Shillong, ïaïong, 30: Ka prokram Radio kaba manla u bnai jong u Myntri Rangbah duh ka ri ka ‘Mann Ki Baat’ ka la kot sha ka bynta kaba 100 sien ha ka sngi U Blei.
Ïa kane ka jingai jingkren jong u Myntri Rangbahduh la pyni kyrpang ha kylleng ka ri India bad kynthup ruh ha Raj Bhavan, Shillong ha kaba ki riewpawkhmat na ki bynta bapher bapher ha ka Jylla ki la sakhi ïa kane ka jingpyni kyrpang ïa ka prokram.
Ki lad pathai khubor ha Shillong hapoh ka Tnat Information of Broadcasting, ha ka jingïatreilang bad ka Raj Bhavan, ki la pynlong ïa ka jingpyni kyrpang ïa kane ka prokram radio kaba pawnam.
U Lat ka Jylla Meghalaya, u Phagu Chauhan uba la long kum u kongsan ha kane ka sngi, u la ong ba ka ‘Mann Ki Baat’ ka la pynkhlaiñ ïa ka jingïasoh hapdeng u Myntri Rangbah duh bad ki briew jong ka ri, kumjuh ruh ka la ai mynsiem ïa ki ban long ki nongwanrah jingkylla ha ka roi ka par ka ri jong ngi.
U Chauhan u la ong ba ka “Mann Ki Baat’ ka la mih kum ka bor jingkylla ban pyni ïa ki bor kyllum jong ki briew ka ri.
“Lyngba ka prokram, la ïakren ïa ki phang bapher bapher, la ka long ha ka jingpynkhlaiñ ïa ka roi ka par kaba lah ban ïaineh, ki sienjam ban pynkupbor ïa ki longkmie, ki lad ban pynkhlaiñ ïa ka jingïakhih Aatmanirbhar Bharat, ka jingkyntiew ïa ki kam ïalehkai, ki bynta ba kongsan jong ka deiriti jong ka ri bad shibun kiwei kiwei,” ong u Lat.
U la pynpaw ka jingsngewnguh ïa u Myntri Rangbah duh uba la kren shaphang ki jinglong ba kyrpang jong ka thaiñ Shatei Lammihngi ha ka prokram ‘Mann Ki Baat.’
Ka thaiñ Shatei Lammihngi khamtam ka Meghalaya, ka la don ka jaka ba donburom ha ka prokram ‘Mann Ki Baat.”
U Myntri Rangbah duh u la kren shaphang ka thaiñ shatei lammihngi bad ka Meghalaya la bun bun sien naduh ba la sdang ïa kane ka prokram.
U la ong ruh ba ka ‘Mann Ki Baat’ ka la long hakhmat ban pyni ïa ki kam kiba ai mynsiem ha ki jaka nongkyndong jong ka ri kynthup ki jaka rilum kumjuh ruh ki aspirational distrik.
U Lat u la pynpaw ka jingsngewkmen ban ïoh sakhi ïa ka jingpyni kyrpang ïa ka bynta ba 100 sien jong ka ‘Mann Ki Baat’ ryngkat bad ki riewpawkhmat ba kyrpang kiba ka kam bad ka jingim jong ki ruh ki ïahap bad ka jingngeit jong kane ka prokram- kaba long ka kam ban ïarap ïa kiwei.
U Lat u la plie ruh ïa ka Exhibition halor ka Change-makers bad ka Azadi Ka Amrit Mahotsav ba la pynlong ha phyllaw jong ka Raj Bhavan da ka Central Bureau of Communication, Shillong.
