Ka jingim bad ki jingnoh synñiang jong u Babu Rabon Sing Kharsuka

Shillong Naiwieng 17: La kha ïa u Babu Rabon Sing Kharsuka ha u snem 1840 ha ka por ba ka Welsh Mission ka dang shu pynnoh kjat ha ki lum ka Ri Khasi Pnar. U pule ha ka skul Mission ha kaba u hap ban ïaid kjat 8 km man ka sngi ban ïoh ïa ka jingnang jingstad. Hapdeng u slap bad ka lyer u la trei shitom bad minot thop haduh ba un da pass ïa ka Minor Examination.
Ha u 1864, British East India Company ka la pynkynriah noh ïa ka sor na Sohra sha Shillong. U Rangbah Rabon Sing u la ïoh ban rung kam ha kane ka ïing shon -kot lyngba ki dulir jong ka jingpule. Ha ka rta kaba 30 snem u la ïoh ïa ka jingshem mynsiem bad u la kylla Khristan.
I lok jong u Rabon Sing i dei i Riangmai Lyngdoh Buam, i dei na ka ïing kaba bat pyrkhing ïa ka lehniam leh rukom ha ka shnong Thangbuli War Jaiñtia. Namar ba i kwah kylla khristan, i lah shah tait noh na ka ïing bad i shong bad sah bad ki sahep Missionnary, u Rev Jarman Jones.
U Rabon Sing wat la u jngai na la ki nonghikai Missionary ha Nongsawlia hynrei u la ïa leit ïa wan bha bad kiwei pat ki Sahep Missionary ha Shillong. Dei lyngba kine ki Sahep Missionary ba u la ïa kynduh ïa i Riangmai Lyngdoh Buam ha kaba ki la ïa poi kha poi man ha u snem 1876 bad ki la im ka jingim khristan ba riewblei.
Ki don 12 ngut ki khun bad kiba im pat ki long 7 ngut. Uwei u shynrang – U Bah Rolip Singh Lyngdoh bad 6 ngut ki kynthei 1. I Shilamon 2.I Lilamon 3. I Rilamon 4. U Bah Rolip Singh Lyngdoh 5. I Wilamon 6.I Drilamon 7. I Eltinoris.
Hadien 17 snem ba la trei ha ka Government press U Rabon Singh u la resaiñ noh na la ka kam bad ryngkat bad i lok, ki la leit ban hikai ha ki skul Mission ha Umwai, Riwar bad ha Mawmluh.
U Rabon Sing u ju leit ban ïathuh khana bad ïalap ha ki jingïaseng presbytery ha kylleng ka Ri Khasi Jaiñtia.
U la long Tymmen Basan jong ka Balang Mawkhar Presbyterian, Shillong ha ka snem 1883. Ha ka snem 1884, u la leit seng ïa ka Balang Presbyterian ha Mawmluh.
Ki jingthoh ba U Rabon u pynmih ha ki kot khubor ba kyrteng U Nongkit Khubor, (Kyllalyngkot) Jan. 1893, Ka Kyndiah Sang, U Nongkit Khubor, Risaw (Oct) 1893
Nangta ki kot kiba kynthup ïa ka Ka Niam Khasi, U Khasi Mynta Risaw (Oct) 1897, Ka Jingduwai Knia, U Khasi Mynta Nailar (Aug) 1902, Ka Por Synrai, U Nongïalam Katholik 17th Lber (March) 1903, Ka Laitkynsew, U Nongïalam Katholik, Jylliew (June) 1903, Ki Kot Khubor Khasi, U Nongphira Nailur (Sept) 1905. 1.U Slap Sohra, 2. Ki Hurjem, 3. U Soh Lapuiat, 4. Ka Jingïasiat, U Nongphira, Ïaïong (April) 1907, Ka Dawai Jyrhoh, U Nongphira, Jylliew (June) 1907, 1. U Lum ïawpaw, 2.Sohniamtra, U Nongphira, Nailur (Sept) 1907.
