Ka jinglaitluid ka Ri bad jingjop ka synshar khadar ka shong ha ngi

Sa shisien pat ngin rakhe bad kynmaw ïa ka jinglaitluid ka Ri na ka jingsynshar ki nongwei na sha shilliang duriaw. Ka 15 tarik u ‘Nailar ka dei ka sngi ba kum ka Ri ngi rakhe ban kynmaw ïa ka sngi ba ka Ri ka ïoh ïa ka jinglaitluid ba ngi ïoh ïa ka hok kum ki trai Ri ban synshar da lade ïa lade.
Haba ngi phai ïa ka jingïakhun ki kpa bad kmie tymmen jong ngi ban ïoh ïa ka jinglaitluid ka long ka jingïaid lynti kaba ki hap ban mad bad ïakynduh ïa ki diengdyngkiang kiba bun. Bun na ki nongshong shnong ka Ri India ba-ïar ki la duh la ka jingim ha kane ka jingiakhun bad ka Ri ka mad ruh ïa ka jingtynjuh ha ka jinglong kawei namar ka jingmih ki kynhun kiba dawa ha la ki jong ki nongrim.
Hapdeng ki kynrum kynram kiba bun ba ki nongialam ka Ri ki mad ban pynurlong ïa ka jingthrang uba bun balang ban ioh ia ka jinglaitluid, ka jingïatylli bad jingthrang ki trai Ri ka la pynlong ïa ka sorkar Phareng ha kaba khatduh ban pyndem ha ka sur uba bun balang ban iehnoh ïa ka ri India bad aiti noh ïa ka synshar khadar ha ki trai Ri. Kane ka la pynlong ba ka Ri kan ïoh ïa ka jinglaitluid ha ka 15 tarik u ‘Nailar ha u snem 1947.
Hadien ka jingïoh ïa ka jinglaitluid, ka Ri ka la ïoh ïa ka hok ban synshar da lade ha ryngkat ka thong ban kyntiew shaphrang ïa ki kam pynroi ka Ri ha baroh ki liang. Ban ïoh ïa ka synshar khadar kaba jop bad seisoh ka shong ha ka jingsngewthuh bad jingkitkhlieh jong baroh ki nongshong shnong da kaba pyndep hok ïa ka la ka kamram ban jied thymmai ïa ki nongmihkhmat sha ki ïingdorbar thawaiñ da kaba leit sha ki jaka thep vote haba don ki elekshon jied nongmihkhmat khlem kano kano ka jingpyrkhat myntoi shimet hynrei ban pyrkhat ïa ka bha ka miat ka jylla bad Ri baroh kawei. Dei lyngba ka jingshimkhia bad jingkitkhlieh jong baroh ki nongshong shnong ngin ïoh ïa ki Nongïalam kiba kynsai ban pyntyllun ïa ka synshar khadar bad ban kyntiew ïa ki kam pynroi salonsar.
Ka Ri ka dang donkam ban weng ïa bun ki jingtehmraw khamtam ki jingsniew kum u drok, ka jingïapait ïapra, ki jingkhñium tang ha ki rympei iïng bad kiwei kiwei. Ka jingjop halor kane ka bynta ban weng ïa ki jingtehmraw kiba ktah ïa ka jingkiew shaphrang ka Ri ka dei ka jingïasnohktilang jong baroh naduh ka por ban jied ïa ki nongmihkhmat kiba kylla long ki nongsynshar, ka jingïatreilang bad ki tnat sorkar ha ka jingpyntreikam ïa ki kam pynroi bapher bapher bad ruh ban wanrah ïa ka jingïatylli bad jinglong kawei.
Ai ba ka jingrakhe ïa ka sngi laitluid ka Ri kan pynkynmaw ïa ka jinglenlade bad aiti ne sacrifice ba ki Nongialam ka Ri ki la aiti ïa lade ban pynlong ïa ngi ba ngin ïoh ïa u soh ba ngin synshar da lade ïa lade bad ka dei ka kamram jong ngi pat ban kyntiew ïa ka Lama Lai Rong ka Ri da ka mynsiem jingkitkhlieh ban pyntyllun ïa ka synshar khadar kaba jop ban pynurlong ïa ki kam pynroi ha baroh ki liang bad ban weng ïa ki diengpyngkiang kiba tehmraw ïa ka jingkiew shaphrang ka Ri.