U MLA ka Sohra u dei ban rah lang bad ki mat kam pynroi ha ka jingleit pynïasoh bad ka NPP: MS Jyrwa
Shillong, Jymmang: U Bah Michael S. Jyrwa uwei na ki riew rangbah na Laitlyngkot kaba hap hapoh ka Sohra Constituency ula leit buh da ka shithi kyrpad hakhmat u MLA ka Sohra Constituency, U Bah Gavin M. Mylliem ba u dei ban da rah lang ruh ïa ki Mat Kam-pynroi ïa ka Constituency hakhmat ka party NPP kaba lamkhmat ïa ka jingsynshar ha ka jingleit pynïasoh pura bad katei ka party.
U Bah Michael ula pynpaw ba u MLA u dei ban ïateh kular bad ka Party NPP ba kan pynurlong ïa ka jingkyntiew kyrdan ïa ka Sohra Civil Sub-Division sha ka kyrdan District ba pura kaba ki paidbah ki la angnud la bun bunsnem.
U la kyntu ruh ban buh noh ïa ka Community College ha Laitlyngkot khnang ban kyntiew ïa ka jingnang jingstad ha katei ka thaiñ, ban kyntiew ïa ka surok Shillong -Sohra na Hynñiew Mer shaduh Sohra sha ka kyrdan Four (4) Lane Road kaba dei kawei na ki surok ba donkam jong ka Jylla na ka bynta ki nongjngohkai pyrthei.
U la kyntu ruh na ka bynta ban pynim lane pyntreikam biang ïa ka Karkhana Meghalaya Cement Corporation Limited (MCCL) kaba long kum ka pliang ja na ka bynta ki paidbah jong ka thaiñ Sohra. Ban kyntiew kyrdan ïa ka PHC Laitlyngkot sha ka kyrdan CHC khnang ban pynsuk ïa ki nongpang jong katei ka thaiñ. Ban kyntiew ïa ka kam Jngohkai pyrthei (Tourism) khamtam sha ki thaiñ Laitlyngkot khnang ban plie lad ïa ka ïoh ka kot jongkipaid bah bad ban thaw lad thaw lynti ruh na ka bynta ban weng ïa ka jingeh ba ki paid nongrep ki ïakynduh na ka snem sha ka snem.
Nalor kata na ka liang utei u riew ryngbah lyngba une u kyrwoh ula pynpaw ba ka thaiñ Sohra ka dei kaba pawnam naduh ki por barim bajah naduh ki jingpynlong kyrpang u Blei ïa ka mariang kaba la khring ïa ki nongwan jngohkai na kylleng ka pyrthei, ka jingïoh nyngkong ïa ka jingnang jingstad, ki matti ba bun rukom jong ki riew hyndai bad kiwei kiwei, hynrei phewse ki nongshong shnong jong katei ka Constituency pat, ki im hapdeng ka jingduk bad ka jingsahdien namar ba duna palat ki lad pynroi (development) na ka sorkar hajan baroh ki liang.
Kumta na ka liang utei u riew rangbah u la ong ba lada u MLA u shimkhia bad rah lang ïa kitei ki jingeh hakhmat ka party NPP kaba synshar ïa ka Meghalaya kan long ka jingkyrkhu kaba khraw ïa ki paidbah jong ka Sohra Constituency hi baroh kawei.