka jingïadei kaba jan tam bad ki Nongrep longkmie namar u thrang ban kyntiew bad pynroi ïa ka rep ka riang tynrai ne kaba khlem sboh.
Kane ka jingïalang ka la kut noh da kaba ka MEGNOLIA ka la ïasoi ïa ka MoU bad ka IFOAM Organic Asia kaba dei ka soskular ïateh kaba jlan na ka bynta ka rukom rep tynrai khlem sboh dawai.
La ïarai lang ruhban ïatrei lang ban kyntiew ïa ki nongrep longkmie ha kaba pynïaid iew ïa ki mar rep jongki.
Ha kane ka sngi kut ka kong Trinity Saioo kaba la ïoh ïa ka khusnam Padma Shree ka la ong ba ka jingïatrei lang jong ki nongrep ka la pynlong ïa ki longkmie ban kamai jakpoh ym shuh na ka kam bylla hynrei na ka kam rep kam riang bad ka la ai khublei ïa ka sorkar jylla kaba la ïarap ïa ki ban pynïaid iew ïa ki mar rep jongki.
Ka la ong ruh ka jingkren jong u Myntri Rangbah duh ka ri u Narendra Modi shaphang u shynrai Lakadong ha ka G7 Summit ka la rah ïa ka nam jong ki nongrep longkmie ka jylla Meghalaya.