Nongstoiñ, Ïaiong 22: Ka jingpynkup bor da ki bor synshar ba ha khlieh duh ïa ki kynthei naduh ki khynnah haduh ki longkmie bad ki riew tymmen, ka la long shisha kum ka stieh kaba skhem ka ban ïada na ki jingshah thombor ba har rukom, la ka long ha ïing ha sem kum ka jingshah shoh shah dat, shah tim shah tla jong ka longkmie ha u lok, kaba ka aiñ ka la pynap lypa ban pynngat ïa uno uno u ba donkti ha katei ka bynta da ka aiñ ba kyrpang, kaba la tip kum ka Domestic Violence Act bad u ba ngat ha katei ka kyndon aiñ u hap ban shah set along bun bun snem.
Nalor kata ha kaba ïadei bad kiba donkti ha kaba thombor ïa ki kynthei khynnah da kaba ktah kti bad thmu bat bor, kren tohmet byrngem byrsit bad kiwei kiwei, ki la shah pynap lypa ha ka POCSO Act bad kiba donkti ban leh ïa kitei ki kam runar pyrshah ïa ki kynthei ki khynnah bad ki riew tymmen, kin ym lah ban lait na ka jingshong phatok da ki bun phew snem.
Nalor kata kawei pat ka aiñ kaba ïada kyrpang ïa ki kynthei, ka dei ka hok ban dawa bai bam da kaba leit ujor sha ïing bishar ïa uno uno u shynrang u ba pynkha khun, hynrei u khlem sumar bad u shu iehnoh khunrei da kaba leit shongkha noh da kawei pat ka briew.
Hynrei, watla ki bor synshar ba ha khlieh duh ki la pynkup bor haduh katta ïa ki longkmie, hynrei ki dang don shibun bah ki longkmie ki bym kwah ban leit pan jingïarap na ki bor ka aiñ lada ki shynrang ki pyndik ïa ki haïing ha sem, da kaba shoh ba dat, byrngem byrsit ban iehnoh khunrei da ki bun bun ngut, tang namar ba ki kwah ban pynhun ïa ka jingkwah brai ka doh.
Ha kaba ïadei bad ka jingbym kwah jong ki longkmie kiba ngat ha kitei ki apot, katkum ka jinglum jingtip bniah jong u nongthoh khubor, la lap ba ki don katto katne ki daw ba kongsan ba ki kynthei kim kwah ban leit pan jingïarap na ki bor ka aiñ ne na ka Ïingbishar haba ki ngat ha kitei ki bynta.
Kaba nyngkong ka dei ka jingsngew sang, namar hadien ba ka kynthei bad u shynrang ki la ïashong bad ki la ïoh khun, ki kmie ki kpa jong u shynrang ki la dei ki kmiekha kumta ban ïa kiew ïinglieh ïingsaw pyrshah ïa ki kmie kha kim sngew long satia.
Nangta ki don pat ki longkmie kiba sheptieng, namar u lok jong ki u byrngem byrsit ba lada kin leit pan jingïarap na ki bor ka aiñ, un pynhiar kput ïa ki ha kano kano ka por bad na ka jingsheptieng, ki hap ban shu sngap wat lada ki shem jingeh haduh katno katno ban bsa ïa ki khun. Nalor kine ki don bun byllien bah ki daw ha ka shongkha shongman bad imlang sahlang.
Ha kaba ïadei bad kine ki bynta, ka la donkam ïa ki bor sorkar ba kin thaw da kino kino ki lad ki lynti ban lum jingtip na ki nongsynshar shnong, na ka bynta ban ïoh jingkheiñ ïa ka jingdon jong ki longkmie kiba shah ieh khunrei. Lada ka jingbsa khunrei ka dei kaba kiba ha ïing ha sem lane ki hynmen ki para jong longkmie kiba shah ieh khunrei kim sngew ei ei, namar ki bit ki biang ka kamai kajih ban bsa ban pjiah bad ban kyrshan skul ïa ki khun haduh ba kin da dap khatphra snem shaneng, ki dei ban da ïasoi da ka soskular kaba biang bad ki bor ka aiñ.
Hynrei lada ki dei ki ba duk ba suk bad ki bym lah ban pynbiang bad kyrshan skul ïa ki khunrei kin ym dei ban ailad, namar ka jingbym biang ha ïing ha sem bad haba ka jingduk jingkyrduh ka ban ha ka jaka ba ki khynnah kin leit skul naduh ba ki dang rit ka karta ki hap ban leit bylla ha ki karkhana, ha ki dukan sha, ki Restaurant, leit bud trok, bad don ruh kiba pyrshang wat ban ïalang para lok bad ki nongkhaïi droks, khaïi kyiad beaiñ bad kiwei kiwei. La lap ruh bunsien ba ki khynnah kiba ju mlien ban pied ïa ki dukan ha ki jaka ïew haba tohkit, la lap ba ki dei ki khun pongka, ki khun kiba shah iehnoh ha u kpa bad kiwei kiwei.