Nangta shaphang ka Jingjnang shiah Dohkha, Puh Bseiñ, Ka Jingdih Kyiad. Shaphang ka kitab Niam Kheiñ bad Kitab Jingphawar. Ka “Kitab Niam kheiñ” la pynmih pyrthei ha ka snem 1897-1900 bad ka “Kitab Jingphawar la pynmih pyrthei ha ka snem 1903-04.
Kine ki kot Ka “Kitab Niam Kheiñ” & Ka “Kitab Jingphawar” ki la ïalam ïa kiba bun ki Nongthoh shaphang ka Niam Khasi, dei na kine ki jingthoh ba u Col P. T .R. Gordon u la ïoh nongrim ban thoh shaphang ka Niam Khasi ha ka kot jong u kaba kyrteng “The Khasis”, nangta u Bah Sib Charan Roy, u DR. H. Lyngdoh u Rev. Fr. G. Costa bad kiwei kiwei.
Shaphang ka Kot Puriskam ha ka 15 tarik Rymphang 1908 la pynmih ïa ka ”Puriskam”, kane ka kot “Puriskam” jong U Rabon Sing ka la ai mynsiem bad ai nongrim ïa kiwei ki nongthoh kiba hadien kiba lah pynwan ha ka dur ki poitri, ki drama ne ki jingïathukhana. Kita ki long, “Ka Nam” bad “ka Biria u Bieit” ki poitri u Babu Soso Tham, “Ka Dienglieng” Ka poitri u Dr. Homiwell Lyngdoh Nonglait, “Ka Tiewlarun” Ka drama u Bah S.J.Duncan, “U Baieit Donshkor” ka drama u Bah Dewi Singh Khongdup, “Ka Saia Nongum” ka poitri u Babu Victor G. Bareh, (a) “U Bieit bad ka khun u Patsha” (Khana 1995), (b) “Hima jingieit jong nga” (poitri 1994) (c)”Ka Shatai ka Tiewlarun” ( poitri 2005), (d) “Ki Sur Shongsbai” (poitri) ba lah thoh da u Rangbah Kitbor W Nongrum.
Ki jingkynthoh ki myllung ba hadien bad kiwei kiwei shaphang U Rabon Sing Kharsuka ki long, u Babu Mondon Bareh u ong kumne, “Ngam lah ban sngewthuh ïa i Parad jong phi ba u briew ha Mawmluh ha kaba dang kum kato ka por ba in phohsniew ban thoh kot thoh sla.”
U Sahep J. Ceredig Evans u ong, “u lok barim jong nga u babu Rabon Sing.” U Soso Tham u phla kumne “Ha phi ki khun ki ksiew (jong u Pahep Rabon Sing) Nga kynmaw bad ngan phla ba ka bor ka mynsiem ïa nga dei i Parad jong phi.” U Prof.R.S. Lyngdoh pat u thoh kumne:- “Haba ngi peit ngi bishar ïa ka jingim jingman ka longbriew manbriew, ka pyrkhat pyrdaiñ bad ki jingthoh jingta jong u, ngi shemba u Pahep Rabon Sing um long tang u nonghikai ba nang, u Tymmen Bsan bahok u Rang Khasi nylla bad u nongthoh ba khraw, hynrei u long ruh u khraw pyrkhat khraw jutang-u Lyngwiar pyrkhat jong ka jait bynriew Khasi. Ka Khasi Literature, Ki Riti ki Dustur bad ka Pyrkhat Khasi ka la roi haduh katne mynta namar ba u Pahep Rabon Sing u la prat shisha na ka phang kaba dei bad ba u la seng ïa ka nongrim ha u mawsiang ba skhem jong ka Pyrkhat Khasi”.
