Shillong, Naiwieng 17: Ka khubor ba la ïoh na ki pulit la ïathuh ba u Rangbah Shnong jong ka Mawkhyrwang kaba hab ha SWKH u la phah ka jingujor ba ha ka 8 tarik mynta u bnai 7.30 mynmied, ha kaba 3 ngut ki nongshong shnong jong ka Mawrap la kynnoh ba ki la ktah kti ïa arngut ki nongshong shnong jong ka shnong Mawkhyrwang ha Ïew Wahlapung (SWKH).
Halor kane ka jingjia, kitei ki lanot ki la mynsaw jur bad ha kaba la pynkit noh sha Sub-centre Mawkhyrwang.
Ha kawei pat ka jingjia kawei ka longkmie ka la phah ïa ka jingujor ba ha ka 12 tarik mynta u bnai ha ka por kumba 8.30 baje mynmied arngut ki briew ki la ktah kti ïa ka khun ruit ne ka pyrsa jong ka kiba la ithuh kyrteng kum u Bah D Syngkon (23 yrs) bad u Bah L Syngkon (36 yrs) da ka tari ne ka waitsum hapoh ka ïing jong ka para jong ka hapoh ka surok Rymbai (EJH).
Shuh shuh la kynnoh ba kine ki runar ki la ktah kti ruh ïa ka para jong ka ha ka por ba ka dang ïa pynbeit ïa kane ka jingjia. Halor kane ka jingjia kitei ki lanot ki la mynsaw bad la pynkitnoh sha Civil Hospital Khliehriat.
Na ka liang ki pulit ki la ïathuh ruh ba hadien ba ki la ïoh jingtip ha ka step jong ka 14 tarik mynta u bnai, ki la don ki runar bym lah ban ithuh ki la pynïap ïa u Rimiki Rabon (37 yrs) hapoh ka shnong Saphai (WJH).
Ha kawei pat ka jingjia na ka liang jong ki pulit ki la ïathuh ba u Mizanur Rahman u la phah ka jingujor ba ha ka janmied jong ka 12 tarik mynta u bnai, ki runar bym lah ban ithuh ki la tuh ïa bun tylli ki mobile phone kiba la shongdor kumba T. 93,400/- napoh ka dukan kaba don ha Bansali Bazar (SWGH).
