Ka jingpynkhihwin u Bah Ardent ka pynklumar jingmut ïa ki Garo ha khappud: P.Nongshlong

Nongstoiñ, Jymmang, 31: “Ka jingïakhih jong u bah Ardent Basaïawmoit halor ka jingmynthi jong ka sorkar ban peit bniah biang ïa ka bhah thungkam da kaba shah thngan khlem buh por, ka la pynklumar thlim ïa ki paitbah Garo kiba shong ha ki shnong khappud jong ka West Khasi Hills, khamtam eh ha kito ki shnong kiba hap ha ka Langpih sector”, ong u bah P.Nongshlong sordar jong ka shnong Mawïamsyiem.
U bah Nongshlong haba ïakren bad u nongthoh khubor u la ong ba ha ka shnong Mawïamsyiem, la jan baroh ki nongshong shnong ki dei ki Garo bad tang kumba katto katne ki longïing ki dei ki Khasi bad hadien ba u bah Ardent Basaïawmoit u la sdang ban shah thngan bad ba ki paitbah ki la tuid ban leit ai jingkyrshan ïa u, ki Garo na katei ka shnong Mawïam-syiem bad jong kiwei kiwei ki shnong naduh Kampha-duli haduh Kyrshai, ki la klumar jingmut hi thlim namar ba kim sngewthuh satia ba katei ka jingshah thngan u bah Ardent kamut aïu.
Ki la ong ha u ba imat ki Khasi ki mut ban beh noh ïa ki na West Khasi Hills ne ki mut kumno haba ki leh kumne. Hynrei u la pyrshang ban pynshai ha ki ba ka jingshah thngan jong u bah Ardent ka dei halor ka jingbym shimkhia jong ka sorkar ban peit bniah bad ban pynbha ïa ka bhah thungkam. Nalor kata u la ong ba wat la u la pyrshang ban pynshai katno katno ruh kiba bun kim sngew hun satia bad ki don hapdeng ka jingartatien bad ki la ong ba lada ki Khasi ki thmu ban beh noh ïa ki ka la bha ba kin leit noh sha Assam.
Utei u rangbah u la ong ruh ba ka jingbyrngem jong ki Garo kiba shong ha Khappud ban leit noh sha Assam ka dei hok, namar la palat sanphew snem ka sorkar Meghalaya kam ju phai khmat sha kitei ki jaka la ka long ha ki surok, ki skul, ka bording, ka umbam umdih bad ki skhim na ka bynta ki ba duk ba kyrduh. Hynrei ka sorkar Assam pat ka pynbiang bha ïa ka jingdon kam ki paitbah la ka dei ki skul, ka umbam umdih, ka bording bad kiwei kiwei.
U bah Nongshlong u la ong ruh ba lada ki briew jong ka sorkar Meghalaya ki wan sha kitei ki shnong khappud ba shong ba sah da ki Garo kin burom bha ïa ki bad ïa ki signboard kiba la buh ha kino kino ki jingtrei ba la mang pisa da ka sorkar Assam Meghalaya kin buh beit da ki jong ka Meghalaya, hynrei ynda ki briew sorkar ki la leit phai kin weng noh bad buh biang da ki sign board jong ka Assam.
U la ong ruh ba wat ki Khasi ruh ki don kiba la shah thung ha ka sorkar Assam, kum ki nongsam khaw reshon bad ki don bun ki Khasi kiba dei ki nongshong shnong katei ka thaiñ, kiba don ïa ki job card na ka bynta ka skhim MNREGS na baroh ar, kata na Meghalaya bad na Assam bad ki ration card ruh kumjuh. Dei na katei ka daw ba ka sorkar Assam ka sngew shngaiñ bad sngew skhem ban kyntur pud katba mon.
U la ong ruh ba ka jingnang bun jong ki Nepali ruh ka la nang pynsngew trai shuh shuh ïa ka sorkar Assam, namar haduh mynta ka jaka shong jong ki Nepali ka la ïar haduh ki rud jong ka wah Umit bad ka long ruh kaba phylla ba katba ki Nepali ki la shnong ïing ka sorkar Assam ka pynpoi bording elektrik.
U la ong kaba lyngngoh ka long ba ki Khasi ha ka thaiñ, lada u para Khasi u leit rep ha kano kano ka jaka ka bym pat don ba rep mynno mynno, ka jingïaklumar ka jur bha namar ka jingïakam trai ïa ki jaka. Hynrei, lada ki Nepali ki rep katba ki sngew bit ym don ba nud saham bad lada katei ka jinglong kan dang ïai bteng ha kaba khatduh ki Khasi kin ym don shuh wat tang ka jaka shong ïalade ruh.