Ka jingjia ïaka samla Walinda kan pynsyier ïaki kmie ki kpa ban phah pule ïaki khun shabar jylla

Nongpoh, Jymmang 01: Ka jingïap jong ka samla Walinda Binong haka jaka pule jong ka ha Mody University jong ka jylla Rajasthan kala long pynban ka khubor ban pynsyier ïaki kmie ki kpa ban phah pule ïala ki jong ki khun shabar jylla kumba ka jingïap jong katei ka samla ka pynsah umdum ïaka ïing ka sem bad ka thaiñ baroh kawei.
U Mawphor, u la pyrshang ruh ban ïakren bad katto katne ki kmie ki kpa bad ki riew rangbah kiba la wan ban sngewlem ïaka ïing ka sem jong ka samla Walinda ha kaba kila pynpaw ba lada ki samla pule kim shngaiñ ban pule lane ban trei shabar jylla kan pynduh bad pynrit mynsiem ïaki kmie ki kpa ban phah wad jingnang jingstad ïala ki khun jngai nala ïing.
Kila pynpaw ruh ba lyngba kum kine ki jingjia ka sorkar jylla lyngba ka tnad pulit ki dei ban shimkhia ban pynlong ka jingtohkit halor katei ka jingjia ban lap ïaka daw tynrai jong ka jingkhlad katei ka samla dang haka rta kaba 19 snem nalor ba katei ka samla ka dei kaba ju pynpaw ïaki jingeh sha ki kmie ki kpa bad ruh ka dei ka samla kaba kham stad haka jingpule.
Kum ban shu kdew hangne ba kum kine ki jingjia kiba pynsah lyngngoh ïaka ïing ka sem halor ka jingïap ki khun shabar jylla kam dei shuh ka sien kaba nyngkong, ha kaba ha snem 2018 kawei ka samla bala tip kyrteng kum ka Wandalin Kongor 22 snem ka rta naka shnong Purdua Kharpati kala shah pynïap dusmon haki runar ha nongbah Delhi kaba pynsah umdum ïaka ïing ka sem kumba kadei ruh ka khun kynthei ba marwei kaba mih nala ïing ban leit trei shabar jylla ban pyndap ïaka ïing ka sem, hynrei ki khubor kila saphriang bala lap pynban ïaka metïap jong katei ka samla ha nongbah Delhi kaba la wanrah ka jingïam kthang ïaka ïing ka sem jong katei ka samla.
Halor katei ka bynta katto katne ki kmie ki kpa bad ki riew rangbah kila pynpaw ruh ba lada ka long ha kane ka rukom ba ki samla khasi kim don jingshngaiñ shabar jylla kan pynkhim mynsiem bad pynsyier ïaki kmie ki kpa ban phah wad jingnang jingstad jngai nala ïing lane ban phah leit trei ïaki shabar jylla bad ka dei ka kamram jong ka sorkar ban ai jingshngaiñ ïaki samla kiba mih nala ïing ban leit shabar jylla la ki long kiba trei ne kiba pule.
Shuh shuh halor katei ka jingjia ïaka Samla Walinda Binong bun naki paidbah kila pynpaw ba ka sorkar bad ka tnad pulit ka dei ban shimkhia ïa katei ka jingjia ban pynlong ka jingtohkit khnang ba kum kitei ki jingjia kim dei ban jia shuh nangne shakhmat.