“Hynrei katba ka thoh ka tar ka nang kiew irat ha ka kti ki Missionary, ka pyrkhat Khasi pat ka nang hiar bad nang randien. Kane ka leit long namar ba ki Missionary kim pynshlur bad kim pyrshang bad kim pyrshang ban pynrung ïa ka pyrkhat Khasi ha ki kot ki sla. Dei tang ynda la wan mih pyrthei ki jingthoh jong ki rangbah Khasi hadien ka snem 1890 ba ka pyrkhat Khasi ka la sdang ban snoh biang bad ba ka la rung ha ki jingthoh jingtar. U Babu Jeebon Roy Mairom, U Pahep Radhon Singh Berry jait Dkhar ki long ki simpah simpieng simsong jong ka pyrkhat Khasi ha ka Khasi Literature.
Hynrei dei u Pahep Rabon Sing uba la pyllait nyngkong eh ïa u namthang jong kane ka rukom pyrkhat Khasi bad to to ngin ïa bud ïa ka jingtrei ba radbah jong u (Rabon Sing) ha ka ban kyntiew ïa ka nongrim jong ka pyrkhat Khasi ha ka Thoh ka Tar”.
U Bah F.M Pugh u thoh: “Ka poetry ba don nam jong u Babu Soso Tham ïa ka ‘Nam’ ïa kaba la ban ong ka palat ïa ka ‘Lucy Gray’ u William Wordsworth, ka wan na ka jingïathukhana i Pahep Rabon Sing.
Ha ka diari jong u Sahep J. Herbert Roberts kaba kyrteng “A World Tour”, (u ba long u lord Clwyd jong ka ri) ryngkat bad ki paralok jong u, u Sahep H.R. Davies bad u Sahep J. Herberts Lewis – 6th kyllalyngkot 1885 ki thoh kumne:- “Ka lynti ïaid ka long kaba khohruh khoh ram bad ha ki jaka jaka la hap ryngkang ïa ki her her ktieh hynrei bam tip tieng, u paid synran u la ïai ïaid ryngkat bad ngi, bad ha kumta shiteng kynta ngi la ïa poi ha ka shnong rit jong ka Mawmluh, ha kaba don ka Skul mision ba la pynïaid da uwei u samla ba nylla ka long briew man briew, u Rangbah Rabon Sing, uba la iehnoh ïa ka kam baheh tulop bad kyrdan ha ka kam sorkar khnang ban long u Nonghikai Kristan ha ka tulop kaba kham rit shibun – ‘ka nuksa jong ka jinglenlade kaba pynpyngngad mynsiem ha kine ha kine ki sngi. Katba ngi la nang ïaid lyngba ka shnong ïa uwei u sniang la knia ha ki ksuid, ka jingïohi ba i-jew mynsiem. Ngi la ïa sangeh khyndiat minit ha ka kamra skul, bad la pynithuh ïa ngi ha u Rangbah Rabon Sing bad ka tnga jong u, kaba ïarap ïa u ha ka hikai. U la pynïaid ïa ka skul ha ki sngi pohïa bad ïa ka jingïaseng pat ha ki sngi U Blei. Bun na ki khynnah ki leit jingïaseng bad ki pynkohnguh ïa ki kmie ki kpa jong ki ban ïawan bad ki, ha kane ka rukom shibun ka kam babha la leh, bad don ka jingai jingkyrmen baroh ba yn lah seng Balang ha Mawmluh.
U Babu S. S Majaw u thoh, “Lada phai sha ka liang ka Kheiñ ka Bishar u Rabon Singh u la kot ryngïeng ïa ka ban ai ha u ïa ka kyrteng kaba dei ban ïoh da uno uno u Rationalist uta u briew uba ngeit ha ka sap bad ka bor pyrkhat kaba u Blei u la ai ha uwei pa uwei u briew”. “U Rabon Sing u dei u Cosmogonist”. “U Geordano Bruno (u Italian Philosopher) kiba ïathuh ba ka pyrthei ka dei ka jingpynlong; hynrei ym kumta ruh ïa u Rabon Sing, namar ki nonghikai jong u kim ju pynrung hapoh jong u ïa ka pyrkhat Khasi. Ha ka por kaba kum kata, u Rabon Sing, lyngba ki bor bad ki sap ba la ai da u Nangthaw hi, u sei madan ïa ka pyrkhat Khasi kaba pynïaryngkat kyrdan ïa u bad u Geordano Bruno. U Rabon Sing, khlem da tip ne pule ïa ki jingthoh u Bruno, u la lah ban pei phang ba ka pyrthei bad kiei kiei ki dei ka Natura Naturata- ka jingpynlong u Blei”. “U Rabon Sing kum u riew pyrkhat u ïakot tyrpeng bad uta u St. Augustine – u stad pyrkhat ka Tagaste u ba la long ba ka jingsniew ba sniew tam dei kaba phai noh na u Blei”. “Hynrei ym shem la don kano kano ka jingsngew sheptieng ka ban pynsngew syier mynsiem ïa ki jingmut jong ngi lada ngin ong ba haba la thew tara jur bha ïa ka jingim bad jingtrei u Rabon Sing yn shem ba ka pansara ksiar ka jingim jong u ka khia katta katta: bad u long namar kata u ba bit eh ban ïoh ïa ka nam kum “U Kpa ka Pyrkhat Khasi”.
Ki Mawjynthut U Rabon Sing 1. Kaei kaba la pynpangnud ïa U Pahep Rabon Sing ka long ka jingkynthoh u Sahep J. Herberts Roberts ha ka kot “A World Tour” ba “Ïa uwei u sniang la knia ha ki Ksuid”. Dei ka mynsiem sngewrem ïa la ka jaitbynriew bad ïa la ka Niam tynrai ha ka jingshah kren beiñ kren kynthah ha ki nongwei kaba la pynlong ïa u Pahep Rabon Sing ban wad bniah ïa ki tynrai ka Niam Khasi bad ïa ka kheiñ ka bishar, ka knia ka khriam bad ka duwai ka phirat kiba ïa snoh bad ka Niam Khasi.
Dei ha ka por ba ka pyrkhat Khasi ka la wan kylla dien trai biang ha ka jabieng bad dohnud jong une u Rangbah Rabon Sing ba ka khrew pat ka la ban jur ïa ka met jong u, ka jingpang Cardiac Dropsy. La kit kylleng ban ïohkhiah bad la pynlut shibun hynrei kyndit ki nong pynïaid ki la weng kam khlem isynei. Ynda u Rabon Sing u kyrpad hynrei khlem patiaw nalor ba ki khun 5-6 ngut ki dang rit.
Ka Jingïadei bad ka Niam Katholik, katba ka jingïadei jong U Rabon Sing bad ki Welsh Missionary ka nangjngai nangjngai, ka jingïadei jong u bad ki Salvatorian Phadar pat ka nangjan nangjan. U Rev Phadar G. Abele uba don la ka kor shon-kot ha Laitkynsew bad uba la pynmih ïa ka kot khubor “U Nongïalam Katholik” naduh ka snem 1902, u la kylla long u lok ba jan tam jong u Pahep Rabon Sing. Kumta ha kane ka snem, u Pahep Rabon Sing u la pynmih kawei ka poem kaba Lai dkhot kaba kynthup 8 laiñ shi dkhot shaphang “Ka Por Synrai”.
Ha u snem 1903 pat sa kawei ka essay shaphang “Ka Laitkynsew”, ka shnong ïa kaba u Phadar G. Abele u da ieit eh. (He explain about beautifully the history related to Laitkynsew). Ha u snem 1909 ha ka kot khubor ”U Nongïalam Katholik, U Rabon Singh u thoh, “Ka jingduwai kma” kaba long kawei na ki jingthoh ba paw. U thoh ïa kane ha ka rukom phawar ha ki khyndai tylli ki synrop bad la soi kyrteng 11.6.1909.
Kine ki jingthoh u Rabon Sing baroh lai tylli la lum da u Rev. Fr. J. Bachiarello S.D.B bad la shon ha ka kot ”Ki Dienjat jopng Ki longshuwa”. Ki Sngi ba khatduh U Rabon Sing. Ha ka 16 tarik u Naiwieng jong u snem 1910 une u Rangbah Rabon Sing Kharsuka uba long u Nongthoh Kot Khasi ba pawnam u la khlad noh na kane ka pyrthei ha kaba dang 68 snem tam ka rta. Ha ka por ban leit tep ïa ka met jong u la tep ha ka jaka jong u hi ha Mawmluh, ki Phadar na ka Balang Katholik bad ki Sahep Missionary jong ka Presbyterian ki la dawa ban pyndep ïa ka jinglehniam ïa ka jong u. Kaba sngewtynnad ban tip ba kine ki Rangbah niam Khristan ki poi ha ka jingmynjur ba kawei ka Balang kan pyndep ïa ka niam ka rukom ha Ïing bad kawei pat ha ka jaka jingtep. La tei ïa u mot ha kane ka jaka tep kum ka jingkynmaw ïa une u Nongthoh bad hajan une u mot don ruh ka ïing jong u kaba dangsah haduh mynta mynne bad mynta lah shna bha bad pynthymmai pat kumne. Ki dang don shuh kiwei ruh ki jingthoh (manuscript) jong u Rabon ha ki kot sada hynrei ym don mano mano ban bat ïa ki.
Kine kidei ki Kot ba thoh shaphang u Rabon Sing Kharsuka 1. Ki Syrwet Jingshai – ba la thoh da I Babu S.S Majaw. 2. Ka Jingim I Parad Rabon Singh – ba la thoh da I Bah W. Linningstar Lyngdoh, 3. Ki Nongthoh-Kot Khasi Bynta-1 – ba la thoh da I Bah Kitbor W. Nongrum, 4. Ki Nongtei ïa ka thoh ka tar Khasi; U Pahep Rabon Singh Jaid Kharsuka (1840-1910) ba la thoh da I Prof. R.S Lyngdoh, Speaker Barim, Meghalaya Legistative Assembly – La pynmih ha ka Soso Tham Birth Centenary Celebrations Souvenir (1873-1973).
Lah ban ong ba ha ka jingrakhe ïa ka lyngkhuh sngi khlad noh kaba 114 jong u Pahep Rabon Sing Kharsuka la pynlong ha ka sngi Saitjaiñ ha kaba u MP ka Rajya Sabha u Dr. W R Kharlukhi na ka seng NPP u la long u Kongsan, ha ka jingïadonlang u Principal Secretary ka tnat Art’s and Culture ka sorkar jylla u Bah F R Kharkongor, u Dr. Sylvanus Lamare principal barim ka St Edmund’s College Shillong, bad la pynïaid ïa ka jingïalang da ka Prof. Streamlet Dkhar na ka department Khasi ha NEHU, nangta Dr. Darilin Lyngdoh HOD Khasi Linguistic, bad la pynïaid ïa kane ka jingrakhe kynmaw burom ïa ka sngi khlad u Babu Rabon Sing Kharsuka da ka Rabon Sing Kharsuka Memorial Committee ka Linguistic department NEHU bad ka thiar Lyngwiar Dpei Society bad ha kane ka sngi ka la don ruh ka jingsam ïa ki khusnam ïa ki samla pule kiba la ïoh heh ha ki mark ha ka ktien Khasi napoh ka tnat pule Khasi ka NEHU.
Ka jingrakhe ïa kane ka prokram la pynlong ha Seminar Hall jong ka Soso Tham auditorium Shillong ha kaba u Dr W R Kharlukhi u la long u Kongsan uba la ïaroh ïa ka ïing ka sem jong I Kong Eldora Betsy Lyngdoh bad u Bah Ransom Sutnga kiba la bteng haduh kine ki sngi ban rakhe bad kynmaw burom ïa u Babu Rabon Sing Kharsuka uba dei uwei na ki riewkhraw pyrkhat jong ka jaitbynriew Khasi.